ХОРИЖИЙ ТИЛЛАР ФАН ОЙЛИГИ ДОИРАСИДА “WE LOVE ENGLISH” ДЕБ НОМЛАНГАН ТАДБИР ЎТКАЗИЛДИ
Юртимиз ҳудудидаги умумтаълим мактабларида шу кунларда хорижий тиллар фан ойлиги доирасидаги тадбирлар ўтказилмоқда. Ойлик доирасида ташкил этилаётган очиқ ўқув машғулотлари, интеллектуал ўйинлар, иншолар танловларида ўқувчилар фаол иштирок этиб, ўз билимларини янада мустаҳкамлаб олишмоқда.
Шу йил 29 ноябрь куни Амударё туманидаги 36-сонли мактабда ҳам фан ойлиги муносабати билан “We love english” деб номланган тадбир ўтказилди. Мактабнинг инглиз ва рус тиллари ўқитувчилари томонидан ташкил этилган ушбу тадбирда директор ўринбосарлари Сарвар Қутлимуродов ҳамда Баҳром Хўжамуродовлар иштирок этдилар ва кечани очиб бердилар. Шунингдек, бугун юртимизда хорижий тилларни ўрганишга бўлган талаб кун сайин ошиб бораётганини таъкидлаб, рус, инглиз, немис тиллари дунё миқёсида ўз мавқеига эга тиллардан саналишини, тил билган ҳар қандай инсон кўп билимга ҳам эга бўлишини, шу орқали келажакда юқори мартабаларга эришиш мумкинлигини айтиб ўтишди.
Фан ойлиги тадбирлари давомида фаол бўлган инглиз тили фани ўқитувчиларидан Хосият Ражабова, Замира Отажонова, Дилдор Холменова, Дилнура Бобониёзова, Шаҳло Искандарова, Мадина Файзуллаева ҳамда Нилуфар Шомуродоваларни, рус тили фани ўқитувчилари Муҳаббат Турсунбоева, Раъно ва Насиба Аҳмедовалар, Нодира Солиева, Икром Ортиқов, Юлдуз Юсуповаларнинг фидойиликларини намуна қилиб кўрсатди.
Шундан сўнг, ўқувчилар инглиз ва рус тилидаги шеърлар, қўшиқлар ижро этиб, рақсга тушишди. Мактабнинг 3-синф ўқувчиси Саиджон Юсуфбоев ижросидаги “Выучи русский язык” номли шеър, 1-синф ўқувчиларининг “Ягода малина”, “Умка” қўшиқларига ижро қилган рақслари, 4-синф ўқувчиларининг “Butterfly”, 5-синф ўқувчиларининг “Traffik light” шеърлари барчага жуда манзур бўлди.
Таъкидланганидек, ноябрь – хорижий тиллар фан ойлиги муносабати билан рус ва инглиз тили фанлари бўйича ўтказилган диктант, иншо, ижодий ишлар танловлари ўзининг ижобий самарасини берди. Очиқ дарс машғулотлари жараёнида ҳам асосий эътибор янги инновацион усуллардан фойдаланиб, ўқувчиларнинг билимини ошириш, улардаги кўникмаларни ривожлантириш, аниқланган бўшлиқларни бартараф этишга қаратилди. Машғулотлар давомида ўқувчиларнинг фанга, тил ўрганишга бўлган қизиқишлари янада ортди ва фаоллиги ошди. Фан ойлиги доирасида ўтказилган очиқ дарслар ўқитувчилар томонидан кузатилди ва таҳлил қилинди.
Фан ойлигининг якуни муносабати билан мактаб миқёсида ўтказилган тадбир ҳам ниҳоятда қизиқарли ўтди. Ўқувчилар дарслардаги самарадорлик натижасини, ўзларининг ўзлаштириш даражаларини, хорижий тилларни ўрганишга бўлган интилишларини тадбир давомида намоён этдилар. Тадбирларда фаол бўлган ўқувчиларни рағбатлантириш мақсадида уларга сертификатлар топширилди.
Фан ойлиги доирасида қизғин тарзда ўтказилган барча тадбирлар нафақат ўқувчиларга, балки ўқитувчиларга ҳам масъулият, ўз касбига садоқат ҳамда фанларнинг аҳамиятини яна бир бор англашга имконият яратди.
Райҳон Ўрозбоева, 36-сонли мактабнинг инглиз тили фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
