“ЗУЛФИЯХОНИМ ҚИЗЛАРИ” КЎРИК-ТАНЛОВИНИНГ АМУДАРЁ ТУМАН БОСҚИЧИ ЎТКАЗИЛДИ

Мамлакатимизда таъсис этилган Зулфия номидаги Давлат мукофоти баркамол, оқила хотин-қизларни аниқлашда муҳим аҳамият касб этмоқда. Хотин-қизларнинг адабиёт, санъат, спорт, фан ва маданиятни ривожлантиришдаги ютуқлари, ибратли фаолияти, кенг кўламли ислоҳотларни жадаллаштиришдаги фаол иштирокини рағбатлантириш мақсадида ҳар йили ушбу мукофотга муносиб кўрилган номзодлар Зулфия номидаги Давлат мукофоти билан тақдирланиши анъанага айланган.

Ўзбекистон Республикаси Президентининг 2018 йил 29 мартдаги тегишли Фармонига мувофиқ, Зулфия номидаги Давлат мукофотини таъсис этиш бўйича таклифларни қўллаб-қувватлаш тўғрисида”ги Фармонига ўзгартиришлар киритилиб, эндиликда ҳар бир вилоят ва Қорақалпоғистон Республикасидан икки нафардан, 14 ёшдан 30 ёшгача бўлган иқтидорли қизлар 7 та йўналишда ушбу мукофот соҳибаси бўлиш имкониятини қўлга киритишди.

Жорий йилнинг 11 октябрь санасида Амударё туман Хотин-қизлар қўмитаси ташаббуси билан Ўзбекистон Ёшлар иттифоқи туман Кенгаши, Амударё тумани Халқ таълими бўлими ҳамкорлигида анъанавий тарзда ўтказиб келинаётган “Зулфияхоним қизлари” кўрик-танловининг туман босқичи бўлиб ўтди.

9-сонли Болалар мусиқа ва санъат мактаби биносида бўлиб ўтган тадбирда танлов Низомида белгиланган 7 та йўналиш бўйича тумандаги умумтаълим мактабларида таълим олаётган иқтидорли ўқувчи-қизлар, амударёлик турли олий таълим муассасалари талабалари, ўз меҳнат фаолияти билан юқори натижаларга эришаётган 14 ёшдан 30 ёшгача бўлган иқтидорли қизлар иштирок этдилар.

Аввало, шуни алоҳида эътироф этиш керакки, танлов иштирокчиларининг ўз иқтидорларини амалда намоён этишлари учун эркинлик ва холислик муҳити яратилди. Танловнинг адабиёт йўналиши бўйича иштирокчиларнинг ҳужжатлари Ўзбекистон Ёзувчилари уюшмаси аъзоси, Қорақалпоғистон Республикасида хизмат кўрсатган журналист, шоира Робия Йўлдошева раислигидаги ҳакамлар ҳайъати аъзолари томонидан синчиклаб ўрганилиб, номзодларнинг билим ва қобилиятлари синовдан ўтказилди.

Айниқса, бир неча шеърий тўпламларда ижод намуналари чоп этилган иқтидорли ва умидли шоира қизлар – 40-сонли мактаб ўқувчиси Нафиса Ҳамроева, 20-сонли мактаб ўқувчиси Муниса Тожибоева, 3-сонли мактаб ўқувчилари Муҳаббат Ўринбосарова, Навбаҳор Сарсенбоева, 35-сонли мактабнинг иқтидорли ўқувчиси Барно Самандаровалар ўзларининг зукко, билимдон ва интилувчанликларини, намоён этдилар.

Кўрик-танлов давомида Робия Йўлдошева ижодкор ва иқтидорли қизларга “Зулфияхоним қизлари” кўрик-танловининг Низоми ва номзодларга қўйиладиган талаблар ҳақида зарур тушунчалар берди.

Танлов жараёнида очиқлик ва шаффофликни таъминлаш мақсадида йўналишлар бўйича тузилган ҳакамлар ҳайъати томонидан иштирокчи қизлар билан бевосита суҳбатлар олиб борилиб, муносиб номзодлар танлаб олинди.

Шунингдек, Амударё тумани Халқ таълими бўлимининг болаларни ижтимоий-психологик қўллаб-қувватлаш бўйича бўлим услубчиси Татяна Пирлепесова таълим ва жамоатчилик, санъат, спорт йўналишлари бўйича иштирокчи қизлар томонидан тақдим қилинган ҳужжатлар тахламларини тайёрлашга ўта масъулият ва маданиятлилик билан ёндашган иштирокчиларнинг номларини алоҳида тилга олиб, уларнинг келажагига катта ишонч ва умид билдирди.

Кўрик-танлов якунида энг намунали, ибратли хулқ-атвори, билим ва салоҳияти билан кенг жамоатчилик орасида ҳурмат-эътибор қозонган, эришган ютуқлари юқори ташкилотлар ва халқаро танлов ва анжуманларда эътироф этилган иштирокчиларга Амударё туман хотин-қизлар қўмитаси томонидан ташаккурномалар тақдим этилди. Кўрик-танлов Низоми талабларига кўра, муносиб номзодларга танловнинг кейинги босқичига йўлланмалар берилди.

Рисолат ИБРАГИМОВА, 42-сонли мактабнинг ижодий-маданий ишлар бўйича тарғиботчиси.