Қорақалпоғистон Республикаси Маҳалла ва оилани қўллаб-қувватлаш вазири Сағиндиқ Турманов иштирокида сайёр қабул бўлиб ўтди

Мамлакатимизда Президент ташаббуси билан ҳудудларда мутасадди раҳбарларнинг аҳоли қийнаб келаётган муаммолар билан ишлар, мурожаатлардаги масалаларни жойларга чиқиб ўрганиш ҳамда уларни ижобий ҳал этиш тизими янги босқичга кўтарилди.

Бутун мамалакатимиз бўйлаб жойларда турли даражадаги раҳбарларнинг аҳоли билан очиқ мулоқотлари, сайёр қабуллар ташкил этилиб, инсонларнинг муаммолари ўрганилмоқда ҳамда уларни бартараф қилиш чоралари кўрилмоқда.

Жорий йилнинг 15 октябрь санасида Амударё туманидаги Дарё бўйи маҳалласи 21-сонли Болалар мусиқа ва санъат мактабида республика мутасадди раҳбарлари иштирокида аҳоли мурожаатларини ўрганиш ҳамда уларни ижобий ҳал этишга амалий ёрдам бериш мақсадида сайёр қабул ўтказилди.

Сайёр қабулда Қорақалпоғистон Республикаси Маҳалла ва оилани қўллаб-қувватлаш вазири Сағиндиқ Турманов, вазирнинг биринчи ўринбосари Марям Аҳмедова, туман ҳокими Султонбой Йўлдашев, туманимиздаги секторлар раҳбарлари, корхона-ташкилотлар масъуллари ҳамда аҳоли вакиллари иштирок этдилар.

Қабул жараёнида Қорақалпоғистон Республикаси Маҳалла ва оилани қўллаб-қувватлаш вазири Сағиндиқ Турманов сўзга чиқиб, бугунги кунда мамалакатимизда барча соҳаларда амалга оширилаётган ислоҳотлар туб негизида инсон манфаатлари ётгани, аҳолини узоқ йиллар мобайнида қийнаб келаётган муаммоларни жойларга чиқиб ўрганиш ҳамда уларга барҳам бериш борасида давлатимиз раҳбари томонидан янги устувор вазифалар белгилаб берилгани ҳамда уларнинг ижросини таъминлашга алоҳида эътибор қаратилаётгани хусусида сўз юритди.

Таъкидлаш керакки, Президент Шавкат Мирзиёевнинг «Инсонларнинг дарду ташвишларини ўйлаб яшаш – одамийликнинг энг олий мезонидир», «Халқ давлат идораларига эмас, давлат идоралари халқимизга хизмат қилиши керак», «Халқимиз ўз ҳаётида ижобий ўзгаришларни эртага эмас, узоқ келажакда эмас, айнан бугун кўриши керак» каби эл-юртимиз қалби ва онгидан чуқур жой олган сўзлари бугун мамлакатимизда барча соҳа ва тармоқларда амалга оширилаётган туб ўзгариш ва ислоҳотларни ҳаракатлантирувчи қудратли кучга айланди.

Сайёр қабул жараёнида аҳоли вакилларининг турли мазмундаги  муаммоли масалалари юзасидан 25 га яқин мурожаатлари қабул қилинди. Мурожаатлардаги масалалар асосан, ижтимоий ва моддий ёрдам олиш, тадбиркорлик фаолияти билан шуғулланиш учун кредит олишда амалий ёрдам сўраш, бандигини таъминлаш, электр таъминотидаги муаммоларни ҳал этишда, ободонлаштириш ва ички йулларни таъмирлаш масалаларида, амалий ёрдам сўраш мазмунида бўлди. Қатор масалалар сайёр қабул жараёнининг ўзида ижобий ечимини топди. 

Қорақалпоғистон Республикаси Маҳалла ва оилани қўллаб-қувватлаш вазири Сағиндиқ Турманов муддат талаб этадиган мурожаатлардаги масалаларни ижобий ҳал этиш юзасидан тегишли масъулларга топшириқлар бериб, аҳоли муаммолари билан ишлашда самарали тизим ҳисобланган “маҳаллабай” ишлаш, айниқса, “Темир дафтар”, “Аёллар дафтари” ва “Ёшлар дафтари”га киритилган оилалар, фуқаролар билан манзилли ва, албатта, натижали ишлаш бўйича масъулларга тегишли топшириқлар ҳамда тавсиялар берди.

Сайёр қабул якунланганидан сўнг мутасадди раҳбарлар туманимиз ёшлари ёшлар билан очиқ мулоқот ўтказдилар ҳамда уларнинг муаммоларини ўргандилар. Учрашувда тумандаги фаол ёшлар, уюшмаган ёшлар ҳамда “Ёшлар дафтари”га киритилган ёшлар иштирок этиб, турли йўналишлар бўйича муаммоли масалалар юзасидан мурожаат қилдилар. Очиқ мулоқот тарзида ўтказилган учрашувда ёшлар томонидан 9 та мурожаатлар келиб тушди. Уларнинг аксарияти шу ернинг ўзида ижобий ҳал этилиб, муддат талаб этадиган мурожаатлар юзасидан тегишли ташкилотлар масъулларига топшириқлар берилди.

Туман ҳокимлигининг Ахборот хизмати.