“ХАВФСИЗ ҲАЁТ УЧУН!” ШИОРИ ОСТИДА ВЕЛОМАРАФОН ЎТКАЗИЛДИ

Дунёнинг турли бурчакларида уруш-низолар, давлатлараро муносабатларда зиддиятлар кучаяётган бугунги кунда ёшларнинг онг-шуурини, тафаккурини тўғри шакллантириш, уларни ҳам руҳан, ҳам жисмонан баркамол қилиб вояга етказиш долзарб вазифага айланган. Чунки келажак – ёшларники. Уларни ўз Ватанига содиқ, ота-онаси, оиласи, чор-атрофидаги одамларга меҳрли, эл хизматига камарбаста, фидойи қилиб вояга етказиш – юртимиз тинч-осуда, обод, фаровон бўлишини таъминлайди.

Илмли, интилувчан, юртига хизмат қилишга шай авлодни вояга етказишда, уларни ёт ғоялардан, иллатлардан асрашда соғлом турмуш тарзининг ўрни алоҳидадир. Соғлом турмуш тарзи жисмоний фаоллик билан узвий боғлиқ.

Шуларни инобатга олган ҳолда Амударё тумани ҳокимлиги, Ёшлар ишлари агентлиги туман бўлими Ички ишлар бўлими ва туман Болалар-ўсмирлар спорт мактаби ҳамкорлигида “Хавфсиз ҳаёт учун!” шиори остида веломарафон ўтказилди.

Аслини олганда баҳор фаслининг ажиб таровати, она замин бағридан майсаларнинг униб чиқиш-ю чор-атрофимизни қуршаган дов-дарахтларнинг яшил либос кийиб, табиатнинг ўзгача кўркамлик кашф этиши киши кўнглига ажиб бир масрурлик бахш этади, ҳар бир куни қутлуғ кундай, байрамдай таассурот уйғотади одамда.

Ана шундай шукуҳли дамларда туманимизнинг барча овул ва маҳаллаларидан келган 700 нафардан ортиқ ёшларни, ўсмирларни бирлаштирган веломарафон ҳам ҳақиқий шодиёнага айланиб кетди. Бир сафга тизилган мусобақа иштирокчиларини туман Ички ишлар бўлими бошлиғи Жалоладдин Юсупов, йўл ҳаракати хавфсизлиги бўлими бошлиғи Мурат Мирзамуратов, Ёшлар ишлари агентлиги туман бўлими бошлиғи Сардор Исмоилов, Болалар-ўсмирлар спорт мактаби директори Чоршам Тожимуродовлар ғолиблик учун куч синашишга келганликлари билан қутлади.

“Хавфсиз ҳаёт учун” шиори остида соғлом турмуш тарзи тамойиллари асосида жисмоний баркамоллигини намойиш этишга чоғланган велоспорт ишқибозларига муваффақиятлар тиладилар. Мусобақага старт берилиши ёшларнинг шодон қийқириқлари билан олқишланди. Веломарафончилар Ўрта қалъа овулининг “Вахум” аҳоли пунктидан Дўстлик маҳалласи ҳудудига – туман ҳокимлиги биносигача бўлган йўлда ғолиблик учун ўзаро беллашдилар.

Энг чаққон, энг интилувчан велосипедчиларнинг марра чизиғига етиб келиши қарсаклар билан олқишланди.

Веломарафон ғолиблари шу ернинг ўзида тақдирланди. Уларни туман ҳокими Султонбой Йўлдошев, Ички ишлар бўлими бошлиғи Жамоладдин Юсуповлар қизғин қутладилар ва барча иштирокчиларга ҳам миннатдорчилик билдирдилар.

Веломарафон ғолибларига мусобақа ташкилотчиларининг қимматбаҳо совғалари топширилди.

“Хавфсиз ҳаёт учун!” Ушбу шиорнинг ўзи барча иштирокчиларга кўтаринки кайфият ва мотивация берди, соғлом, хавфсиз ҳаёт кечиришга рағбатлантирди.

Ойгул РАЖАБОВА.