ТАЪЛИМ ЖАРАЁНИГА АХБОРОТ-КОММУНИКАЦИОН ТЕХНОЛОГИЯЛАРНИ ЖОРИЙ ЭТИШ БЎЙИЧА АМАЛИЙ ЎҚУВ-СЕМИНАРИ ЎТКАЗИЛДИ

Қорақалпоғистон Республикаси Халқ таълими вазирлигининг “Таълимни рақамлаштириш йўналишида амалга оширилган ислоҳотлар, келгусида умумтаълим мактабларига Ахборот-коммуникацион технологияларни жорий этиш ва ривожлантириш юзасидан ўтказиладиган тадбирлар ва ютуқларни оммавий ахборот воситаларида ёритиш бўйича чора-тадбирлар рeжаси” ижросини таъминлаш мақсадида Амударё туманида амалий ўқув-семинар ташкил этилди.

Шу йил 10 октябрь куни тумандаги 76-сонли мактабда туман Халқ таълими бўлимининг Таълим жараёнига ахборот технологияларини ва коммуникацияларини жорий этиш ва ривожлантириш шўбаси ходимлари Ислом Саъдуллаев ва Жаҳонгир Иброҳимовлар томонидан ташкил қилинган мазкур семинарда барча мактабларнинг ўқув ишлари бўйича директор ўринбосарлари қатнашишди.

Семинар давомида Халқ таълими вазирлиги томонидан ишлаб чиқилган электрон таълим ресурслари, яъни “erp.maktab.uz”, “Kundalik” электрон тизимлари ҳақида амалий тарзда тушунчалар берилди.

Маълумки, туманда Халқ таълими бўлимига қарашли 85 та умумтаълим мактаби мавжуд бўлиб, уларда бугунги кунда 38 457 нафар ўқувчи таълим олиб келмоқда.

Тумандаги барча мактаблар юқори тезликдаги интернет тармоғига уланган ва барча мактабларда локал тармоқ линиялари тортилган. Компьютер синфи ва ўқув ишлари бўйича директор ўринбосарлари хонасига локал тармоқ ва ўқитувчилар хонасига Wi-Fi қурилмалари ўрнатиб берилган.

Президент топшириғига биноан 2022 йил сентябрь ойидан бошлаб, мактаблардаги энг кам интернет тезлиги сониясига 40 мегабит қилиб белгиланди. Аниқроқ айтадиган бўлсак, агар мактабдаги ўқувчи сони 400 нафаргача бўлса интернет тезлиги сониясига 40 мегабит, ўқувчи сони 400 нафардан ортиқ бўлса сониясига 100 мегабитни ташкил қилмоқда.

Жорий йил 11 та мактабга жами 146 та замонавий компьютер техникалари етказиб берилди. Йил якунига қадар қўшимча замонавий компьютер синфлари етказиб бериш режалаштирилган.

Семинар давомида Ўзбекистон Республикаси Халқ таълими вазирлигининг 2022 йил 17 май кунги “Халқ таълими соҳасида ахборот тизимлари ва ахборот ресурсларнинг ҳудудларда жорий этилишини жадаллаштириш бўйича чора-тадбир режаси”га мувофиқ электрон таълим ресурслари ва ахборот ресурлари тўғрисида маълумотлар берилди.

“Maktab.uz” масофавий таълим платформаси веб-портал ва мобиль иловаси имкониятлари ва фойдали томонлари, “Kitob.uz” веб-портали ва мобиль иловаси, Smartland.maktab.uz веб-портал ва мобиль иловаси, “Edukids animatsion” видео контентлар имкониятлари, Artshop, Educare.uzedu.uz веб-порталларининг фойдали томонлари, idea.itsm.uz инновацион ғоялар порталлари ҳақида тақдимотлар қилинди.

Шунингдек, Халқ таълими вазирлиги томонидан ишлаб чиқилган ягона электрон тизим “erp.maktab.uz” ва унинг имкониятлари ҳақида кенгроқ тўхталиб ўтилди.

Ушбу тизим орқали халқ таълими тизимда фаолият юритувчи барча ходимлар ва ўқувчилар ҳақида маълумотлар шаклланган бўлиб, улар бевосита Ички ишлар вазирлигининг фуқаролар паспорт базаси, Адлия вазирлигининг фуқаролар туғилганлик ҳақидаги гувоҳномалар базаси, Таълим сифатини назорат қилиш инспекциясининг малака тоифалар бўйича pedkadr.tdi.uz базаси ва шунга ўхшаш кўплаган электрон базалар билан интеграция қилинган. Ушбу электрон тизим орқали мактабдаги ўқувчиларнинг сонини реал вақт режимида аниқлаш имкони мавжуд.

Ундан ташқари, семинар давомида “Kundalik” электрон тизимининг имкониятлари ва қулайликлари бўйича ҳам батафсил маълумотлар берилди. Ушбу тизим kundalik.com сайти орқали юритилади. Таъкидланганидек, Халқ таълими вазирлигининг шу йил 24 июнь кунги тегишли буйруғи билан 2022/2023-ўқув йилидан бошлаб, тумандаги барча мактабларда “Kundalik” электрон тизими жорий қилинди. “Kundalik” электрон тизими онлайн режимда мактабдаги барча воқеалар ва баҳолардан хабардор бўлиш, синф раҳбарлари ва бошқа ўқитувчилар билан алоқани ушлаб туриш ва дарс жараёнида қўйиладиган баҳоларнинг ҳаққонийлиги ва шаффоф бўлишини таъминлашга ёрдам беради.

Семинар иштирокчилари шу каби маълумотлар юзасидан саволлар бериб, тўлиқ жавоблар олдилар ва батафсил тушунчаларга эга бўлдилар.

Озода Худойберганова.