АМУ ЭЛИДАГИ ЗУЛФИЯХОНИМ ИЗДОШИ

Президентимизнинг 2023 йил 6 март кунги қарорига кўра туманимиздаги 35-сонли мактабнинг 11-синф ўқувчиси Самандарова Барно Тозабой қизи Зулфия номидаги Давлат мукофоти билан тақдирланди.

Машаққатли ижод майдонига илк қадам қўяётган мурғак кўнгилли шоир-у шоираларнинг кўнгил кечинмаларига ошно инсон сифатида мамнуният билан айта оламанки, Амударёдай жўшқин табиатли азиз халқим орасида нозик дидли, ўткир салоҳиятли, билимдон, шеъриятга ихлос ва ҳурмати баланд ёшлар бисёр. Барнохон Самандарова ана шундай навниҳол, покиза дил, салоҳиятли ёшлардан бири. У илк шеърини таҳририятга олиб келганида 10 яшар қизалоқ эди. Шунчаки ҳаваскор бўлиб туюлган бу қизалоқ ўқиб-ўрганишдан, изланишдан асло чарчамайдиган, билмаганини сўрашдан асло тўхтамайдиган ўта тиришқоқлиги билан меҳримни қозонди.

У шунчаки қоғоз қораламасди, ҳаётни, турфа хулқ-атворли одамларни кузатиш, дунёқарашини бойитиш орқали ижодда ўз услубига эга бўлиш учун интилди. Ана шу интилишлари Барнохонга моҳиятан гўзал туйғулар ато этди, фикри теранлашди, ижод машаққатини зиммасига олиб, бу машаққатлардан завқланган сари янги-янги, бири-биридан гўзал шеърлар ижод этди.

Биз Барнохон билан ҳар битта сўз, ҳар бир сатр шеър қадрини ошириш йўлида бирга изландик. Ҳар гал шеърлар тўла дафтарларини кўтариб таҳририятга келганида шеърий талаблар, ижодкорлик масъулияти, сўз юкини чин юракдан ҳис этиш борасида жиддий машғулотлар ўтказдик. “Тараққиёт кўзгуси” газетаси таҳририяти,  “Жайхун илҳомлари” ННТ Барнохоннинг ҳақиқий ижод уйига, ижодий жамоа эса унинг фидойи ўқитувчиларига айланди.

У нафақат Амударё тумани, балки Қорақалпоғистон Республикаси, Хоразм  вилояти миқёсида ўз ижоди, ҳатто жамоатчилик фаолияти билан танилди. У халқаро болалар UNICEF ташкилотининг U-Report йўналиши бўйича репортёри сифатида ёшларни турли оқимлардан ҳимоя қилишга қаратилган, ижтимоий фаолликка даъват этувчи маърузалар ўқиди. Ўзи таълим олаётган 35-сонли мактабда эса тенгдошларига ўрнак, намунали лидер ўқувчига айланди.

У Ватанга муносиб фарзанд, ижодда Зулфияхонимнинг содиқ издоши бўлишдек эзгу орзу оғушида яшади ва маънавият бўстонига бир азим дарахтдек илдиз қўйишга интилди. Ана шу  эзгу орзуси йўлида журъат билан амударёлик ижодкор қизлар қатори “Зулфия қизлари” кўрик-танловининг туман ва Қорақалпоғистон Республикаси босқичларида муваффақиятли иштирок этди. Барнохон Самандарованинг номзоди Зулфия номидаги давлат мукофотига лойиқ кўрилгани ҳақидаги Президент Фармони барчага хушнудлик бахш этди.

Барнохон Самандарова ўз ижоди билан  эл-юрт, устозлари ишончини оқлади ва мен бундан чексиз қувончдаман.

Барнохон қизимга, Аму элининг биринчи Зулфияхоним қизига ижодий парвозлар тилайман. Мукофот муборак бўлсин, шоира қизим!

Робия ЙЎЛДОШЕВА, Ўзбекистон Ёзувчилар уюшмаси аъзоси.