ЗУЛФИЯХОНИМ ТАВАЛЛУДИНИНГ 108 ЙИЛЛИГИГА БАҒИШЛАНГАН КЕЧА ЎТКАЗИЛДИ

Баҳорнинг илк кунида юртимиз бўйлаб шоира Зулфияхоним таваллуди нишонланади. Ўз ижоди ва машаққатли ҳаёт йўли, оқила ҳамда олижаноблиги билан ўзбек аёлларининг ёрқин тимсолига айланган Зулфия Исроилова таваллудининг 108 йиллиги муносабати билан 36-сонли мактабда ҳам маънавий-маърифий кеча ўтказилди.

Мактабнинг ижодий-маданий масалалар бўйича тарғиботчиси О.Худойберганова ҳамда она тили ва адабиёт фани ўқитувчиси У.Жуманиёзовалар томонидан ўтказилган ушбу тадбирда 9-синф ўқувчилари, “Ёш журналистлар” тўгараги аъзолари иштирок этишди.

Суҳбат тарзида ўтказилган тадбир давомида шоира Зулфияхонимнинг беназир шеърияти ҳақида сўз юритилди. Шоиранинг бетакрор истеъдоди, Ватанга муҳаббат, вафо ва садоқат туйғусини, олижаноб инсоний фазилатларни юксак пардаларда тараннум қилган етук бадиий асарлари, ибратли ҳаёти ҳамда ижтимоий фаолияти билан миллий адабиётимиз ва маданиятимиз ривожига, халқимиз маънавиятини юксалтиришга қўшган улкан ҳиссаси эътироф этилди. Ўқувчи-қизлар шоира Зулфия ижодидан парчалар ўқиб бердилар. Шундан сўнг, шоира ҳаёти ва ижодига бағишлаб эссе ёздилар.

Ўқувчилар ўз ижод намуналарида улуғ истеъдод соҳиби бўлган шоира ўз элига сидқидилдан хизмат қилиш баробарида салмоқли асарлари билан ўзбек адабиётида ёрқин из қолдиргани, бир умр ўз ёрига садоқат билан яшаб, "Ҳижрон кунларида", "Ўрик гуллаганда", "Кўрганмидинг кўзларимда ёш?", "Сенсиз", "Излайман" каби шеърларида Ҳамид Олимжонга бўлган чексиз меҳр-у садоқатини, соф севгисини ифода этганлигини тасвирлаб, шоирага бўлган эҳтиромини баён этдилар.

Ёшларда ўз аждодларидан фахрланиш туйғуларини ва уларга муносиб ворис бўлишга интилишни кучайтириш, ватанпарварлик руҳида тарбиялаш мақсадида ўтказилган тадбир барчага манзур бўлди.

Жавлон Ўрозалиев, “Ёш журналистлар” тўгараги аъзоси.