69-сонли мактабда “Хайр, биринчи устозим!” деб номланган тадбир ўтказилди
Шу кунларда умумтаълим мактабларининг бошланғич синф ўқувчилари ўзларига оқ-қорани танитиб, илм сирларини очган азиз устозлари билан хайрлашиб, 5-синфга қадам қўймоқдалар. Шу муносабат билан май ойининг охирги ҳафтаси барча умумтаълим мактабларининг 4-синфини битираётган болажонлар учун энг ҳаяжонли лаҳзаларни ҳадя этмоқда. Тўрт йил давомида ўзларига таълим-тарбия берган азиз ва мўътабар устозлари билан хайрлашув тадбирлари ўтказилиб, ўқувчилар дил изҳорлари янграмоқда.
Ана шундай ҳаяжонли дақиқаларга бой тадбирлардан бири Амударё тумани Халқ таълими бўлимига қарашли 69-сонли мактабда ҳам бўлиб ўтди. 4-А синф раҳбари Ҳаёт Нуримбетова, 4 Б-синф раҳбари Адиба Аҳмедовалар томонидан ташкиллаштирилган “Хайр, биринчи устозим!” деб номланган тадбир ўтказилди. Мазкур тадбир мактаб директори Дилшод Бобониёзов ва маънавий-маърифий ишлар бўйича директор ўринбосари Жўрабек Тажимуродов, мусиқа фани ўқитувчиси Мақсуд Аллабергановларнинг маслаҳат ва тавсияларига амал қилинган ҳолда юқори савияда ўтказилди. Тадбирни мактаб ўқувчилари Моҳичеҳра Холлиева ҳамда Фарангиз Муродбоевалар олиб бордилар.
Тадбирнинг бошланиш қисмида ўқувчилар Ўзбекистон ва Қорақалпоғистон Республикаларининг Давлат мадҳияларини жўр овозда куйлашди. Шундан сўнг, бошланғич синфда аъло баҳоларга ўқиган ўқувчиларга Фахрий ёрлиқлар топширилди. 4-синфни муваффақиятли тугатган ўқувчиларга ўқитувчилари энг эзгу тилакларни тилаб, келгусида мактабни муваффақиятли тугатишларига омадлар тиладилар. Ота-оналар эса фарзандларига 4 йил мобайнида таълим-тарбия берган ўқитувчиларга миннатдорчилик билдирдилар.
Тадбир давомида ўқувчилар томонидан шўх ва миллий рақслар ижро этилди. Ўқувчилар Ватан ва устозлар ҳақида шеър ва ҳикматли иборалар айтишиб, тадбир меҳмонларини хушнуд этдилар.
Бошланғич синф ўқитувчиси Адиба Аҳмедова томонидан саҳналаштирилган “Балиқчи ва балиқ ҳақида эртак” деб номланган рус халқ эртаги ўқувчиларда ва келган меҳмонларда катта таассурот қолдирди. Бу эртак орқали ўқувчилар қалбида борига шукур қилиб яшаш ҳисси уйғонди. “Балиқчи ва балиқ ҳақида эртак” саҳна кўринишида кампир ролини маҳорат билан ижро этган Маҳфуза Ҳайитбоева, чол ролида чиққан Икромжон Аллаберганов, олтин балиқ Дурдона Хушнудова ҳамда Шаҳзодбек Шеримбетовларнинг ижро маҳоратлари, эртак ғоясини томошабинлар қалбига сингдира олганликларидан уларнинг ота-оналари ва устозлари мамнун бўлдилар. Чунки кичик актёр ва актрисалар ўз ижро маҳоратлари билан адабиётга, халқлар дўстлиги ҳамда сабр-қаноат туйғусига муносабатларини изҳор этишиб, меҳри чексизлигини ўзлари яратган образлар талқинида намоён этдилар.
Шунингдек, “Хайр, биринчи устозим!” адабий-мусиқий тадбири давомида бошланғич синф битирувчилари ўзларига оқ-қорани танитиб, дунёвий илм-ирфон сари ойдин йўл очган азиз устозлари – биринчи ўқитувчиларини шарафловчи дил сўзларини изҳор этишиб, устозларига бағишлаб шеърлар айтишди. Куй-қўшиқлар ижро этишиб, рақслар гулдастасини армуғон қилдилар. Устозларига меҳр-муҳаббат, миннатдорчилик рамзи сифатида гуллар ҳадя этдилар.
Махсус мухбиримиздан.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
