ТУМАНИМИЗДА ЎЗБЕКИСТОН РЕСПУБЛИКАСИ ДАВЛАТ ХАВФСИЗЛИК ХИЗМАТИ РАИСИ КУБОГИ УЧУН ФУТБОЛ, МИНИ ФУТБОЛ БЎЙИЧА МУСОБАҚАЛАРГА СТАРТ БЕРИЛДИ

Спорт қадимдан одамларни бирдамликка, ҳамкорликка ва тинч-тотувликка чорловчи муҳим восита бўлиб келган.

Спорт кишини жисмонан чиниқтирибгина қолмай, маънавий дунёсини бойитишга, ўз юрти шарафини муносиб ҳимоя қилишга ўргатади. Шу боисдан ҳам мамлакатимизда спортнинг оммавийлигига эришиш, аҳоли қатламлари орасида турли мусобақалар ўтказиб, иқтидорлиларни рағбатлантириб боришга эътибор кучаймоқда.

Мамлакатимизнинг қишлоқ ва маҳаллаларида яшовчи уюшмаган ёшлар орасида соғлом турмуш тарзини шакллантириш, уларнинг ўз қобилиятларини намойиш этишларига шароит яратиш ва кўнглида ватанпарварлик туйғуларини юксалтириш мақсадида Ўзбекистон Республикаси Давлат хавфсизлик хизмати раиси кубоги учун спортнинг футбол ва мини футбол турлари бўйича мусобақалар ўтказилмоқда.

Ушбу мусобақанинг Амударё тумани саралаш босқичи бошланиши байрам тусини олди. Шу йилнинг 5 апрель куни Манғит шаҳрининг Чордара маҳалласидаги сунъий қопламали мини футбол майдончасида бўлиб ўтган тадбирда туман ҳокими Султонбой Йўлдошев, секторлар раҳбарлари, Давлат хавфсизлик хизмати туман бўлими бошлиғи Султанмурат Жолымбетов, ҳоким ўринбосари Маҳмуд Шерметов, туризм ва спорт бўлими бошлиғи Ғуломжон Қурбонбоев, туман Болалар-ўсмирлар спорт мактаби директори Чоршам Тажимуродов ҳамда ёш спортчилар қатнашдилар.

Байрамона безатилган сунъий қопламали майдончада саф тортган спортнинг футбол, мини футбол турлари билан шуғулланаётган маҳаллалар ёшларини туман ҳокими Султонбой Йўлдошев қизғин муборакбод этди ва Ўзбекистон Республикаси Давлат хавфсизлик хизмати раиси кубоги учун бошланаётган ушбу нуфузли беллашувда барча жамоаларни муваффақиятли иштирок этишга ва ғолиб бўлишга чақирди.

Қайд этиш лозимки ушбу мусобақанинг илк босқичида туманимиздаги 49 та маҳаллаларнинг ҳар биридан биттадан, жами 49 та жамоалар иштирок этади.

Тадбирда иштирок этган Давлат хавфсизлик хизмати туман бўлими бошлиғи, туман Болалар-ўсмирлар спорт мактаби директори Чоршам Тожимуродовлар спорт мактаб ҳамда Давлат хавфсизлик хизмати, Ёшлар ишлари агентлиги туман бўлимлари, туман ҳокимлиги Туризм ва спорт бўлими ҳамкорлигида ташкиллаштирилаётган ушбу мусобақа 16 ёшдан 30 ёшгача бўлган футбол ишқибозлари жамланган барча жамоалар учун унутилмас воқеа бўлиб қолишини таъкидладилар.

Тадбирда мусобақанинг илк босқичида қайси жамоа ким билан ғолиблик учун тўп суришини аниқлаш учун қуръа ташланди. Футбол, мини футбол ишқибозлари жамоалари уч босқичда – туман саралаш, Қорақалпоғистон Республикаси ва вилоятлар, Тошкент шаҳри бўйича саралаш ва финал мусобақаларида ўзаро куч синашадилар.

Сўнгги йилларда анъанавий тарзда ўтказиб келинаётган ушбу мусобақа минглаб ёшларни қамраб олмоқда ва тобора нуфузи ортиб бормоқда.

Мусобақанинг август ойида бўлиб ўтадиган финал босқичида Қорақалпоғистон Республикаси, вилоятлар ва Тошкент шаҳридан ўз ҳудудларида ғолиб бўлган 14 та жамоалар беллашади. Ғолиб жамоага ўзлари истиқомат қилувчи ҳудудда мини футбол майдончаси, 2-, 3-ўринлар эгаларига эса “Workout” тренажёр майдончалари қуриб берилади. Туманимиз ёшларига беллашувларда муваффақиятлар тилаб қоламиз.

О.РАЖАБОВА.