“Табиат ва биз” мавзусида расмлар танлови ўтказилди

Ўзбекистон “Маҳалла” хайрия жамоат фонди Амударё туман бўлинмаси Қорақалпоғистон Республикаси Жўқорғи Кенгеси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан “Маҳаллаларда ободликни таъминлаш, аҳоли ўртасида соғлом турмуш тарзини тарғиб қилиш, аҳолининг тиббий ва экологик маданиятини ошириш” мавзусида эълон қилинган давлат гранти танловида “Обод маҳаллам” номли лойиҳаси билан қатнашиб, ғолиб бўлган эди.

Лойиҳанинг мақсади атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонун ҳужжатлари талаблари бузилишининг олдини олиш, уни аниқлаш ва унга чек қўйишга, табиатни муҳофаза қилиш фаолияти самарадорлигини оширишга ҳисса қўшиш мақсадида қонун ҳужжатларига мувофиқ фуқароларнинг ўзини ўзи бошқариш органлари, нодавлат нотижорат ташкилотлари ва фуқаролар билан ҳамкорликда жамоатчилик экологик назоратини амалга оширишдан иборат. Шунингдек, аҳолининг экологияга оид билимларини янада кенгайтириш мақсадида учрашувлар, давра суҳбатлари, танловлар ташкил қилиш, ҳудудларни ободонлаштириш ва кўкаламзорлаштириш, атроф-муҳит муҳофазасига ҳисса қўшиш ҳам грант лойиҳасининг мақсадлари қаторига киради.

Бу борадаги тадбирлар, амалий ишлар, учрашувлар ва турли мавзулардаги иншолар танловлари лойиҳанинг иш режасига асосан ўз вақтида ўтказиб келинмоқда.

Тумандаги “Баркамол авлод” болалар мактабида аҳоли, айниқса ёшларни табиатга эҳтиёткорона муносабатда бўлиш, табиий ресурсларни тежашга даъват қилиш, уларнинг экологияга оид билимларини ошириш мақсадида “Жайхун илҳомлари” нодавлат нотижорат ташкилоти билан ҳамкорликда Манғит шаҳри ва шаҳар атрофидаги ҳудудларда жойлашган мактаб ўқувчилари ўртасида “Табиат ва биз” мавзусида расмлар танлови ўтказилди.

Танловда 42 нафар ёш мўйқалам тутган иқтидорли мактаб ўқувчилари иштирок этишди.

Танловнинг очилиш маросимида “Маҳалла” хайрия жамоат фонди Амударё туман бўлинмаси бошлиғи Баҳодир Болтабоев, “Жайхун илҳомлари” нодавлат нотижорат ташкилоти раиси Ўрозали Рейимов, “Баркамол авлод” болалар мактаби директори Хонимжон Ражабова, мазкур танлов ҳакамлар жамоаси раиси, 69-сонли мактабнинг тасвирий санъат фани ўқитувчиси Малоҳат Болтабоевалар сўзга чиқиб, танловнинг мақсади ҳамда ёш рассомлар олдига қўйиладиган талаблар ҳақида гапирдилар.

Бўлиб ўтган мазкур танлов туманимизда келажаги умидли ёш рассомларнинг кўп эканлигини яна бир бор намоён қилди.

6 февраль куни Амударё тумани Маҳалла ва нуронийларни қўллаб-қувватлаш бўлими биносида мазкур танлов ғолибларини тақдирлаш маросими бўлиб ўтди. Малоҳат Болтабоева, Сарвар Нуруллаев, Манзура Аширбоевалардан иборат ҳакамлар ҳайъати хулосасига кўра ғолиб ва совриндорлар аниқланди. Ҳакамлар хулосасига кўра 40-сонли мактабнинг 10-синф ўқувчиси Зафаржон Баҳромбоев 1-, 1-сонли мактабнинг 9-синф ўқувчиси Мафтуна Нуримбетова 2-, 57-сонли мактабнинг 11-синф ўқувчиси Отабек Норбоев 3-ўринни эгаллашди.

56-сонли мактабнинг 9-синф ўқувчиси Дилшодбек Бозорбоев “Энг яхши қишлоқ тасвири”, 40-сонли мактабнинг 10-синф ўқувчиси Қувончбек Тоиров “Композицион тасвир учун”, 31-сонли мактабнинг 6-синф ўқувчиси Чаросой Жуманиязова “Бунёдкорлик ғояси учун” 27-сонли мактабнинг 8-синф ўқувчиси Асалой Чоршамова “Энг яхши табиатни асраш мавзуси учун”, 30-сонли мактабнинг 7-синф ўқувчиси Дилрабо Икрамова “Гўзал табиат тасвири учун”, 42-сонли мактабнинг 6-синф ўқувчиси Кумушой Ҳайитбоева “Энг ёрқин табиат тасвири учун” номинацияларида ғолиб деб топилдилар.

Ғолиб ва совриндорларга “Маҳалла” хайрия жамоат фонди туман бўлинмаси томонидан тайёрланган қимматбаҳо совғалар ва “Фахрий ёрлиқ”лар топширилди.

Ўрозали Реимов