“СОЛИҚЧИ – КЎМАКЧИ” ТАМОЙИЛИ БЎЙИЧА ТАДБИРКОРЛАРГА КЎМАК БЕРИЛМОҚДА

“Солиқчи – кўмакчи” тамойили доирасида Амударё туманида фаолият юритиб келаётган тадбиркорлик субъектларини сегментлаш, яъни яшил, сариқ, қизил тоифаларга ажратиш орқали кўмаклашиш тизими йўлга қўйилган. Ушбу тизим асосида туман Давлат Солиқ инспекцияси ходимлари томонидан тадбиркорлар билан жойига чиққан ҳолда учрашувлар ўтказилиб, уларни қийнаб келаётган муаммолар ўрганилмоқда ва ечими изланмоқда.

Инспекция ходимлари тадбиркорларнинг фаолият юритишдаги дастлабки бухгалтериясига кўмаклашиш билан бирга, солиқ қарзи тўғрисида маълумотлар бериб, имтиёзлар ва уларни қўллаш тартиби бўйича тушунчалар беришмоқда. Таъкидлаш жоизки, бошқа солиқ турларидан ортиқча тўлов суммасини қайтариш, кредит олишига кўмаклашиш, ер ажратишга кўмаклашиш ва солиқ органига алоқадор бошқа бир қанча муаммолар юзасидан жорий йилнинг ўтган иккинчи чораги мобайнида 390 та тадбиркорлик субъектларининг муаммолари ижобий ҳал қилинди.

Навоий маҳалласида жойлашган кичик саноат зонаси ҳудудидаги темир эшиклар ва темирдан ясалган бошқа буюмлар ишлаб чиқариш фаолияти билан шуғулланиб келаётган “Жумамурод уста” оилавий корхонасига иш фаолиятини кенгайтириш учун банк томонидан 100 млн. сўм миқдорида кредит ажратилишида амалий ёрдам кўрсатилади. Натижада ҳозирги кунда 5 та иш ўрин яратилди ва қўшимча яна янги иш ўринларини яратиш режалаштирилмоқда.

Корхона ишчилари бугунги кунда эҳтиёжга кўра темир эшик, дарвоза ва бошқа рўзғор буюмларини ишлаб чиқариб, аҳолини таъминлаб келмоқда. Улар томонидан тайёрланган маҳсулотлар сифатли ва мустаҳкамлиги учун бозорда жуда харидоргир.

Кичик саноат зонаси ҳудудидаги янгидан ташкил этилган “Холбоев Мадрим” масъулияти чекланган жамиятининг цехида ҳам арзон ва сифатли мебель ишлаб чиқарилмоқда. Ушбу цехда 4 та доимий иш ўрин яратилган. Ишчилар томонидан аҳоли эҳтиёжига кўра тайёрланаётган турли мебелларнинг харидорлари кўп. Айниқса, ошхона жиҳозлари қулайлиги ва сифатлилиги, нархлари ҳамёнбоплиги билан ҳаммага маъқул келмоқда. Цехда хонадонларда аввалдан фойдаланилиб келинаётган эски, аммо таъмирланса, яна ишлатса бўладиган мебеллар ҳам янгидек қилиб тузатиб берилмоқда.

Масъулияти чекланган жамияти фаолиятини кенгайтириб, тикувчилик цехи очиш мақсади борлигини айтган тадбиркорга солиқ органлари ходимлари томонидан яқиндан ёрдам кўрсатилмоқда. Эндиликда тикувчилик цехи ташкил этилиб, ҳудуд аҳолисига хизмат кўрсатишни йўлга қўйиш билан бирга, янги иш ўринларини яратиш ва аёл-қзлар бандлигини таъминлаш кўзда тутилмоқда.

“Солиқчи – кўмакчи” тамойилига кўра туман Давлат Солиқ инспекцияси ходимларининг ёрдами, кўмаги билан фаолиятни йўлга қўяётган ва ривожлантираётган тадбиркорлар бу каби ғамхўрликлардан ниҳоятда мамнун бўлишмоқда.

О.Худойберганова.