Ҳоким ёрдамчисининг дастлабки иш куни

Мамлакатимизда муҳтарам Президентимизнинг 2021 йил 3 декабрда қабул қилган “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида”ги қарорига мувофиқ барча овул, маҳалла ва шаҳарча фуқаролар йиғинларида ҳоким ёрдамчилари фаолияти йўлга қўйилди. Туманимизда ҳам ушбу лавозимларга танлов асосида олий маълумотли, иқтисодиёт соҳасида камида 2 йил меҳнат стажига эга бўлган, ҳудуднинг шарт-шароитини яхши биладиган, иқтидорли мутахассислар тайинланди. Улар фаолиятида амалга оширилиши лозим бўлган вазифалари хусусида махсус ўқитилди ва семинар-тренингларда қатнашиб, кенг тушунчаларга эга бўлиб, хизмат лавозимига киришдилар.

Амударё туманининг Ўрта қаъла овулида аввал иқтисодиёт тармоқларида масъул лавозимларда ишлаб, улкан тажриба тўплаган Ҳамза Ҳайтимбетов ҳоким ёрдамчиси сифатида иш бошлади.

Ушбу овулда бугунги кунда 812 хонадонда 4910 нафар аҳоли истиқомат қилади. Овул аҳолиси асосан деҳқончилик, паррандачилик ва чорвачилик билан шуғулланади. Азал-азалдан меҳнаткаш, ўз интилишлари туфайли фаровон ҳаёт кечириб келаётган овул аҳолисининг ярмидан кўпини ёшлар ташкил қилишини, улар орасида ишга яроқли, ишсизлар ҳам шунингдек, эҳтиёжманд оилалар ҳам борлиги боис ҳоким ёрдамчи ўз ишини аввало хонадонма-хонадон юриб, ҳар бир оиланинг ҳақиқий аҳволи билан танишишдан бошлади.

Овул фуқаролар йиғини раиси Бахтиёр Давеков, ҳарбий ҳисоб бўлими мутахассиси Озодбой Ўрозалиевлар билан биргаликда хонадонма-хонадон ўрганишлар олиб боришаяпти.

Ўрганишлар дастлаб 3-Қумариқ кўчаси, 16 уйда яшовчи Маҳмуд Худойберганов хонадонидан бошланди, оила бошлиғининг ўғли Ғайрат Ҳайитбоев билан суҳбатлашди. Ушбу хонадонда 6 бош соғин сигири борлигини инобатга олиб, фаолиятини кенгайтириш таклифини берди ва бу борада яратилаётган имкониятлар, хусусан имтиёзли кредит олиш мумкинлигини тушунтирди.

Асли якка тадбиркорлик билан шуғулланаётган ушбу оилада 2 та замонавий тегирмони ишлаб турибди. Эндиликда чорва учун ем ишлаб чиқаришни йўлга қўйиш имконияти ҳам мавжуд эканлиги маълум бўлди. Шундай қилиб, ушбу оила унинг иш дафтарига банк кредити ҳисобига тадбиркорлигини кенгайтириши мумкинлиги қайд этилди.

2-Қумариқ кўчаси 4-уйда яшовчи Нурбек Исмоилов билан ўтказилган суҳбат жараёнида ушбу оила томорқасида боғдорчилик билан шуғулланиши, 100 тупдан зиёд мевали дарахтларидан ҳар йили мўл ҳосил олиб келаётганлиги, эндиликда ихчам иссиқхона ташкил этиб, эртаги сабзавотлар етиштириш режаси борлиги маълум бўлди ва бу борада уни қўллаб-қувватлашини, амалий ёрдам беришини билдирди.

Маълумки, ҳоким ёрдамчилари маҳаллада тадбиркорликни ривожлантириш ва янги иш жойларини яратишга масъул бўлиб, ер, кредит, инфратузилма, касбга ўқитиш ва бошқа зарурий кўмак бериш тизимини йўлга қўяди, ўз “бюджети” бўлиб, эҳтиёжманд оилаларга субсидиялар ажратиш, жамоат ишларига жалб қилишни ташкиллаштиради.

Ҳар бир оила – ўзига хос бир олам. Уларнинг турмушлари фаровон бўлиши, ҳаёт сифати ошишида овул ва маҳаллаларда фаолият бошлаётган барча ҳоким ёрдамчилари муносиб ҳисса қўшишига ишонамиз.

Ойгул Ражабова.