АМУДАРЁДА ЎТКАЗИЛГАН БОКС БЎЙИЧА ОЧИҚ ТУРНИР ҒОЛИБЛАРИ ТАҚДИРЛАНДИ

Ҳар йили юртимизда 9 апрель санаси Қорақалпоғистон Республикаси Конституцияси ташкил куни сифатида кенг нишонланади. Шу муносабат билан ҳудудларда турли тадбирлар, спорт мусобақалари, учрашувлар ўтказилади.

Амударё туманида ҳам Қорақалпоғистон Республикаси Конституциясининг 29 йиллигига бағишлаб, Республика Бокс федерациясининг соврини учун очиқ турнирга старт берилган эди. Шу йил 31 мартидан 3 апрелгача давом этган беллашувларда 2005-2006, 2009-2010 йилларда туғилган ўсмирлар ўзаро куч синашиб, ўз маҳоратларини кўрсатишди.

3 апрель куни очиқ турнир ғолибларини тақдирлаш маросими ўтказилди. Маросимда туман ҳокими Султонбой Йўлдашев, Болалар ва ўсмирлар спорт мактаби директори Чоршам Тажимуродов, туризм ва спорт бўлими бошлиғи Ғуломжон Қурбонбоев, бокс федерацияси биринчи ўринбосари Жасур Нуримбетов, ижрочи директори Мурад Куанбоев ҳамда бошқа масъуллар иштирок этдилар.

Катта бокс байрамига айланиб кетган маросимда сўзга чиққанлар мусобақалар дўстона руҳда ўтганлигини таъкидлаб, ёшлар орасидан маҳоратли, истеъдодли спортчилар етишиб чиқаётганлиги, бунинг учун юртимизнинг барча ҳудудларидаги спорт масканларида етарли шароитлар яратилганлиги ва бошқалар тўғрисида кенг тўхталдилар. Шунингдек, бўлиб ўтган мусобақаларда иштирок этган ёш спортчилар куч-ғайрати, шижоатини, ғалабага бўлган ишончини намоён этишганини эътироф этдилар.

Таъкидланганидек, тумандаги Болалар-ўсмирлар спорт мактабининг Чордара маҳалласида жойлашган базаси ёнидаги мини футбол майдончасида ўрнатилган рингда Қорақалпоғистон Республикасининг барча туманлари, Хоразм вилоятининг Урганч шаҳри иқтидорли ва кучли боксчилари иштирок этдилар. Шунингдек, туман Болалар-ўсмирлар спорт мактабидаги бокс тўгаракларида шуғулланаётган ёш спортчилар ҳам бокс мусобақаларида қатнашиб, ўз маҳоратларини кўрсатдилар.

Очиқ турнир беллашувларида Қорақалпоғистон Республикасининг барча туманларидан ва Хоразм вилоятининг Урганч шаҳридан жами 155 нафар ёш боксчилар 23 та вазн тоифасида иштирок этдилар. Мусобақанинг якуний босқичи яъни, финал жангларидан сўнг, ҳакамлар ҳайъати томонидан ғолиблар аниқланди.

Беллашувларда куч синашган амударёлик ёш чарм қўлқоп усталари ҳам ўз вазн тоифалари бўйича ғолибликни қўлга киритишга мушарраф бўлдилар. Улардан Оғабек Каримбоев 37 кг. вазн тоифасида, Азиз Нуримов 46 кг. вазн, Баҳриддин Қурбиязов 58 кг. вазн, Жавлонбек Жумамуродов 54 кг. вазн, Умид Давлетов 57 кг. вазн, Бахт Собуров 60 кг. вазн, Бунёд Илҳомов 63,5 кг. вазн, Комрон Қўшмонов 67 кг. вазн тоифаларида 1-ўрин ғолиблари бўлдилар.

Тақдирлаш маросимида очиқ турнир ғолиблари медаллар, фахрий ёрлиқлар ва эсдалик совғалари билан тақдирландилар. Шунингдек, ёш спортчилар Жавлонбек Жумамуродовга “Энг яхши жанги учун” номинацияси, Бунёд Илҳомовга “Энг яхши боксчи” номинацияси берилиб, велосипед совға қилинди. Муобақаларда ўз маҳоратини кўрсатган ёш боксчи Бахт Собуровга эса “Энг яхши техникаси учун” номинацияси ва рағбатлантирувчи совға берилди.

Қизиқарли ўтган очиқ турнир мусобақалари барча спортчиларда катта таассуротлар қолдирди.

 О.Худойберганова.