БОШЛАНҒИЧ СИНФЛАР ЎҚУВЧИЛАРИГА БЕРИЛАЁТГАН ЕНГИЛ НОНУШТА ТАЙЁРЛАНИШИ, ТАРҚАТИЛИШИ НАЗОРАТ ҚИЛИНМОҚДА

Ўзбекистон Республикаси Президентининг “2022-2026 йилларга мўлжалланган Янги Ўзбекистоннинг тараққиёт стратегияси тўғрисида”ги 2022 йил 28 январдаги Фармонига мувофиқ Қорақалпоғистон Республикаси ва Хоразм вилоятидаги бошланғич синф ўқувчиларини босқичма-босқич бепул овқат билан таъминлаш тизимини йўлга қўйиш белгиланган эди. Бу борада Вазирлар Маҳкамасининг 2022 йил 25 августдаги 472-сонли қарори қабул қилинди. Ушбу қарор ижроси юзасидан Амударё туманида ҳам муайян ишлар қилинмоқда. Мавжуд 85 та умумий ўрта таълим мактабларининг 1-4 синфлари ўқувчиларини бепул овқатлантириш ташкил этилган ва ҳозирги кунга қадар давом эттирилмоқда.

Тумандаги 85 та мактабларда таҳсил олаётган жами 14 минг 769 нафар бошланғич синф ўқувчиларига 4 та тадбиркорлик субъекти томонида енгил нонушта етказлиб берилмоқда. “Шохнур Aзатович”, “Наврўз”, “Манғит милк”, “Табассум” масъулияти чекланган жамиятлари шулар жумласидандир. 

“Шохнур Aзатович” масъулияти чекланган жамияти томонидан 13 та,  “Наврўз” масъулияти чекланган жамияти томонидан 29 та, “Манғит милк” масъулияти чекланган жамияти томонидан 14 та ҳамда “Табассум” масъулияти чекланган жамияти томонидан 29 та умумтаълим мактабларининг бошланғич синф ўқувчилари ўз вақтида ва сифатли енгил нонушта билан таъминланмоқда.

1-4-синфлар ўқувчиларини кейтеринг усулида соғлом овқатлантириш мақсадида тумандаги 85 та мактабларнинг ошхоналарида ва синф хоналарида санитария ва гигиена қоидалари, нормалари ҳамда талабларига мос шарт-шароитлар яратилган. Бу борада мактабларда махсус комиссиялар ташкил қилинган бўлиб, махсус комиссия таркибига шу мактабнинг директори, ҳамшираси, маънавий-маърифий ишлар бўйича директор ўринбосарлари, мактабнинг амалиётчи психологи ва синф раҳбарлари ҳамда ота-оналар вакиллари киритилган. Улар кунлик ҳисоботларини, 1-4-синф ўқувчилар давоматини туман Халқ таълими бўлимига ҳар куни бериб боради ва ҳисоботлар умумлаштирилиб, kundalik.cом тизими билан солиштирилиб, Қорақалпоғистон Республикаси Халқ таълими вазирлигига етказилади.

Бундан ташқари, умумий ўрта таълим мактабларининг бошланғич синф ўқувчиларини кейтеринг усулида бепул овқатлантиришнинг стандарт талабларига мослигини кундалик кўрикдан ўтказиб бориш мақсадида туман ҳокимлигининг баёни асосида ишчи гуруҳ тузилган.

Ишчи гуруҳ таркибига туман ҳокимининг биринчи ўринбосари, туман мактабгача ва мактаб таълими бўлими бошлиғи, туман Тиббиёт бирлашмаси бошлиғи, туман санитария-эпидемиологик осойишталик ва жамоат саломатлиги бўлими бошлиғи, Истеъмолчилар ҳуқуқларини ҳимоя қилиш жамиятлари федерацияси туман бўлими бошлиғи ҳам киритилган.

Улар мунтазам равишда ўқувчиларга берилаётган озиқ-овқат маҳсулотларининг белгиланган талабларга мослиги, озиқ-овқат маҳсулотларининг санитария-гигиена талаблари ҳамда таомномага мослигини ва миқдорларини кўрикдан ўтказдилар.

Шуни эътироф этиш керакки, ўқувчиларга сифатли енгил нонушта тайёрлаш ва етказиб беришда “Наврўз” масъулияти чекланган жамияти базаси Қорақалпоғистон Республикасида энг намунали база деб топилди. Бу ерда туманимиздаги 30 та мактабнинг 4983 нафар бошланғич синф ўқувчиларига кейтеринг усулида енгил нонушта тарқатиб келинмоқда. Таомномадаги озиқ-овқат маҳсулотларининг 60 фоизи шу ерда ишлаб чиқарилади ва шу куннинг ўзида қадоқланиб, 30 та мактабга етказиб берилмоқда.

Ўтказилган назорат тадбирлари давомида ишчи гуруҳ аъзолари 1-4 синфлар ўқувчиларига берилаётган енгил нонушта маҳсулотларининг тайёрланиши ва тарқатилишини кўздан кечириб, тегишли хулосалар бериб бормоқдалар.

Болалар – келажагимиз. Уларнинг жисмонан ва маънан соғлом бўлиб улғайиши кўп жиҳатдан соғлом ва сифатли овқатланишига ҳам боғлиқ. Шундай экан, бу борада назорат ўрнатиш нафақат масъул идораларнинг, балки кенг жамоатчиликнинг ҳам вазифаси бўлмоғи керак.