“ZULFIYaXONIM QIZLARI” KOʻRIK-TANLOVINING AMUDARYo TUMAN BOSQIChI OʻTKAZILDI

Mamlakatimizda taʼsis etilgan Zulfiya nomidagi Davlat mukofoti barkamol, oqila xotin-qizlarni aniqlashda muhim ahamiyat kasb etmoqda. Xotin-qizlarning adabiyot, sanʼat, sport, fan va madaniyatni rivojlantirishdagi yutuqlari, ibratli faoliyati, keng koʻlamli islohotlarni jadallashtirishdagi faol ishtirokini ragʻbatlantirish maqsadida har yili ushbu mukofotga munosib koʻrilgan nomzodlar Zulfiya nomidagi Davlat mukofoti bilan taqdirlanishi anʼanaga aylangan.

Oʻzbekiston Respublikasi Prezidentining 2018-yil 29-martdagi tegishli Farmoniga muvofiq, Zulfiya nomidagi Davlat mukofotini taʼsis etish boʻyicha takliflarni qoʻllab-quvvatlash toʻgʻrisida”gi Farmoniga oʻzgartirishlar kiritilib, endilikda har bir viloyat va Qoraqalpogʻiston Respublikasidan ikki nafardan, 14 yoshdan 30 yoshgacha boʻlgan iqtidorli qizlar 7 ta yoʻnalishda ushbu mukofot sohibasi boʻlish imkoniyatini qoʻlga kiritishdi.

Joriy yilning 11-oktyabr sanasida Amudaryo tuman Xotin-qizlar qoʻmitasi tashabbusi bilan Oʻzbekiston Yoshlar ittifoqi tuman Kengashi, Amudaryo tumani Xalq taʼlimi boʻlimi hamkorligida anʼanaviy tarzda oʻtkazib kelinayotgan “Zulfiyaxonim qizlari” koʻrik-tanlovining tuman bosqichi boʻlib oʻtdi.

9-sonli Bolalar musiqa va sanʼat maktabi binosida boʻlib oʻtgan tadbirda tanlov Nizomida belgilangan 7 ta yoʻnalish boʻyicha tumandagi umumtaʼlim maktablarida taʼlim olayotgan iqtidorli oʻquvchi-qizlar, amudaryolik turli oliy taʼlim muassasalari talabalari, oʻz mehnat faoliyati bilan yuqori natijalarga erishayotgan 14 yoshdan 30 yoshgacha boʻlgan iqtidorli qizlar ishtirok etdilar.

Avvalo, shuni alohida eʼtirof etish kerakki, tanlov ishtirokchilarining oʻz iqtidorlarini amalda namoyon etishlari uchun erkinlik va xolislik muhiti yaratildi. Tanlovning adabiyot yoʻnalishi boʻyicha ishtirokchilarning hujjatlari Oʻzbekiston Yozuvchilari uyushmasi aʼzosi, Qoraqalpogʻiston Respublikasida xizmat koʻrsatgan jurnalist, shoira Robiya Yoʻldosheva raisligidagi hakamlar hayʼati aʼzolari tomonidan sinchiklab oʻrganilib, nomzodlarning bilim va qobiliyatlari sinovdan oʻtkazildi.

Ayniqsa, bir necha sheʼriy toʻplamlarda ijod namunalari chop etilgan iqtidorli va umidli shoira qizlar – 40-sonli maktab oʻquvchisi Nafisa Hamroyeva, 20-sonli maktab oʻquvchisi Munisa Tojiboyeva, 3-sonli maktab oʻquvchilari Muhabbat Oʻrinbosarova, Navbahor Sarsenboyeva, 35-sonli maktabning iqtidorli oʻquvchisi Barno Samandarovalar oʻzlarining zukko, bilimdon va intiluvchanliklarini, namoyon etdilar.

Koʻrik-tanlov davomida Robiya Yoʻldosheva ijodkor va iqtidorli qizlarga “Zulfiyaxonim qizlari” koʻrik-tanlovining Nizomi va nomzodlarga qoʻyiladigan talablar haqida zarur tushunchalar berdi.

Tanlov jarayonida ochiqlik va shaffoflikni taʼminlash maqsadida yoʻnalishlar boʻyicha tuzilgan hakamlar hayʼati tomonidan ishtirokchi qizlar bilan bevosita suhbatlar olib borilib, munosib nomzodlar tanlab olindi.

Shuningdek, Amudaryo tumani Xalq taʼlimi boʻlimining bolalarni ijtimoiy-psixologik qoʻllab-quvvatlash boʻyicha boʻlim uslubchisi Tatyana Pirlepesova taʼlim va jamoatchilik, sanʼat, sport yoʻnalishlari boʻyicha ishtirokchi qizlar tomonidan taqdim qilingan hujjatlar taxlamlarini tayyorlashga oʻta masʼuliyat va madaniyatlilik bilan yondashgan ishtirokchilarning nomlarini alohida tilga olib, ularning kelajagiga katta ishonch va umid bildirdi.

Koʻrik-tanlov yakunida eng namunali, ibratli xulq-atvori, bilim va salohiyati bilan keng jamoatchilik orasida hurmat-eʼtibor qozongan, erishgan yutuqlari yuqori tashkilotlar va xalqaro tanlov va anjumanlarda eʼtirof etilgan ishtirokchilarga Amudaryo tuman xotin-qizlar qoʻmitasi tomonidan tashakkurnomalar taqdim etildi. Koʻrik-tanlov Nizomi talablariga koʻra, munosib nomzodlarga tanlovning keyingi bosqichiga yoʻllanmalar berildi.

Risolat IBRAGIMOVA, 42-sonli maktabning ijodiy-madaniy ishlar boʻyicha targʻibotchisi.