9 апрель — Қорақалпоғистон Республикаси Конституцияси қабул қилинган кун муносабати билан Амударё туманида байрам тадбири ўтказилди

Бундан 30 йил олдин, аниқроғи, 1993 йил 9 апрель куни XII чақириқ Қорақалпоғистон Республикаси Олий Кенгашининг XII сессиясида Қорақалпоғистон Республикаси Конституцияcи қабул қилинган эди. Амударё туманида ҳам ушбу сана ҳар йили юқори савияда ва кўтаринки руҳда нишонланади.

8 апрель куни туман Маданият бўлими биносида бўлиб ўтган байрам тадбирида туман ҳокими Султонбой Йўлдашев, депутатлар, секторлар раҳбарлари, ҳоким ўринбосарлари, туман ҳокимлиги, муассаса, корхона ва ташкилотлар масъуллари, фуқаролар йиғинлари раислари, таълим соҳаси илғорлари, кенг жамоатчилик вакиллари ҳамда оммавий ахборот воситалари вакиллари иштирок этди.

Саҳнада ўрнатилган экранда мамлакатимизда, хусусан Қорақалпоғистонда турли соҳаларда эришилаётган ютуқлар акс этган роликлар намойиш этилди. Тадбир иштирокчилари кўз ўнгида юртимизда амалга оширилаётган ислоҳотлар, улкан ўзгаришлар, ёшларнинг билим олиши, аҳолининг фаровон турмуш кечириши учун яратилаётган шароит ва имкониятлар намоён бўлди.

Тадбир аввалида Ўзбекистон ва Қорақалпоғистон Республикаларининг давлат мадҳиялари янгради.

Шундан сўнг туман ҳокими Султонбой Йўлдашев юртдошларимизни Қорақалпоғистон Республикаси Конституцияси қабул қилинганининг 30 йиллиги билан самимий муборакбод этиб, халқимиз ҳаётини янада обод ва фаровон қилиш, юртимизда яшаётган миллати, тили ва динидан қатъий назар, ҳар бир инсонга эътибор ва ғамхўрлик кўрсатиш – Конституциямизнинг бош мақсади эъканлигини эътироф этди. Шунингдек, бош қонунимизни чуқур ўрганиш, англаш, ҳаётга жорий этиш ва унга сўзсиз амал қилиш – барчанинг шарафли бурчи эканлигини таъкидлади.

Шундан сўнг тадбирда туманимизнинг таниқли ва хушовоз санъанткорлари томонидан она Ватан мадҳи тараннум этилган гўзал куй-қўшиқлар янгради. Айниқса, 21-сонли Болалар мусиқа ва санъат мактаби оркестр жамоаси ижросидаги “Қорақалпоқ сьюитаси” куйини барча мароқ билан тинглади.

Шунингдек, туманимизнинг таниқди эстрада юлдузлари томонидан ижро этилган Қорақалпоқ тилидаги “Мақтанишим”, “Жолдимсиз”, “Қарақалпақ жаслари” қўшиқлари, “Ёш китобхон оила” танловининг Республика босқичи ғолиби Умидбек Ўринбоев ҳамда “Зулфия” номидаги Давлат мукофоти соҳибаси Барно Самандарова томонидан биргаликда ижро этилган “Референдумга чорлаймиз” қўшиғи йиғилганлар қалбида ўзгача ғурур ва ифтихор уйғотди.

Байрам тадбирида ўзбек ва қорақалпоқ халқининг азалий дўстлиги, тинч-тотув яшаб келаётганилиги гўзал куй-қўшиқлар ва рақслар орқали тараннум этилди.

Бахтимиз қомуси бўлган Конституциямизда ҳам миллати, тили ва ижтимоий мавқеидан қатъий назар барча юртдошимизнинг тенг ҳуқуқли этиб белгилаб қўйилгани юртимизнинг буюк келажаги ва халқимиз фаровон турмушининг ҳуқуқий асоси бўлиб хизмат қилади.

Туман ҳокимлигининг Ахборот хизмати.