АМУДАРЁЛИК ЗУЛФИЯХОНИМ ҚИЗИ МУНОСИБ КУТИБ ОЛИНДИ

Амударёликлар учун бу йилги баҳор ўзгача файз, тароват билан бошланди. Кўнгилларга қувонч улашувчи хушхабарлар билан ҳар бир хонадонга, кўнгилларга баҳорий файз, ҳавас ва ҳаловат бахш этган 8 март – Халқаро хотин-қизлар байрами Аму эли учун қўшалоқ байрамга айланиб кетди. Президентимизнинг Фармонига мувофиқ Амударё туманининг энг чекка, Холимбег қишлоғидаги 35-сонли умумтаълим мактабининг 11-синф ўқувчиси Барнохон Самандарова Зулфия номидаги Давлат мукофоти соҳибаси бўлди. Барнохон эришган бу ютуқ нафақат у таълим олаётган 35-сонли мактаб ўқитувчилар жамоаси ва ўқувчилари, балки барча амударёликларни тўлқинлантириб юборди.

Аму элидан чиққан биринчи Зулфияхоним қизи – Барнохон Самандаровани 8 март – Халқаро хотин-қизлар кунида устозлари, мактабдош дўстлари, ҳамқишлоқлари шод-у хуррамлик билан кутиб олдилар. Барнохон таълим олаётган 35-сонли умумтаълим мактаби ҳовлиси шу куни байрамона безатилиб, тадбирга амударёлик Зулфияхоним қизини юксак давлат мукофот билан табриклаш учун Амударё тумани ҳокими Султонбой Йўлдашев, туман ҳокимлиги масъуллари, Барнохон Самандарованинг ҳурматли устозлари, холимбеглик ота-оналар, ОАВ вакиллари ташриф буюрдилар.

Тантанали маросимни Амударё тумани ҳокими Султонбой Йўлдашев очди ва Барнохон Самандаровани, унинг устозларини, холимбеглик аёл-қизларни 8 март – Халқаро хотин-қизлар куни байрами ҳамда мактаб педагогика жамоасини шогирдлари эришган юксак Давлат мукофоти билан табриклади.

– Барнохон Самандарова бутун Аму элининг фахри. Унинг адабиёт, шеърият бўстонига қўяётган қадамлари янада залворли бўлишига ишонаман. Шу билан бирга Барнохон эришган бу ютуқ бутун Аму элининг иқтидорли қизлари учун ибрат, намуна бўлади ва унинг издошлари сафи янада ошади, – деди Султонбой Йўлдашев ўз табрик нутқида.

Тадбир давомида Султонбой Йўлдашев Барно Самандаровага ва унинг ота-онасига Амударё тумани ҳокимлиги томонидан тайёрланган қимматбаҳо совғаларни топширди.

Шундан сўнг, Барнохоннинг ижоддаги устози, Ўзбекистон ёзувчилар уюшмаси аъзоси, Қорақалпоғистон Республикасида хизмат кўрсатган журналист Робия Йўлдошева, “Баркамол авлод” болалар мактаби директори, Қорақалпоғистон Республикасида хизмат кўрсатган маданият ходими, Ўзбекистон журналистлар уюшмаси аъзоси Хонимжон Ражабова, фахрий устоз Зиёдбой Тангирберганов, 35-сонли мактаб ўқитувчиларидан Тозабой Норимматов, Гуласал Хўжанова ҳамда  Барнохоннинг биринчи ўқитувчиси Лиза Ражабовалар сўзга чиқишиб, Барнохон Самандаровани чин дилдан муборакбод этишди. Айниқса, мактаб ўқувчилари 8 март – Халқаро хотин-қизлар куни байрами арафасида спорт соҳасида ҳам катта ютуқларни қўлга киритганлари хусусида тўлқинланиб сўз юритдилар.

Дарвоқе, 35-сонли мактабда айни пайтда 692 нафар холимбеглик ёшлар таълим-тарбия олишади. Уларнинг билим асосларини пухта эгаллашлари учун 66 нафар малакали педагог ходимлар фидойилик билан меҳнат қилишмоқда. Ўқитувчиларнинг 35 нафари аёл-қизлар бўлиб, 4 нафар ўқитувчи олий, 9 нафари биринчи, 22 нафари иккинчи тоифага эга.

Мактабда таълим-тарбия ишларини замон талаблари даражасида ташкил этиш учун барча шароитлар яратилган. Хусусан, спорт-соғломлаштириш ишлари, ўқувчиларнинг жисмоний фаоллигини оширишга қаратилган чора-тадбирлар туфайли мактаб ўқувчилари орасида турли спорт мусобақаларининг ғолиб ва совриндорлари сафи ошиб бормоқда. Хусусан, 8 март – Халқаро хотин-қизлар байрами арафасида, 3-4 март кунлари Хўжайли шаҳрида бўлиб ўтган спортнинг футзал тури бўйича Қорақалпоғистон Республикаси биринчилиги мусобақаларида мактабнинг футзал жамоаси фахрли 2-ўринни эгаллаб, мусобақанинг Ўзбекистон Республикаси босқичига йўлланмани қўлга киритишди.

Тадбирда сўзга чиққан Барнохон Самандарова Президентимиз билан учрашуви, юксак давлат мукофотини топширишга бағишланган тантанали маросимдан олган ҳаяжонли таассуротлари ҳақида устозларига, мактабдош дўстларига фахрланиб ҳикоя қилди ва янада яхши ўқишга, янги-янги шеърлар ижод этишга, ижод майдонига кириб келаётган қизларни қўллаб-қувватлашга сўз берди.

Меҳмонлари ва устозларининг дил сўзлари, қувончлари билан мароқли ўтган тадбир якунида Барнохон Самандаровани тарбиялаб вояга етказган ота-онаси Тозабой Самандаров ва Райҳон Самандароваларга миннатдорчилик рамзи сифатида туман ҳокими Султонбой Йўлдашев ўз совғаларини ҳадя этди. Ўз навбатида Барнохоннинг ота-оналари кўрсатилаётган ҳурмат ва эътибор учун барчага чин дилдан миннатдорчилик билдирди.

Муяссар Халиллаева.

ЗУЛФИЯ ИЗДОШИ - БAРНОХОН ҚИЗИМ!

Олий мақсад қўйдинг олдингга, қўрқмай,

Ижодга шўнғидинг, баъзан туз тотмай.

Қийинчиликларни енгдинг тап тортмай,

Мукофот муборак, Барнохон қизим,

Шеър-у байтларингда юртингни куйлаб,

Ҳар сатрингга Ватан меҳрини жойлаб.

Самарасин кутдинг неча йил, ойлаб,

Мукофот муборак, Барнохон қизим,

Aзим пойтахт - Тошкент чорлади сени,

Билмасдинг тайёрлаб қўйганин нени,

Aжойиб хабар-хушладинг дилни,

Мукофот муборак, Барнохон қизим,

Устозларинг қутлар, кўзларида ёш,

Сенга ҳавасдадир барча - қари, ёш.

Холимбегнинг фахри сендек қаламқош,

Мукофот муборак, Барнохон қизим,

Ниятингга етгин, Aллоҳ қўлласин,

Юзингдаги табассум асло сўлмасин.

Қалбингда ҳеч қачон армон қолмасин,

Зулфия издоши - Барнохон қизим,

Тозабой Наримматов, 35-сонли мактабнинг география фани ўқитувчиси.