ФАОЛИЯТНИНГ ОЧИҚЛИГИ - ТАРАҚҚИЁТ КАФОЛАТИ

Ўзбекистон Республикаси Конституциясининг 2-моддасида "Давлат халқ иродасини ифода этиб, унинг манфаатларига хизмат қилади. Давлат органлари ва мансабдор шахслар жамият ва фуқаролар олдида масъулдирлар” деб белгилаб қўйилган.

Жорий йилнинг 2 май куни Ўзбекистон Республикасининг "Давлат ҳокимияти ва бошқарув органлари фаолиятининг очиқлиги тўғрисида”ги Қонунининг кучга кириши давлатимизнинг халқ иродасини ифода этишидаги яна бир залворли қадам бўлди. Боиси, ушбу қонун халқимизнинг давлат бошқаруви органлари фаолияти тўғрисидаги ахборотдан доимий равишда хабардор бўлиш имкониятини амалда таъминлайди.

Мазкур қонун фуқароларнинг давлат бошқаруви органлари фаолияти ҳақидаги ахборотга бўлган конституциявий ҳуқуқларини амалга ошириш механизмларини такомиллаштириш, улар фаолиятининг очиқлигини, шаффофлигини таъминлаш, шунингдек, давлат ҳокимияти ва бошқаруви органлари ҳамда улар мансабдор шахсларининг қабул қилинаётган қарорлар учун масъулиятини ошириш мақсадида ишлаб чиқилган.

Қонунда асосий вазифалар, давлат ҳокимияти ва бошқаруви органлари фаолияти очиқлигининг асосий принципларининг белгиланиб қўйилиши, шунингдек, ахборотдан фойдаланувчи сўровига биноан эълон қилиниши ва тақдим этилиши мумкин бўлган ахборот рўйхатининг алоҳида "Давлат ҳокимияти ва бошқаруви органларининг фаолияти тўғрисидаги ахборот” моддаси билан тасдиқланиши, ўз навбатида, мазкур соҳадаги ахборот хавфсизлигини таъминлайди.

Давлат ҳокимияти ва бошқаруви органларининг фаолияти тўғрисидаги ахборотдан фойдаланувчиларнинг ҳуқуқлари алоҳида кўрсатилган бўлиб, жумладан, уларнинг мурожаати асосида давлат ҳокимияти ва бошқаруви органларининг фаолияти тўғрисидаги ишончли ахборотни олиш ва тарқатиш ҳуқуқлари белгиланган. Қонунда давлат ҳокимияти ва бошқаруви органлари раҳбарларининг давлат ҳокимияти ва бошқаруви органлари фаолиятининг очиқлигини таъминлаш соҳасидаги ваколатлари, уларнинг ҳуқуқ ва мажбуриятлари аниқ таърифланган.

Бундан ташқари, давлат ҳокимияти ва бошқаруви органлари фаолиятини ОАВда ёритишга масъул ахборот хизматининг мажбуриятлари кўрсатилган бўлиб, давлат ҳокимияти ва бошқаруви органларининг расмий веб-сайтида уларнинг фаолияти тўғрисидаги ахборотни жойлаштириш ва янгилаб бориш вазифалари ҳам юкланган.

Мазкур Қонун ижросини таъминлаш ҳамда туман ҳокимлиги ва тумандаги маҳаллий ижроия органлари фаолиятининг ошкоралигини таъминлаш, кенг жамоатчилик ва аҳолини туманда амалга оширилаётган иқтисодий ва ижтимоий ислоҳотларнинг бориши тўғрисида мунтазам хабардор қилиш мақсадида шу йилнинг 11 ноябрь куни туман ҳокимининг "Туман ҳокимлиги ва унинг таркибий бўлинмалари фаолиятининг очиқлиги ва ошкоралигини таъминлаш борасида қўшимча чора-тадбирлар тўғрисида”ги 460-сонли қарори қабул қилинди ва мазкур қарор билан туман ҳокимлигининг ахборот хизмати ташкил қилинди.

Туман ҳокимлигининг Ахборот хизмати тўғрисида низом тасдиқланиб, шу асосда амалий ишлар бошланди.

Ўйлаймизки, янги ташкил қилинган ахборот хизмати туманимизда давлат ҳокимияти ва бошқаруви органлари фаолиятининг очиқлигини таъминлашда муҳим восита бўлади.

Акбар ХЎЖАМУРОТОВ,

туман ҳокимлигининг ахборот хизмати раҳбари.