Амударё тумани ҳокими Р.Йўлдашевнинг Ўзбекистон Республикаси Давлат мустақиллигининг 23 йиллик байрам тадбиридаги НУТҚИ

Бугун халқимиз мамлакатимиз мустақиллигининг 23 йиллигини катта шодиёна билан, кўтаринки кайфиятда қарши олмоқда. Жаннатмакон юртимизнинг ҳар бир гўшасида байрам нафаси кезиб юрган шу қутлуғ кунларда Сизни ва Сиз орқали оила аъзоларингизни, барча юртдошларимизни энг улуғ ва энг азиз байрам – мустақиллик куни билан чин қалбимдан табриклайман!

Шундай фарахбахш кунларда бизга истиқлолдек улуғ неъматни ато этгани, халқимизни турли бало-қазолардан омон сақлаб, ёруғ кунларга етказгани учун ҳар биримиз Яратганга шукроналар айтишимиз ҳам қарз, ҳам фарз, деб ўйлайман.

Шу ўринда айтиш керакки, бугун биз шонли 23 йиллигини нишонлаётган истиқлолимиз ўз-ўзидан келмади. Ватан озодлиги асрлар давомида ота-боболаримиз учун энг улуғ орзу бўлиб, бу йўлда юртнинг минглаб фидойи ўғлонларининг қони тўкилганини халқимиз ҳеч қачон эсидан чиқармайди. Шунинг учун ҳам, Ўзбекистон Республикаси давлат мустақиллигини қўлга киритган буюк тарихий сана – 1 сентябрь халқимизнинг ижтимоий-сиёсий, маънавий ҳаётида беқиёс ўрин тутадиган қутлуғ кундир.

Албатта, истиқлолнинг қўлга киритилгани билан ҳамма нарса ўз-ўзидан ҳал бўлиб қолмайди. Мустабид тузум барҳам топганидан кейин мамлакатимизда юзага келган жуда қалтис иқтисодий, ижтимоий-сиёсий, ахлоқий-маънавий вазиятни бартараф этиш йўлида қанча машаққатли, таҳликали кунларни бошдан кечирдик.

Муҳтарам Юртбошимиз томонидан узоқни кўзлаб барча соҳаларда амалга оширилган кенг кўламли ислоҳотлар, бошига тушган мураккаб синов ва қийинчиликларни мардонавор енгиб ўтган халқимизнинг мустаҳкам иродаси, ғайрат ва шижоати туфайли мустақиллигимизни мустаҳкамлашга, жаҳон ҳамжамиятидан муносиб ўрин эгаллашга эришдик.

Бугунгидек сурурли дамларда ўз-ўзимизга "Биз кеча ким эдигу бугун ким бўлдик?” деган ҳақли саволни бериб, бундан 23 йил олдинги ва бугунги кунимизни солиштирар эканмиз, тўғри белгилаб олган ўзимизга хос ривожланиш йўлимиз, халқимизнинг истиқлол ғояларига садоқати, ҳалол ва фидокорона меҳнати натижасида мустақиллик йилларида улкан ютуқлар қўлга киритилаётганининг гувоҳи бўламиз.

Бугун дунёда ўзбек деган миллат, Ўзбекистон деган давлат борлигини, унинг қисқа даврда улкан ривожланиш йўлини босиб ўтганини, юртимизнинг куч-қудрати, салоҳиятини бутун дунё тан олди.

Истиқлол йилларидаги ўзгаришларнинг энг каттаси одамларимиз онгида, дунёқарашида рўй берди. Бугунги ўзбекистонликлар ўтган асрнинг 90-йилларидаги боқимандалик кайфиятидаги одамлар эмас. Улар эркин ва обод юртда тинч ва осойишта кунларнинг қадрига етиб, мустақилликни мустаҳкамлаш, ободлик ва бунёдкорлик ишларига ҳисса қўшишдек улуғвор мақсадлар билан яшамоқдалар, меҳнат қилмоқдалар.

Уларда ўз юртининг келажагига, ўзининг эртанги кунига ишонч, Ватан тақдирига дахлдорлик туйғуси мужассам. Ана шундай фидойи эл меҳнатидан мамлакатимиз равнақ топмоқда, юксалмоқда.

Юртимизнинг кичик бир гўшаси бўлмиш Амударё туманида ҳам бундай ўзгаришлар, янгиланиш ва юксалишлар кун сайин бўй кўрсатмоқда.

Шаҳар-у қишлоқларимиз, маҳалла-ю кўчаларимиз, ҳовли ва хонадонларимиз обод қиёфа касб этиб, файзли масканларга айланмоқда.

Амударёликлар жорий йилда ҳам энг улуғ ва энг азиз байрамни катта меҳнат зафарлари билан қарши олмоқдалар.

Истиқлол байрами арафасида йирик саноат лойиҳаси - "Амударётекс” хорижий корхонаси илк маҳсулотини бера бошлаган бўлса, қишлоқ хўжалиги соҳаси илғорлари пилла ва ғалла етиштириш бўйича контрактация шартномаларини Республикамизда биринчи бўлиб бажаришди ва айни кунларда энг масъулиятли палла – пахта йиғим-терими арафасида турибди.

Ишонамизки, пахтакорларимизнинг ва бутун халқимизнинг ҳамжиҳатликдаги меҳнати самараси сифатида яқин кунлар ичида 40 минг тоннадан ортиқ юксак хирмон бунёд этилади ва бу ҳам истиқлолимизнинг 23 йиллигига катта туҳфамиз бўлади.

Қурувчиларимизнинг фидойи меҳнатлари туфайли байрам арафасида қишлоқларимизда 70 та намунавий лойиҳалар асосидаги уй-жойлар, қатор таълим масканлари янгидан қурилиб, фойдаланишга топширилмоқда.

Ёш авлодни соғлом ва баркамол қилиб вояга етказиш, ёш оилаларни қўллаб-қувватлаш мақсадида жорий йилнинг ўзида туманимизда кинотеатр, 5 та ҳудудда мини футбол ва волейбол майдончалари, "Камолот” ёшлар шаҳарчасида 48 хонадонга мўлжалланган шинам ва замонавий 4 қаватли уй-жойлар фойдаланишга топширилиш арафасида.

Шунингдек, тадбиркорларимизнинг ўз маблағлари ҳисобидан овул ва маҳалаларимизда ижтимоий-маданий бинолар ва тадбиркорлик объектлари қуриб битказилмоқда.

Таълим, соғликни сақлаш ва ижтимоий-иқтисодий йўналишдаги бошқа соҳаларда ҳам истиқлол байрамига туҳфа этгулик ютуқларимиз бисёр. 

Азиз меҳмонлар!

Биз фахр билан тилга олаётган бу ютуқлар, барпо этилаётган эркин ва фаровон жамият, кун сайин ривожланаётган озод ва обод Ватан – буларнинг барчаси фарзандларимиз учун. Дунёда бизнинг халқимиздек оилапарвар, болажон халқ бўлмаса керак.

Муҳтарам юртбошимизнинг жорий йилни "Соғлом бола йили” деб эълон қилгани халқимизнинг ана шу инсоний фазилатининг ёрқин намунаси бўлди.

"Соғлом бола йили” туман дастурига мувофиқ умумий қиймати 22 миллиард сўмликдан ортиқ кенг кўламли ишлар амалга оширилмоқда.

Бу маблағлар ёш оилаларнинг оёққа туриб олиши учун моддий ёрдам кўрсатиш, оналик ва болалик ҳимоясини таъминлаш, аҳолининг тиббий маданиятини ошириш, таълим-тарбия тизими ва спортнинг ролини кучайтириш, мактабгача таълим муассасалари тармоғини кенгайтириш каби хайрли ишларга сарфланади. Мақсадимиз ягона – биздан фарзандларимизга озод ва обод Ватан қолсин!

Қадрли меҳмонлар!

Ушбу сурурли дамларда "Ягонасан, муқаддас Ватаним, севги ва садоқатим Сенга бахшида, гўзал Ўзбекистоним” деган шиорни дилларига жо қилиб, истиқлолимизнинг 23 йиллик байрамини кўтаринки руҳда нишонлаётган юртдошларимизни яна бир марта энг улуғ ва энг азиз байрамимиз билан чин қалбимдан муборакбод этаман!

Мана шу унутилмас дамларда кўпни кўрган, ҳаётнинг турли қийинчиликларида тобланиб, бугун ёш авлодга ўрнак бўлаётган нуроний отахон ва онахонларимизни, фидойи ва ҳалол меҳнати билан туманимиз номини юртга танитаётган олижаноб ва бағрикенг юртдошларимизни, барча эзгу ва хайрли ишларимизнинг давомчилари бўлмиш ёшларимизни она Ватанимиз тарихидаги энг улуғ сана – мустақиллик байрами билан табриклайман!

Юртимиз тинч, осмонимиз мусаффо, халқимиз омон, мустақиллигимиз абадий бўлсин!

Эътиборингиз учун раҳмат!