МАҲАЛЛАЛАРДА “БЕШ ТАШАББУС ОЛИМПИАДАСИ” ҒОЛИБЛАРИГА БЕРИЛГАН СЕРТИФИКАТЛАРГА КЎРА СПОРТ МАЙДОНЧАЛАРИ ҚУРИЛИШИ БОШЛАНДИ

Жорий йилнинг апрель-июнь ойларида ўтказилган 5 босқичли “Беш ташаббус олимпиадаси”нинг Республика босқичида 6 та маҳалладан 14 нафар ёшларимиз спортнинг енгил атлетика, стол теннис, шашка ва стритбол 1 ва 2-ўринларни эгаллаб эсталик совғалари ва маҳалласига спорт иншооти қуриш учун сертификатни олган эдилар. Жумладан, спортнинг шашка турниридан Андижон вилоятида ўтказилган мусобақада туманимизнинг Хитой овулида яшовчи Санобар Шарифбоева 27-30 ёш тоифасида аёл-қизлар ўртасида Республика босқичининг мутлоқ чемпионликка эришиб, маҳалласига Универсал спорт иншооти қуриш учун сертификатга эга бўлган эди. Шунингдек, мазкур мусобақанинг 16-21 ёш тоифасидаги аёл-қизлар ўртасида Бобур овул фуқаролар йиғинида истиқомат қилувчи Умида Ибрагимова ҳам фахрли 2-ўринни эгаллаб, ўз маҳалласи ҳудудига Stritbol ва Workout спорт майдончаси қуриб берилиши учун махсус сертификатларга эга бўлишди.

Спортнинг стол теннис туридан Нукус шаҳрида ўтказилган Республика босқичи, "Б" лигаси бўйича ўғил болалар ўртасида 27-30 ёш тоифасида, туманимизнинг Бой овул маҳалласида истиқомат қилувчи Маъмур Шарипов фахрли 1-ўринни қўлга киритди ҳамда ўз маҳалласи ҳудудига Универсал спорт майдончаси қуриб берилиши учун махсус сертификатга эга бўлишди. Сурхондарё вилоятида стритбол спорт турининг "Б" ва "C" лига бўйича Ўзбекистон Республикаси босқичида муносиб иштирок этган, туманимизнинг Тўлқин овули ўғил болалар жамоаси 22-26 ёш тоифасида Достон Ҳайитбоев, Хурсанд Тиловмурадов, Амин Холбоев, Маҳмуд Жўллибоев, Шухрат Жўллибоевлар фахрли 2-ўринни қўлга киритиб, ўз маҳалласи ҳудудига Stritbol ва Workout спорт майдончаси қуриб берилиши учун махсус сертификатларга эга бўлишди.

Бундан ташқари, Тошкент вилоятида енгил атлетика спорт турининг "Б" ва "C" лига бўйича Ўзбекистон Республикаси босқичида муносиб иштирок этган, туманимизнинг Амир темур овули жамоаси ўғил болалари 16-21 ёш тоифасида Дилшодбек Сапардурдиев, Отамурод Егандурдиев, Сардор Раҳимовлар фахрли 2-ўринни қўлга киритиб, ўз маҳалласи ҳудудига Stritbol ва Workout спорт майдончаси қуриб берилиши учун махсус сертификатларни қўлга киритишди. Навоий номли маҳалла жамоаси аёл-қизлари 22-26 ёш тоифасида Сурайё Раҳимова, Муҳайё Раҳимова, Умида Бозорбоевалар мутлоқ чемпионликни қўлга киритиб, ўз маҳалласи ҳудудига Универсал спорт майдончаси қуриб берилиши учун махсус сертификатларга эга бўлишди.

Жорий йилнинг 4 октябрь куни Хитой овулида қурилиши бошланган Универсал спорт иншоотини кўриш учун Ўзбекистон Республикаси Спортни ривожлантириш вазирининг ўринбосари Абдулла Асланов туманимизда бўлди ва қурилиш жараёнини туман ҳокими ўринбосари Маҳмуд Шерметов ҳамда туман спортни ривожлантириш бўлими масъуллари ҳамроҳлигида кўздан кечирди. Бойовул, Навоий номли, Тўлқин, Амир Темур номли, Бобур номли овул ва маҳаллаларда спорт майдончалари қуриладиган жойларини кўрди. Шунингдек, бугунги кунда давом этаётган “Беш ташаббус олимпиадаси”нинг иккинчи мавсуми доирасида спортнинг волейбол туридан Бобур номли маҳалласидаги 6-сонли мактаб спорт залида ўтказилаётган сектор босқичи мусобақасига ҳам ташриф буюришди.

Ғ. Қурбонбоев, туман Спортни ривожлантириш бўлими бошлиғи.