НАМУНАЛИ МАДАНИЯТ МАРКАЗИ

Амударё туманининг олис ҳудудларидан бири Қиличбой овулида жойлашган Қиличбой маданият маркази аҳолининг маданий ҳордиқ чиқаришини таъминлаш мақсадида кўп йиллардан буён фаолият юритмоқда.

Овулдаги ушбу Маданият марказини янада ривожлантириш,  турли хил тўгараклар сонини кўпайтириш, энг асосийси, аҳолининг маданий ҳордиқ олишини таъминлашда марказ мудири,  Қорақалпоғистонда хизмат кўрсатган артист И.Сийтимовнинг хизматлари катта.

Бугунги кунда Қиличбой маданият марказида 8 нафар ходим фаолият олиб бормоқда. Шунингдек, марказда драма ва ашула тўгараклари фаолияти йўлга қўйилган бўлиб, тўгарак аъзолари Республика миқёсида ўтказилаётган танловларда муносиб қатнашиб келишмоқда.

Ўтган йил мобайнида маданият маркази томонидан ёшларнинг бўш вақтини мазмунли ўтказиш, иқтидорли ёшларни аниқлаш ва санъатга қизиқишларини ошириш борасида кўплаб салмоқли ишлар амалга оширилди. "Беш ташаббус” доирасидаги кўрик-танловлар, “Oрзулар сари”, “Азиз юртим ёшлари” номли концерт дастурлари шулар жумласидандир.

Қиличбой маданият маркази овул ҳудудидаги умумтаълим мактаблари билан ҳамкорликда фаолият олиб бормоқда. Иқтидорли ёшлар аниқланиб, уларга малакали устозлар томонидан таълим берилмоқда. Бугунги кунда маскандаги йўналишларни кенгайтириш, аҳоли, айниқса, ёшларнинг қамраб олиниш даражасини янада ошириш борасида кўплаб ижобий ишлар амалга оширилмоқда.

Чекка ҳудудларда дам олиш концерт дастурлари  ўтказиш, турли  мавзуларда ёшлар учун хайрия ва пуллик концерт дастурларини намойиш этиш, Қорақалпоғистон Республикасида хизмат кўрсатган артист, устоз санъаткор Назир Раҳимов музейини, “Қўғирчоқ театри”ни ташкил қилишни асосий вазифа қилиб белгилашган.  Марказ ходимлари халққа хизмат кўрсатишдан, маънавият ва маданиятни тарғиб этишдан асло чарчамайди.

Ф.Эшимбетова.