СПОРТ МАКТАБИ ТРЕНЕРЛАРИ ЎРТАСИДА СТОЛ ТЕННИСИ ВА МИНИ-ФУТБОЛ БЎЙИЧА МУСОБАҚАЛАР ЎТКАЗИЛДИ

Президентимизнинг 2021 йил 5 ноябрдаги “Юриш, югуриш, мини-футбол, бадминтон, стритбол ва «Workоut» спорт турларини янада ривожлантириш чора-тадбирлари тўғрисида”ги Қарори ижросини таъминлаш мақсадида Амударё тумани Спорт мактаби тренерлари, ходимлари ўртасида спорт мусобақалари ўтказилди.

Мусобақаларда спорт мактаби директори Чаршам Тожимуродов иштирок этди ва мактабда мазкур Қарор ижросини таъминлаш борасида амалга оширилаётган ишлар хусусида кенг тўхталди.

Спортнинг барча турлари билан шуғулланиш учун спорт мактабида етарли шарт-шароитлар яратилгани, замонавий спорт анжомлари билан таъминлангани, шунингдек, чекка ҳудудларда ҳам спортни ривожлантириш ва оммалаштириш мақсадида ўтказилаётган тадбирлар самараси туман спортчиларининг турли мусобақалардаги ютуқлари мисолида намоён бўлаётгани ҳақида сўзлаб, бу галги мусобақаларда иштирок этаётган мактаб ходимлари, тренерларга омад тилади.

Дастлаб спортнинг стол теннис тури бўйича ўтказилган мусобақаларда 52 нафар ходим иштирок этишди. Маҳоратли мураббийлар, турли нуфузли мусобақалар ғолиблари бўлган ёш спортчиларга стол теннис турининг сирларини ўргатган тажрибали тренерлар ўртасида кечган баҳслар жуда қизғин бўлди. Бири-биридан моҳирлигини, абжир ва чаққонлигини кўрсатишга ҳаракат қилиб, ғолиблик учун интилишди. Мусобақа якунида рақибларини енгишга эришган спорт мактаби директори ўринбосари Баҳром Соатов 1-ўрин соҳиби бўлди. Ушбу спорт тури бўйича ўзи маҳоратини синаб кўрган мактабнинг шахмат спорти тренери Зафар Қурбонов 2-ўринни, футбол бўйича тренер Темур Собиров эса 3-ўринни эгаллади.

Стол теннис бўйича мусобақа Спорт мактабининг тренер аёл-қизлари ўртасида ҳам баҳсларга бой тарзда ўтди. Натижаларга кўра мактабнинг бадминтон спорти бўйича тренери Зуҳра Шомуродова 1-ўрин, Ибодат Шарифбоева 2-ўрин, Умида Бозорбоева ҳамда бадиий гимнастика мураббийси Шаҳодат Ражабовалар 3-ўрин совриндорлари деб топилдилар.

Шу куни Президентимизнинг 2021 йил 5 ноябрдаги “Юриш, югуриш, мини-футбол, бадминтон, стритбол ва «Workоut» спорт турларини янада ривожлантириш чора-тадбирлари тўғрисида”ги Қарори ижросини таъминлаш мақсадида спортнинг мини-футбол тури бўйича мусобақа ўтказилди.

Туман спорт мактаби очиқ биринчилиги учун ўтказилган ушбу мусобақаларда 15-16 ёшдаги ўсмирлардан ташкил топган жамоалар беллашишди. Мусобақаларда 7 та жамоа иштирок этиб, майдонда тўп суриш бўйича маҳоратларини кўрсатишди.

Баҳсларга бой тарзда, қизиқарли ўтган мусобақа туман Спорт мактабининг футбол тренери Темур Собиров жамоасининг ғалабаси билан якунланди. Шунингдек, 7 та жамоа ичида 32-сонли мактаб жамоаси 2-ўрин, 11-сонли мактаб жамоаси 3-ўрин ғолиби деб топилди.

Спорт мактаби ходимлари, тренерлари ўртасида бўлиб ўтган спорт мусобақалари ғолиб ва совриндорларига маъмурият томонидан фахрий ёрлиқ ва эсдалик совғалари топширилди.

О.Худойберганова.