1-СОНЛИ МАКТАБДА ҚУШЛАР БАЙРАМИ ЎТКАЗИЛДИ
Табиатнинг энг фусункор фасли бўлган баҳор ойларида йилнинг энг гўзал ва завқли байрамлари ўтказилади. Инсонларни она табиатга янада яқинлаштирадиган ана шундай байрамлардан бири бу – Қушлар байрамидир.
26 апрель куни 1-сонли мактабда ўқувчи-ёшлар ўртасида атроф муҳитга, табиатга ва ҳайвонот оламига меҳр-муҳаббат туйғуларини уйғотиш, табиат ва қушлар, ҳайвонот дунёсига оид билимларини намойиш этишга имконият яратиш мақсадида “Қушлар байрами” ўтказилди. Мактабнинг бошланғич синф ўқитувчилари томонидан ташкил этилган ушбу байрамда ўқувчилар ва уларнинг ота-оанлари ҳам фаол иштирок этишди.
Тадбир муносабати билан мактаб ҳовлиси ва фойесида Амударё туманининг бетакрор табиатига мансуб гўзал манзара яратилди. Табиатнинг ўзига хос ноёб вакиллари бўлган ўсимликлар олами, ўқувчилар томонидан етиштирилган гуллар, уй шароитида парвариш қилинаётган қушлар, тасвирий санъат намуналаридан кўргазмалар ташкил этишди. Ўзига хос экологик байрам сифатида ўтказилган тадбирда ўқувчиларнинг табиатни асраш, яшил олам вакиллари ҳамда қанотли дўстларига бўлган муносабати чизган расмлари, шеърлари, тайёрлаган плакатлари орқали акс эттирилди. Турфа гуллар ва қушлардан иборат бўлган кўргазмада ўқувчилар табиатга яқинлик, жониворларга ғамхўрликларини намойиш қилишди. Тадбир давомида табиат ва экология борасида олинаётган билимлар юзасидан савол-жавоб ҳам ўтказилди. Шунингдек, ўқувчилар билан инсон ва табиат муносабатлари, ҳудуд экологияси, давлатимиз томонидан атроф-муҳитни асрашда амалга оширилаётган ишлар, ҳозирги глобаллашув жараёнида табиат, жумладан, қушларни асрашда юзага келаётган муаммолар ҳақида суҳбатлар ўтказди. Суҳбатларда ўқувчилар ўзлари уйда парваришлаётган уй ҳайвонлари, гуллар ва юртимизда учрайдиган қушлар турлари ҳақида сўзлаб беришди.
“Қушлар байрами”да ўқувчилар экологиямизда учраётган муаммолар, уларни бартараф этиш йўллари саҳна кўринишлари орқали намойиш этишди. Ўқувчилар ўз ижролари орқали табиатга бўлган дўстона муносабатини, актёрлик маҳоратини ҳам намойиш этишди.
Таъкидлаш жоизки, ўсиб келаётган авлоднинг экологик маданиятини, билим ва масъулиятини мунтазам ошириб бориш, уларнинг атроф-муҳит ҳамда инсон саломатлиги муҳофазаси масалаларида иштирокини фаоллаштириш она табиатга меҳр-муҳаббат руҳида камол топтириш хизмат қилади. Ўқувчилар тадбир давомида Қорақалпоғистон ҳудудидаги кўллар ва сув ҳавзалари атрофида ўлкамизда доимий яшовчи ҳамда мавсумий қўниб ўтувчи қушларнинг халқаро ва республикамиз «Қизил китоб»ларига киритилган кўплаб турлари учрашини, айни пайтда ушбу кўлларда учрайдиган турлар муҳофазасини кучайтириш, улар сонини кўпайтириш мақсадида муайян ишлар амалга оширилаётгани, уларни асраб-авайлаш, қушларнинг табиатдаги ўрни ҳақида кўплаб маълумотларни билиб олишди.
Табиатга меҳр болаликдан уйғонади. Тадбирда ўқувчилар ўзгача иштиёқ билан иштирок этишди. Бу орқали мактабнинг бошланғич синф ўқувчилари орасида табиатга меҳри баланд ўғил-қизлар улғаяётгани, улар кўпчиликни ташкил этиши яққол намоён бўлди. Бўлиб ўтган тадбир ўқувчиларнинг юртимиз табиатини ўрганишларида, уни янада севишларида катта аҳамиятга эга бўлди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
