Фуқаролар йиғинлари раислари сайловини муносиб тарзда ўтказишга бағишланган семинар бўлиб ўтди

Маҳалла раислари сайлови – мамлакатимиз ижтимоий-сиёсий ҳаётидаги муҳим воқелик саналади. Маълумки, 2022 йил 16 март куни бўлиб ўтган Олий Мажлис Сенати Кенгашининг йиғилишида фуқаролар йиғинлари раисларининг ваколат муддати тугаши муносабати билан Ўзбекистон Республикаси Конституциясининг 105-моддаси ҳамда “Фуқароларнинг ўзини ўзи бошқариш органлари тўғрисида”ги ва “Фуқаролар йиғини раиси (оқсоқоли) сайлови тўғрисида”ги қонунларига мувофиқ сайлов жорий йилнинг май ойида ўтказилиши белгиланган эди.

Ушбу қонун ижросини таъминлаш мақсадида Амударё туманида мавжуд 49 та овул ва маҳалла фуқаролар йиғинларида сайловга пухта тайёргарлик кўрилди.

Фуқаролар йиғинлари раислари сайловини демократик тамойилларга риоя қилган ҳолда муносиб тарзда ўтказиш мақсадида фуқаролар йиғинлари раислари сайловини ташкил қилиш ва ўтказишга кўмаклашувчи туман комиссияси аъзолари, ҳамда маҳаллалардаги ишчи гуруҳлар учун ўқув семинарлари ўтказилиб келинмоқда.

Шундай семинарлардан бири 10 май куни туман ҳокимлигининг катта мажлислар залида Қорақолпоғистон Республикаси Вазирлар Кенгаши раисининг ўринбосари — Оила ва хотин-қизлар қўмитаси бошлиғи, Қорақалпоғистон Республикаси Жўқорғи Кенгесининг фуқаролар йиғинлари раислари сайловини ташкил этиш ва ўтказишга кўмаклашувчи комиссияси аъзоси Марям Аҳмедовa ҳамда Бердақ номидаги Қорақалпоқ давлат университети ўқитувчиси Илҳом Матчанов бошчилигида бўлиб ўтди.

Семинарда дастлаб сайлов жараёнларини қонун талаблари асосида ташкил қилиш ва ўтказиш бўйича долзарб масалалар муҳокама қилинди.

Шундан сўнг, туман Адлия бўлими бошлиғи Мўминжон Матюсуповнинг сайлов жараёнларини қонун талаблари асосида ўтказиш, фуқароларнинг сайловда иштирок этишга оид конституциявий ҳуқуқларини тўлиқ рўёбга чиқариш учун зарур бўлган барча ташкилий-ҳуқуқий шарт-шароитларни яратиш бўйича тавсиялари тингланди.

Семинар давомида туман ҳокимлигининг ташкилий назорат гуруҳи етакчи мутаҳассиси Азат Алмуратов ишчи гуруҳ ваколатлари ва мажбуриятлари ҳақида батафсил маълумот берди.

Таъкидланганидек, ишчи гуруҳ сайловни ташкил этиш ва ўтказиш масалалари юзасидан аҳоли ўртасида тушунтириш ишларини олиб боради. Сайлов ўтказиладиган сана, вақт ва жойни белгилайди. Ҳовлилар, уйлар, кўчалар аҳолисининг фуқаролар вакиллари сайлови бўйича умумий йиғилишларини ташкил этади ва ўтказади.

Семинар давомида фуқаролар йиғинлари раислари сайловини ташкил этиш ва ўтказишга кўмаклашувчи туман комиссияси раиси Ғуломжон Ешниёзовнинг аҳолини сайловга жалб қилиш ҳамда сайлов жараёнларини кенг ёритиш бўйича маърузаси тингланди.

Шундан сўнг Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбаевнинг сайловни ўтказиш тартиби, овоз бериш шакли ҳамда якуний натижаларни чиқариш борасидаги маълумотлари тингланди. Қайд этилганидек, овоз бериш жараёни яширин тарзда, махсус кабиналарда амалга оширилади.

Шундан сўнг, семинар иштирокчилари ўзларини қизиқтирган саволлар билан масъулларга мурожаат қилиб, тегишлича жавоблар олдилар.

Шу ўринда айтиш керакки, бу галги сайловлар мамлакатимиз ривожланишининг янги босқичида, жумладан, маҳалла институти фаолиятининг самарадорлигини ошириш, уни жамоатчилик бошқаруви ва назоратининг таянч омилига айлантириш борасидаги муҳим ислоҳотлар даврида ўтказилаётгани ва ушбу йилнинг ҳам “Инсон қадрини улуғлаш ва фаол маҳалла йили” деб номлангани маҳалланинг Ватан тараққиётида катта аҳамиятга эга эканлигини яққол намоён қилади.

Туман ҳокимлигининг Ахборот хизмати