«Яшил макон» умуммиллий лойиҳаси доирасида ҳудудларда яшил дарахтзорлар барпо этилмоқда

Кўчат экиб, боғ яратиш, ўзимиз яшаб турган ҳудудни яшил маконга айлантириш ҳам азалий қадриятларимиздан ҳисобланади. Шу боис, аждодларимиз жуда қадимдан гузар йўллар бўйлари, экинзорларнинг четларига, кўчалар ёқалатиб турли хил манзарали ва мевали дарахт кўчатларини ўтқазишган ва буни ўз фарзандлари учун ҳам доимий анъанага айлантиришган. Мамлакатимизда яшил ҳудудлар барпо этиш, экилган ҳар бир туп ниҳолни авайлаб-асраш, унинг тупроққа илдиз қўйиб, униб-ўсиб кетишини таъминлаш мақсадида ҳар йили кузги ва баҳорги кўчат экиш мавсумига алоҳида пухта тараддуд кўрилади.

Ўзбекистон Республикаси Президенти Шавкат Мирзиёев раислигида 2021 йил 2 ноябрь куни ўтказилган видеоселектор йиғилишида белгиланган вазифалар ижросини таъминлаш мақсадида эълон қилинган "Яшил макон" умуммиллий лойиҳаси ҳамда дарахт экиш бўйича "Долзарб 40 кунлик" доирасида Амударё туманида 2021 йил куз ва 2022 йил баҳор мавсумида 1 миллион 159 минг дона манзарали ва мевали дарахт кўчатлари экиш режалаштирилган.

13 март куни Амударё туманига ташриф буюрган Ўзбекистон Республикаси Экология ва атроф-муҳитни муҳофаза қилиш қўмитаси раиси Нарзулло Обломуродов ва мазкур қўмита мутасаддилари Амударё тумани хокими Султонбой Йўлдашев билан биргаликда Оқ олтин овули ҳудудидаги “Оқ олтин Амударё” фермер хўжалигида бўлишиб, “Яшил макон” умуммиллий лойиҳаси доирасида ҳудудда амалга оширилаётган ишлар билан яқиндан танишдилар ва ушбу жараёнга ўз ҳиссаларини қўшиб, мевали ва манзарали дарахт кўчатларини экдилар.

Айни кунларда Амударё туманидаги умумфойдаланувдаги автомобиль йўллари ёқасига, қишлоқ хўжалиги ерлари атрофларидаги иҳота дарахтзорлар барпо этиладиган ерларда, фермер хўжаликлари экин ер майдонлари четларига, олий ва ўрта махсус таълим, халқ таълими, мактабгача таълим ҳамда соғлиқни сақлаш йўналишларидаги муассасалар ҳудудларига, шунингдек, корхоналар ва хизмат кўрсатиш соҳалари ҳудудлари, туман ободонлаштириш бошқармаси тасарруфидаги ҳудудлар ва объектларда иқлим шароитимизга мос мевали ва манзарали дарахтлар кўчатларини экиш ишларига алоҳида эътибор қаратилмоқда.

Тумандаги овул ва маҳаллалар ҳудудларида 2021 йил куз мавсумида 434,6 минг дона манзарали ва мевали дарахт кўчатлари экиш режалаштирилиб, шундан 1,5 минг дона виагра арчаси, 2 минг дона шарқ туяси, 3 минг дона япон сафораси, 10,6 минг дона каталпа, 9,5 минг дона шумтол, 15,9 минг дона қайрағоч кўчатлари экилди. Бундан ташқари, 2 минг дона жийда, 24,5 минг дона тут, 6,1 минг дона заранг, 5,5 минг дона акация, 13 минг дона терак, 920 минг дона сурия атиргули, бошқа турдаги 315 минг дона манзарали дарахтлар, 49 минг дона ёнғоқ дарахтлари, минг дона узум, шунингдек, 44 минг дона қаламча шаклидаги кўчатлар экилди.

Ҳозирги кунда ушбу экилган кўчатларнинг ҳолатлари ўрганилиб, суғориш тизими хамда парваришлаш бўйича назорат қилиш ва хатловдан ўтказиш ишлари олиб борилмоқда.

Туманимизда баҳорги кўчат экиш мавсумига ҳам пухта тараддуд кўрилди. Аввало кўчат экиладиган ҳудудлар харитаси тузилиб, экиладиган кўчатларни ер, сув шароитига мутаносиб равишда жойлаштириш бўйича ўрганишлар ўтказилди. Айни пайтда 2022 йил баҳор мавсумида 724,4 минг дона манзарали ва мевали дарахт кўчатлари экиш ишлари бошлаб юборилди.

Жорий йилги экиш мавсумида 500 дона виагра арчаси, 800 дона шарқ туяси, 1,3 минг дона япон сафораси, 4,6 минг дона каталпа, 4,5 минг дона шумтол, 6,3 минг дона қайрағоч, 800 дона жийда, 34,3 минг дона тут кўчатларини экиш режалаштирилган. Бундан ташқари, 3 минг дона заранг, 2,4 минг дона акация, 7,7 минг дона терак, 400 дона сурия атиргули, 146 минг дона дарахт ва бута кўчатлари, 24,7 минг дона ёнғоқ, 6,5 минг дона узум, 136,2 минг дона қаламчалар экиш ишлари амалга оширилмоқда.

Н.Узакбоев, Амударё тумани назорат бўйича инспекция бошлиғи.