Манғитда бокс бўйича очиқ турнир ўтказилмоқда

Бокс дунёда ҳамма даврлар спорти, дея эътироф этилади. Ушбу спорт тури турли даврларда турлича кўринишда ривожланган ва даврлар оша бугунги кундагидек раундларга ажратилган ҳолда, улар орасида танаффуслар вақти белгиланган ва қўллар жароҳатлардан махсус ҳимоя қилинган ва юмшоқ қўлқоп кийган ҳолда  курашиш қабул қилинган. Шунингдек, спортчилар вазн тоифаларига ажратилиши бокснинг янада оммалашишига олиб келган.

Ўзбекистонда бокс ёшларнинг энг севимли, анъанавий спорт турларидан ҳисобланади. Айниқса кейинги йилларда ушбу спорт тури янада оммалашди. Мамлакатимизнинг  барча ҳудудларида бокс мактаблари фаолият юритиб келмоқда. Натижада бокс бўйича кўплаб олимпиада, жаҳон чемпионати ғолиблари ва совриндорлари етишиб чиқди. Бокс бўйича мамлакатимиз етакчи ўринлардан бирида туради.

Туманимиздан Ўзбекистон чемпионати, нуфузли халқаро мусобақалар ғолиб ва совриндорлари етишиб чиққанлиги билан амударёликлар ҳам ҳақли равишда фахрланадилар.

Қорақалпоғистон Республикаси Конституцияси кунига бағишлаб, 2005-2006, 2009-2010 йилларда туғилган ўсмирлар ўртасида Қорақалпоғистон Республикаси бокс федерацияси соврини учун очиқ турнир айнан Манғитда ўтказилаётгани ҳам бежиз эмас.

31 март куни Амударё тумани Болалар-ўсмирлар спорт мактабининг Чордара маҳалласида жойлашган базасида ушбу нуфузли мусобақанинг очилиши маросими бўлиб ўтди. База ёнидаги мини футбол майдончасида очиқ турнирга куч синашиш учун етиб келган Қорақалпоғистон Республикасининг барча туманлари, Хоразм вилоятининг Урганч шаҳри иқтидорли ва кучли боксчилари саф тортди. Туман болалар-ўсмирлар спорт мактабида тўгаракларида шуғулланаётган ёш спортчилар турли спорт ўйинларини мусиқа садолари остида намойиш этиб, меҳмонларга хуш кайфият улашди.

Тадбирни Қорақалпоғистон Республикаси бокс федерацияси раҳбари Аҳмад Сайланов очди ва барча иштирокчиларни ўзларининг салоҳиятини намойиш этишлари учун имкон яратган очиқ турнир билан қизғин қутлади ва иштирокчиларга муваффақиятлар тилади. Туман Болалар-ўсмирлар спорт мактаби директори Чоршам Тожимуродов, очиқ турнир бош ҳаками, халқаро тоифадаги ҳакам Аҳмад Фозиловлар ҳам ёш спортчиларни ушбу тадбир билан қутлаб, рингда ўз куч ва маҳоратларини намойиш этиб, ғолиблик учун ҳалол ва сидқидилдан беллашишга чорлади.

Тантанали очилиш маросимидан сўнг очиқ турнирнинг илк беллашувларига старт берилди. Мусобақа шу йилнинг 31 мартидан 3 апрелгача ўтказилиши режалаштирилган. Қорақалпоғистон Республикаси Конституцияси кунига бағишлаб ўтказилаётган очиқ турнирда Қорақалпоғистон Республикасининг барча туманларидан ва Хоразм вилоятининг Урганч шаҳридан жами 155 нафар ёш боксчилар 23 та вазн тоифасида иштирок этмоқда. 3 апрель куни финал жанглари ўтказилади ва ғолиблар тантанали равишда тақдирланади.

Ушбу нуфузли беллашувда иштирок этаётган ёш боксчиларга муваффақиятлар тилаймиз.

Ойгул РАЖАБОВА.