1-СОНЛИ МАКТАБДА МАДҲИЯМИЗ ҚАБУЛ ҚИЛИНГАН КУН МУНОСАБАТИ БИЛАН ТАДБИР ЎТКАЗИЛДИ

1992 йилнинг 10 декабри “Ўзбекистон Республикаси Давлат мадҳияси тўғрисида”ги Ўзбекистон Республикасининг Қонуни қабул қилинган кун. Орадан ўтган 30 йил давомида мадҳиямиз давлатимиз суверенитети рамзи сифатидан бутун халқимизнинг фахри-ифтихорига айланди. Шунингдек, мамлакатимизда яшаб турган бошқа шахслар ҳам мадҳиямизни ҳурмат қилиши шартлиги Қонунда таъкидланган.

Ҳар йили Мадҳиямиз қабул қилинган кун бутун мамлакатимиз бўйлаб кенг нишонланади. Амударё туманидаги 1-сонли мактабда ҳам сана муносабати билан туман Маънавият ва маърифат маркази билан ҳамкорликда “Мадҳиям – ихтифорим” номли маънавий-маърифий тадбир ўтказилди.

Тадбирда мактаб ўқитувчилари, ўқувчилари иштирок этдилар.

Тадбирда туман Маънавият ва маърифат маркази мутахассиси Маҳмуд Эшмонов мадҳиямизнинг давлатчиликдаги ўрни, ёшларни юксак ватанпарварлик руҳида тарбиялашдаги аҳамияти хусусида маъруза қилди.

Ўқувчилар мадҳиямиз яратилиши тарихига оид маълумотларни қизиқиб тингладилар.

Шундан сўнг мактаб иқтидорли ўқувчилари ижросида мадҳиямизни, юртимиз тинч-осойишталигини, бугунгидек дориломон ҳаётимизни мадҳ этувчи шеърлар ифодали ўқилди. Қўшиқлар, рақслар ижро этилди.

Ўзбекистон Қаҳрамони, Ўзбекистон халқ шоири Абдулла Орипов шеърига Ўзбекистон халқ артисти, машҳур бастакор Мутал Бурхонов куй басталаган мадҳиямизда халқимизнинг орзу-умидлари, эртаги кунга ишончи ўз ифодасини топган. Шунингдек, аждодларимизнинг истиқлолимизгача босиб ўтган шарафли йўли, миллий анъана ва қадриятларимиз, тинчлик, осойишталик, миллатлараро тотувлик биродарлик каби халқимизга хос эзгу туйғулар тараннум этилган.

Мадҳиямиз янграган вақтда ҳеч бир юртдошимиз бу жўшқин оҳангларга сингдирилган миллий ғурур, ўзига хос фахр, юртга меҳр туйғуларини бефарқ тинглай олмайди, аксинча дилимиз чексиз ифтихордан энтикади, шундай осойишта, бағрикенг юртда туғилганимизга шукроналар айтамиз.

Иштирокчилар тадбирдан улкан таассуротлар ва мотивация олдилар. Чинданда Ватан ҳақидаги, Ватанимиз суверенитети, рамзлари ҳақидаги қўшиқларни, шеърларни эътиборсиз тинглаб бўлмайди. Ўз Ватанини севган, унинг келажагига ўзини дахлдор деб ҳисоблайдиган кишининг кўнглида мадҳиямиз фахр-ифтихор уйғотади.

Шуни эътироф этиш жоизки, истиқлолни қўлга киритган, миллий тараққиётинин тарихий босқичига қадам қўйган ҳар бир халқ бугуни ва келажагини, орзу-интилишларини ўзида мужассам этган давлат рамзларига чуқур ҳурмат-эҳтиром билан қарайди. Мадҳиямиз ҳам халқимизнинг ўз озодлик йўлидан дадил одимлашида, аҳдида собит туришида руҳий қувват манбаи бўлиб хизмат қилади.

Давлат тадбирларида, халқаро анжуманларда барча иштирокчилар тик туриб, кўксига қўлларини қўйганича мадҳиямизни куйлайдилар, дунёнинг турли ҳудудларида ўтказилаётган спорт мусобақаларида юртимизнинг ғолиб фарзандлари шарафига мадҳиямиз янграб, байроғимиз юксакка кўтарилади. Бу халқни бирлаштира оладиган, юксак ирода, қатъият, жасорат туйғуларини уйғота оладиган муқаддас қўшиқдир.

Шу боисдан ҳам бутун мамлакатимизда бўлгани каби туманимизда ҳам мадҳиямиз қабул қилинган кун кенг нишонланди.

Ойгул РАЖАБОВА.