AMU ELIDAGI ZULFIYaXONIM IZDOShI

Prezidentimizning 2023-yil 6-mart kungi qaroriga koʻra tumanimizdagi 35-sonli maktabning 11-sinf oʻquvchisi Samandarova Barno Tozaboy qizi Zulfiya nomidagi Davlat mukofoti bilan taqdirlandi.

Mashaqqatli ijod maydoniga ilk qadam qoʻyayotgan murgʻak koʻngilli shoir-u shoiralarning koʻngil kechinmalariga oshno inson sifatida mamnuniyat bilan ayta olamanki, Amudaryoday joʻshqin tabiatli aziz xalqim orasida nozik didli, oʻtkir salohiyatli, bilimdon, sheʼriyatga ixlos va hurmati baland yoshlar bisyor. Barnoxon Samandarova ana shunday navnihol, pokiza dil, salohiyatli yoshlardan biri. U ilk sheʼrini tahririyatga olib kelganida 10 yashar qizaloq edi. Shunchaki havaskor boʻlib tuyulgan bu qizaloq oʻqib-oʻrganishdan, izlanishdan aslo charchamaydigan, bilmaganini soʻrashdan aslo toʻxtamaydigan oʻta tirishqoqligi bilan mehrimni qozondi.

U shunchaki qogʻoz qoralamasdi, hayotni, turfa xulq-atvorli odamlarni kuzatish, dunyoqarashini boyitish orqali ijodda oʻz uslubiga ega boʻlish uchun intildi. Ana shu intilishlari Barnoxonga mohiyatan goʻzal tuygʻular ato etdi, fikri teranlashdi, ijod mashaqqatini zimmasiga olib, bu mashaqqatlardan zavqlangan sari yangi-yangi, biri-biridan goʻzal sheʼrlar ijod etdi.

Biz Barnoxon bilan har bitta soʻz, har bir satr sheʼr qadrini oshirish yoʻlida birga izlandik. Har gal sheʼrlar toʻla daftarlarini koʻtarib tahririyatga kelganida sheʼriy talablar, ijodkorlik masʼuliyati, soʻz yukini chin yurakdan his etish borasida jiddiy mashgʻulotlar oʻtkazdik. “Taraqqiyot koʻzgusi” gazetasi tahririyati,  “Jayxun ilhomlari” NNT Barnoxonning haqiqiy ijod uyiga, ijodiy jamoa esa uning fidoyi oʻqituvchilariga aylandi.

U nafaqat Amudaryo tumani, balki Qoraqalpogʻiston Respublikasi, Xorazm  viloyati miqyosida oʻz ijodi, hatto jamoatchilik faoliyati bilan tanildi. U xalqaro bolalar UNICEF tashkilotining U-Report yoʻnalishi boʻyicha reportyori sifatida yoshlarni turli oqimlardan himoya qilishga qaratilgan, ijtimoiy faollikka daʼvat etuvchi maʼruzalar oʻqidi. Oʻzi taʼlim olayotgan 35-sonli maktabda esa tengdoshlariga oʻrnak, namunali lider oʻquvchiga aylandi.

U Vatanga munosib farzand, ijodda Zulfiyaxonimning sodiq izdoshi boʻlishdek ezgu orzu ogʻushida yashadi va maʼnaviyat boʻstoniga bir azim daraxtdek ildiz qoʻyishga intildi. Ana shu  ezgu orzusi yoʻlida jurʼat bilan amudaryolik ijodkor qizlar qatori “Zulfiya qizlari” koʻrik-tanlovining tuman va Qoraqalpogʻiston Respublikasi bosqichlarida muvaffaqiyatli ishtirok etdi. Barnoxon Samandarovaning nomzodi Zulfiya nomidagi davlat mukofotiga loyiq koʻrilgani haqidagi Prezident Farmoni barchaga xushnudlik baxsh etdi.

Barnoxon Samandarova oʻz ijodi bilan  el-yurt, ustozlari ishonchini oqladi va men bundan cheksiz quvonchdaman.

Barnoxon qizimga, Amu elining birinchi Zulfiyaxonim qiziga ijodiy parvozlar tilayman. Mukofot muborak boʻlsin, shoira qizim!

Robiya YOʻLDOShEVA, Oʻzbekiston Yozuvchilar uyushmasi aʼzosi.