Қорақалпоғистон Республикаси Вазирлар Кенгаши Раисининг сайёр қабули бўлиб ўтди

Инсон манфаати – олий қадрият. Мамлакатимизда амалга оширилаётган ислоҳотлар негизида айни мақсад устувор ўринга қўйилаётгани жойлардаги ўзгаришларда яққол сезилмоқда. Бинобарин, одамларни рози қилиш, уларнинг ҳуқуқ ва манфаатлари ҳимояси йўлидаги саъй-ҳаракатлар амалий натижасини бермоқда.

Айниқса, аҳоли муаммоларини ечишнинг мутлақо янги, самарали тизимини яратиш мақсадида юқори даражадаги давлат органлари раҳбарларининг халқ орасига кириб, муаммоларни жойида ўрганиш ва ҳал қилишида муҳим восита бўлаётган оммавий сайёр қабуллар оддий одамлар ҳаётида муҳим ўрин тутмоқда.

Буни жорий йилнинг 28 апрель куни Амударё туманининг Қипчоқ шаҳарчасидаги 21-сонли Болалар мусиқа ва санъат мактабида ўтказилган сайёр қабул ҳам яна бир карра тасдиқлади.

Қорақалпоғистон Республикаси Вазирлар Кенгаши Раиси Фарҳод Эрманов раислигида бўлиб ўтган сайёр қабулда туман ҳокими Султонбой Йўлдашев, Вазирлар Кенгаши раисининг ўринбосари Шуҳрат Даулетияров, секторлар раҳбарлари, туман ҳокими ўринбосарлари, тегишли корхона, ташкилотлар раҳбарлари ҳамда турли мавзудаги мурожаатлар билан туманнинг овул ва маҳаллаларидан келган аҳоли вакиллари иштирок этишди.

Сайёр қабулда 20 нафардан ортиқ фуқаролар ўзларини қийнаб келаётган муаммолари ҳамда таклифлари билан мурожаат қилди. Мурожаатлар асосан, кредит олиш, соғлигини тиклаш учун маблағ ажратиш, йўлларни таъмирлаш, ичимлик суви тармоғини тортиш, бандлик, футбол майдончаси қуришда амалий ёрдам берилишини ва бошқа масалаларда бўлди.

Шу ўринда айтиш керакки, одамларни рози қилиш бугун давлатимиз сиёсатининг бош мақсади ҳисобланади. Халқимизни кўп йиллардан буён ўйлантириб, ташвишга солиб келаётган муаммоларга ечим топилиб, юртдошларимизнинг фаровон турмуш кечириши учун бор имкониятлар ишга солинмоқда.

Сайёр қабулда юртимизда амалга оширилаётган кенг кўламдаги бунёдкорлик ишлари, янгидан ишга туширилаётган тадбиркорлик субъектлари, ишлаб чиқариш ва хизмат кўрсатиш корхонлари фақатгина халқ манфаатини таъминлаш, уларнинг яшаш шароитни яхшилаш мақсадида амалга оширилаётганлиги таъкидланди.

Шунингдек, Президентимиз Қорақалпоғистонга ҳар галги ташрифида жуда катта янгиликлар билан келиши, катта миқдорда ажратилаётган маблағлар маҳаллалар инфратузилмасини яхшилашга, йирик инвистицион лойиҳаларни ишга туширишга сарфланаётгани ва буни халқимиз ўзининг фаровон ҳаётида тўлақонли ҳис этиб яшаётганлиги айтиб ўтилди.

Сайёр қабулда мурожаатларинг ҳеч бири эътибордан четда қолмади ва ҳар бир мурожаат имкон қадар ижобий ечимини топиши таъкидланди.

Амалий натижалари билан аҳамиятли бўлган тадбирда аксарият мурожаатлар жойида ҳал этилди. Ечимига вақт талаб қиладиган муаммолар юзасидан масъул шахсларга топшириқлар берилди. Шунингдек, мурожаатчиларга баъзи масалаларда ҳуқуқий тушунтиришлар берилиб, таклифлар эса ўрганиб чиқиш учун қабул қилинди.

Бугунги кунда юртимизнинг барча ҳудудларида “Халқ давлат идораларига эмас, балки давлат идоралари, раҳбарлар халққа хизмат қилиши керак” тамойили асосида ўтказилаётган бу каби сайёр қабуллар аҳоли муаммолари ҳал бўлишида асосий омил бўлиб хизмат қилмоқда.

Туман ҳокимлигининг Ахборот хизмати.