САЙЛОВОЛДИ ТАРҒИБОТ-ТАШВИҚОТ УЧРАШУВИ ЎТКАЗИЛДИ

Мамлакатимизда Ўзбекистон Республикаси Президени сайлови куни тобора яқинлашмоқда. Айни кунларда Президентликка номзодларнинг ишончли вакиллари жойларда учрашувлар ўтказиб, тарғибот-ташвиқот ишларини олиб бормоқда.

24 октябрь Ўзбекистон Республикаси Президени сайлови куни. Айни кунларда давом этаётган сайловолди ташвиқоти давомида президентликка сиёсий партиялардан кўрсатилган номзодларнинг дастурлари билан сайловчилар яқиндан таништирилмоқда. Сайловчиларнинг ўзи хоҳлаган номзодга овоз беришларини ташкил қилиш мақсадида барча сайлов участкаларида зарур шарт-шароитлар яратилиб, сайловга тахт қилиб қўйилди.

Амударё туманида ҳам президентликка номзодларнинг ишончли вакиллари сайловолди тарғибот-ташвиқот учрашувларида иштирок этишмоқда.

Ана шундай сайловолди тарғибот-ташвиқот учрашуви тумандаги Қипчоқ овул фуқаролар йиғинида ҳам ўтказилди. Унда Қипчоқ овул фуқаролар йиғинининг сайловчилар вакиллари ҳамда ёшлар, Экологик партия аъзолари иштирок этдилар.

Учрашувда Ўзбекистон Экологик партиясидан президентликка номзод Нарзулло Обломуродовнинг ишончли вакили Бердах Жиенбаев номзоднинг таржимаи ҳоли, меҳнат фаолияти ва сайловолди дастури мазмун-моҳияти билан сайловчиларни батафсил таништирди.

Сайловолди тарғибот-ташвиқот учрашуви давомида Бердах Жиенбаев “Биз келажак учун жавобгармиз” ғоясини ўзида мужассам этган Ўзбекистон Республикаси президентлигига номзод Нарзулло Обломуродовнинг сайловолди дастурида илгари сурилган еттита асосий устувор вазифага батафсил тўхталди. Яъни, партиянинг дастури, экологик мувозанатни таъминлаш, табиий ресурслардан оқилона фойдаланиш ҳамда “яшил иқтисодиёт” тушунчалари ҳақида сўз юритиб, президентликка номзоднинг ўз олдига қўйган катта мақсадлари, мамлакатни дунёнинг энг ривожланган давлатлари қаторига қўшиш борасидаги шахсий ташаббуслари, фикр ва ғоялари ҳақида сайловчиларга батафсил маълумотлар берди.

Хусусан, номзоднинг ишончли вакили глобал аҳамиятга эга бўлган иқлим ўзгариши билан боғлиқ экологик хавф-хатарлар ички миграцияни ҳаракатга келтириши мумкинлиги ва ўз навбатида халқнинг даромад манбаларига, шунингдек истеъмол маҳсулотлари ишлаб чиқариш ҳамда уларнинг нарх-навосига кескин таъсир кўрсатиши билан боғлиқ ижтимоий-иқтисодий масалаларни ижобий ҳал этишга қаратилган номзоднинг фикрлари, аниқ ва пухта ишлаб чиқилган иқтисодий механизм, режалари ҳақида сўз юритди.

Шундан сўнг, Қипчоқ овул фуқаролар йиғини сайловчилар вакиллари, экологик партия аъзолари бўлган ёшлар номзоднинг сайловолди дастурида илгари сурилган ташаббуслар, номзоднинг шахсий фикр ва ғоялари бўйича ўзларини қизиқтирган саволлар билан мурожаат қилдилар.

Барча саволларга президентликка номзоднинг ишончли вакили Бердах Жиенбаев батафсил жавоб берди ва барчани 24 октябрь куни Ўзбекистон Республикаси президентлигига Ўзбекистон Экологик партиясидан кўрсатилган номзод Нарзулло Обломуродов номзодини ёқлаб овоз беришга чақирди.

Бўлиб ўтган сайловолди тарғибот-ташвиқот учрашуви демократик тамойиллар асосида, ошкоралик ва шаффофлик руҳида ўтди.

Робия ЙЎЛДОШЕВА.