Фуқаролар йиғинлари раислари сайлови қонун талаблари асосида ўтказилмоқда

Маҳалла институти ўзини ўзи бошқариш органи сифатида маълум бир ҳудуддаги ижтимоий-сиёсий, маданий, диний ва бошқа масалаларда мустақил иш олиб борувчи ижтимоий тузилма ҳисобланади. Бутун мамлакатимизда бўлгани каби Амударё туманида ҳам жорий йилнинг май ойида ўтказиладиган фуқаролар йиғинлари раислари сайловини ташкил этиш ва ўтказишга доир ишлар юқори савияда ташкил этилди.

16 май куни туман ҳудудида ҳам фуқаролар йиғинлари раислигига сайловлар жараёнлари бошлаб юборилди. Жумладан, Ўртақалъа овулида ҳам фуқаролар йиғини маъмурий биносида сайлов жараёни Ўзбекистон Республикаси Давлат мадҳияси билан бошланди.

Амалдаги тартиб асосида кўча ва гузарларда ўтказилган йиғилишларда фуқаролар йиғини раислигига шу овулда обрў-эътиборга эга, қонунчиликда белгиланган талабларга мос бўлган номзодлар кўрсатилиб, туман ҳокими томонидан Замира Эшмурадова ҳамда Ҳайитбой Қутлимуродовларнинг номзодларига келишим берилган. Ўтказилган сайловда фуқаролар йиғини раислиги учун қўйилган икки нафар номзод вакиллар йиғилишига келганларни ўз дастури билан таништирди.

Ўртақалъа овулида фуқаролар вакиллари йиғилишида иштирок этиш учун ҳовли, уй, кўчалардан 360 нафар вакиллар сайланган эди. Номзодлар вакилларни ўз дастурлари билан таништирганларидан сўнг, барча вакиллар ўз ваколатларидан фойдаланиб, ўзлари маъқул деб билган номзодга овоз бердилар. Овоз бериш жараёнида 360 нафар вакиллардан 245 нафари қатнашди.

Айтиб ўтиш керакки, Амударё туманида 2 та шаҳарча, 16 та овул ва 31 та маҳалла жами 49 та фуқаролар йиғинлари фаолият кўрсатмоқда. Уларнинг барчасида 2022 йилнинг май ойида бўлиб ўтадиган фуқаролар йиғинлари раислари сайловига тайёргарлик кўриш ва уни ўтказиш бўйича тегишли вазифалар белгиланиб, 25 банддан иборат тадбирлар режаси ҳамда 19 кишидан иборат фуқаролар йиғинлари раислари сайловини ташкил этиш ва ўтказишга кўмаклашувчи туман комиссияси таркиби тасдиқланди.

  29-30 март кунлари сайловни ташкил этиш ва ўтказиш бўйича фуқаролар вакилларининг йиғилишлари ўтказилди ҳамда ҳар бир  фуқаролар йиғинида 7 кишидан иборат ишчи гуруҳлар тузилиб, уларнинг таркиби тасдиқланди.

Амударё туманида сайлов ёшига тўлган фуқаролар умумий сонининг камида ўн икки фоизи миқдорида ҳовлилар, уйлар, кўчалар ва аҳоли пунктлари бўйича жами 15 минг 75 нафар фуқаролар вакил сифатида сайланди.

Туманда фуқаролар йиғинлари раислари сайлови 26 таси мактаб биносида,  3 таси касб-ҳунар мактаблари ва техникумлар биносида, 1 таси Болалар мусиқа ва санъат мактаби биносида, 1 таси корхона ва ташкилот биносида, 11 таси тўйхоналар биносида ва 1 таси маҳалла гузарида ва 6 таси Маданият муассасаларида ўтказилиши белгиланган.

Ўзбекистон Республикасининг “Фуқаролар йиғини раиси (оқсоқоли) сайлови тўғрисида”ги қонуни талабларига асосан, маҳаллалардаги Ишчи гуруҳлар томонидан ҳар маҳалладан 2-3 нафардан жами 147 нафар номзодлар тавсия этилган.

Ўртақалъа овулида ўтказилган сайлов натижаларига кўра, фуқаролар йиғини раислигига номзоди қўйилган Замира Эшмурадова сайловда иштирок этган вакилларнинг 24 фоиз, Ҳайитбой Қутлимуродов 74 фоиз овозини тўплашди. Энг кўп овоз тўплаган Ҳайитбой Қутлимуродов овул фуқаролар йиғини раислигига сайланди.

Раисликка сайланган Ҳайитбой Қутлимуродов бор куч ва билимини овул ободлигини таъминлашга, ҳудудни ривожлантиришга сарфлашга сўз бериб, номзодини қўллаб-қувватлаган, ушбу масъулиятли вазифани ишониб топширган овулдошларига ўз миннатдорчилигини билдирди.

Озода Худойберганова.