“Тараққиёт кўзгуси” газетаси таҳририяти: 2014 йил сарҳисоби

Мана, 2014 йилни тарих сари кузатганимизга ҳам 1 ойча вақт бўлди. Хўш, ўтган йилда таҳририятимиз қандай ютуқларга эришди?

2014 йил таҳририятимиз учун эсда қоларли воқеаларга бой йиллардан бири бўлди.

5 март куни Қорақалпоғистон Республикаси Матбуот ва ахборот агентлигида "Тараққиёт кўзгуси” газетасининг иловаси – "Менинг оилам” газетаси рўйхатдан ўтказилиши туманимиз ижтимоий ҳаётидаги муҳим янгилик бўлди. Аму элининг зиёли халқи яна бир маънавият сарчашмасига эга бўлишди. 2015 йилдан бошлаб "Менинг оилам” газетаси ойига 1 марта 2 босма табоқ ҳажмда ўқувчилар қўлига етиб бормоқда. Энг муҳими, обуна нархлари минимал миқдорда белгиланди. Иккала газетани қўшганда йиллик обуна баҳоси 52 минг сўмни ташкил қилди.

2014 йил 27 июнь куни матбуот ва оммавий ахборот воситалари ходимлари кунида Қорақалпоғистон Республикаси миқёсида газетамизнинг 80 йиллик юбилейи нишонланди.

15 июлдан 15 августгача 1 ой давомида туманимизда мустақилликни мустаҳкамлаш ва миллий истиқлол ғояларини тарғиб қилишда "Тараққиёт кўзгуси” газетасининг ўрни ва аҳамияти” мавзусида тарғибот ойлиги ўтказилди. Ойлик доирасида туман ҳокимлиги ва Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди ҳамкорлигида "Оммавий ахборот воситаларини қўллаб-қувватлашга доир кафолатларнинг соҳа ривожидаги аҳамияти” мавзусида Республика семинари ўтказилди ва ойлик якунида газетамизнинг 80 йиллиги туман миқёсида кенг нишонланди.

2014 йилда таҳририятимиз учун яна бир қувончли воқеа – "Тараққиёт кўзгуси”, "Менинг оилам” газеталари ҳамда amunews.uz веб-сайти таҳририятлари Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фондининг танловида иштирок этиб, ҳар бирига 14 миллиондан, жами 42 миллион сўм миқдорида давлат гранти ажратилди.

Таҳририятлар томонидан қишлоқ жойларида тадбиркорликни ривожлантиришга кўмаклашиш, ёшларни миллий анъана ва қадриятларга садоқат руҳида тарбиялаш ҳамда аҳолининг экологик маданиятини ошириш каби йўналишларда қатор лойиҳалар амалга оширилмоқда. Шу билан бирга грант маблағи ҳисобига ходимларимизнинг ойлиги анча оширилди, ҳар бир ижодий ходимнинг иш хонасига мебел жамланмаси, персонал компьютер ва офис жиҳозлари харид қилинди.

Туман ҳокимининг қўллаб-қувватлаши натижасида таҳририятимизнинг молиявий аҳволи яхшиланиб бормоқда. Масалан, 2012 йилда газетамиз 2450 нусхада босилган бўлса, 2013 йилда 4700, 2014 йилда 5200, 2015 йил 1 январдан бошлаб эса 7200 нусхада чоп қилинмоқда.

Таҳририятнинг молиявий аҳволи яхшиланиши натижасида 2013 ва 2014 йилларда 2 та хизмат автомашиналарини харид қилдик. Натижада газетамизнинг ҳар бир сони ҳар ҳафтада туманнинг барча ҳудудларидаги ўқувчиларга газета чоп қилинган кунда, график бўйича белгиланган вақтда етказиб берилмоқда.

Шу пайтгача газетамизнинг асосий обуначилари бюджет ташкилотлари ишчилари ҳисобланар эди. 2015 йил учун обуна кампанияси даврида овул ва маҳаллалардаги уюшмаган аҳолини газета обунасига жалб қилиш мақсадида "Фуқаролар йиғинларига молиявий ёрдам” акциясини ўтказдик. Акция шарти – фуқаролар йиғинлари ўз ҳудудидаги аҳолидан 70 та йиллик обуна тўпласа, таҳририят томонидан унга ноутбук совға қилинади. Натижада бугунги кунгача 10 та фуқаролар йиғинларига жами қиймати 15 миллион сўмлик 10 та ноутбук, 1.8 миллион сўмлик 10 та телефон аппаратлари берилди. Фуқаролар йиғинлари томонидан 1500 дан ортиқ обуна уюштирилди. Бу орқали нафақат газетамизнинг обунаси ошди, балки унинг тарқалиш географияси кенгайди, овул аҳолисининг туман янгиликларидан хабардор бўлиш имконияти пайдо бўлди ва фуқаролар йиғинларининг моддий-техника базаси яхшиланди.

Обунанинг кўпайиши ва ишлаб чиқариш харажатларини қисқартириш орқали газетанинг даврийлигини ошириш ва таннархини камайтиришга эришмоқдамиз. Газетамиз 2013 йилдан бошлаб ойига 3 марта, 2014 йилдан бошлаб 4 марта ва 2015 йилдан бошлаб ойига 5 босма табоқ ҳажмда чоп қилинмоқда. 2012 йилда 1 босма табоқ ҳажмдаги газетанинг обуна бўйича нархи 1250 сўм эди. 2015 йилда бу кўрсаткич 867 сўмни ташкил қилди. Бу 2012 йилга қараганда обуна нархининг 30 фоиз арзонлашганини билдиради.

Ўтган 2014 йилнинг яна бир муҳим янгилиги – "Давлат ҳокимияти ва бошқаруви органлари фаолиятининг очиқлиги тўғрисида”ги қонунга асосан туман ҳокимлигининг ахборот хизмати ташкил қилинди. Декабрь ойидан иш бошлаган ахборот хизматида 5 киши иш юритади, унинг асосий вазифаси туман ҳокимлиги раҳбарияти томонидан белгиланадиган ахборот сиёсатини шакллантириш ва амалга оширишда қатнашиш, маҳаллий ва республика, мамлакат оммавий ахборот воситаларида туман ҳокимлиги фаолиятининг долзарб жиҳатларини ёритишдан иборат. Қолаверса, таҳририятнинг amunews.uz веб-сайтида 2015 йилдан бошлаб видео-янгиликлар хизмати йўлга қўйилгани ҳам бу борада муҳим янгилик бўлди. Эндиликда веб-сайт орқали туман ҳаётига оид нафақат мақола ва фотолавҳалар, балки видеолавҳалар билан ҳам танишиш мумкин. Бу эса интернет тармоғида Амударё туманининг бугунги ҳаётини янада тўлароқ ёритиш имкониятини бермоқда.

Давлат органлари фаолиятининг очиқлигини таъминлаш мақсадида туман ҳокими томонидан ОАВ ходимлари учун матбуот анжуманлари ўтказиш режаси тасдиқланди. Унга кўра, туман ҳокимлиги ва тегишли бўлимлар ҳар ойда навбатма-навбат журналистлар учун матбуот анжуманларини ўтказадилар. Албатта, бу каби ишлар жамоатчиликнинг туманда амалга оширилаётган ишлардан хабардорлигини оширишга хизмат қилади.

Ҳаммасидан ҳам муҳими – туманимиз аҳли нафақат "Тараққиёт кўзгуси” ва "Менинг оилам” газеталарини ўқимоқда ва веб-сайтимизга ташриф буюрмоқда, балки, бизга хат ёзмоқда, ўз фикрларини билдирмоқда. Бу – биз ижодкорлар учун катта шараф ва юксак масъулият. Ана шу масъулиятни чуқур англаган ҳолда, Сизнинг учун изланишда ва ижод қилишда давом этамиз, азиз муштарий!

Таҳририят.