10-СОНЛИ МАКТАБДА ЎТКАЗИЛГАН САВОДХОНЛИК БАЙРАМИДА ЎҚУВЧИЛАР ЎЗ ИҚТИДОРЛАРИНИ НАМОЁН ЭТДИЛАР

Шу кунларда Амударё туман Халқ таълими бўлими тасарруфидаги умумтаълим мактабларининг 1-синф ўқувчилари учун Саводхонлик байрамлари бўлиб ўтмоқда. Ушбу тадбирни ўтказишдан мақсад – 1-синф ўқувчиларининг ўқув йилининг биринчи ярмида ўрганган билим ва кўникмалари, мактаб мулкини кўз қорачиғидек асраш, мактаб ўқувчисининг одоб-ахлоқ қоидаларига амал қилиш, мактабда ва оилада, жамоат орасида ўзини тутиши бўйича қай даражада тушунчаларга эга бўлганликлари, шу билан бирга “Алифбе”ни ўзлаштириш даражасига баҳо беришдан иборат.

Ана шундай байрам тадбири 10-сонли умумтаълим мактабида ҳам ўтказилди. Саводхонлик байрами бўлиб ўтадиган хона ўқувчиларнинг 4 ой давомида ўрганган билим ва кўникмаларини ўзида мужассам этган суратли-лавҳалар, ўқувчиларнинг расм дарсида чизган суратлари, табиат манзаралари, йилимизнинг тўрт фасли ҳақида ҳикоя қилувчи плакатлар, энг аълочи ўқувчиларнинг хуснихат дафтарлари, шарлар ва гуллар билан безатилди.

Тадбирда мактабнинг 1-“А” ва 1-“Б” синф ўқувчилари устозлари Райҳон Турсунбоева ва Умида Ўрозимбетовалар билан биргаликда ўқув йилининг биринчи ярмида ўзлари ўрганган билим ва кўникмаларини намойиш этишди.

Хусусан, ҳар бир ўқувчи “Алифбе” тартибидаги ҳарф ва товушлар тимсолида даврага чиқишиб, ҳарф ва товушларни таърифлаб бердилар. Математика фанидан олган билимларини рақамлар воситасида кўрсатишиб, қизиқарли математик амалларни – сонларни ёддан қўшиш, айириш ва кўпайтириш, мисол ва масалаларни бажаришди. Ҳатто карра жадвалини ёдлашнинг уддасидан чиққан энг аълочи ўқувчилар ўз қобилиятлари билан Саводхонлик байрамига ташриф буюрган ота-оналарини хурсанд қилдилар.

Шундан сўнг, ўқишни ўрганган, турли мавзуларда шеърлар ёдлаган ўқувчилар “Юлдузча”, “Томчи”, “Тулпор”, “Эшмат ўғли Мамажон” қувноқ қўшиқларини биргаликда куйлашиб, рақслар ижро этишди. Ўқишни ўрганган болажонлар тадбир давомида “Алифбе” китоби билан хайрлашиб, Она тили ва Ўқиш китобларини қабул қилиб олишди ҳамда байрамга ташриф буюрган ота-оналари ҳамда устозларига янги-янги илм сирларини эгаллашга, яхши ўқиб, мустақил Ўзбекистонимизга муносиб, ватанпарвар фарзандлар бўлиб вояга етишга сўз бердилар.

Болажонларнинг бири-биридан қувноқ қўшиқ ва рақслари, она, тинчлик, устоз, Ватан, дўстлик ҳақидаги жарангдор шеърлари тадбир иштирокчилари бўлган ота-оналар ва устозларига завқ-шавқ бағишлади. Айниқса, ота-оналар ўқишни ўрганган фарзандларининг ютуқларидан мамнун бўлишиб, уларни чин дилдан табрикладилар.

Саводхонлик байрами якунида 1-“А” ва 1-“Б” синфлар раҳбарлари Умида Ўрозимбетова ва Райҳон Турсунбоевалар ўқувчиларга ўз совғаларини бердилар.

Билимдонлик, эпчиллик хислатларини, ўзларининг қобилият ва иқтидорларини намоён этган, ўқишни ўрганган, билимга чанқоқ, интилувчан ўқувчилардан барча мамнун бўлди.

Робия ЙЎЛДОШЕВА.