83-сонли мактабда ўқувчиларнинг тасвирий санъат асарлари кўргазмаси ўтказилди

Санъатнинг турлари жуда кўп. Мусиқа, кино, театр, хореография, тасвирий санъат ва бошқалар шулар жумласидандир. Борлиқни тасвирий образларда, шаклларда, фазовий кенгликда ёки текисликда акс эттирадиган санъат, яъни тасвирий санъат асрлар оша ўз ихлосмандларига эга бўлиб келган.

Ўқувчиларнинг эстетик идроки, диди, мазкур соҳага доир тушунчалари, тасаввур ва хотираларни ўстиришда мазкур санъат тури муҳим роль ўйнайди. Борлиқни идрок этиш машғулотлари табиатдаги ва теварак-атрофдаги нафислик ва гўзалликни кўра билишдан бошланади. Шунинг учун ҳам тасвирий санъат ўқитувчилари мактабларда ўқувчиларни ушбу фанга қизиқтириш ва уларнинг истеъдодларини рўёбга чиқаришга катта эътибор қаратишади.

Ўқувчилар ўзларининг борлиқ ҳақидаги тасаввурларини, кўз ўнгидаги содир бўлаётган воқеаларни, нарса ва буюмларни турли кўз қарашда ва тасвирий санъатнинг турли жанрларида тасвирлаб беришади. Улардаги бор истеъдод ва қобилятни юзага чиқариш ҳамда ривожлантиришда мактабгача ва мактаб таълими тизимида ўтказалиб келинадиган тасвирий санъат асарлари кўргазмаси, турли хил беллашувлар муҳим аҳамият касб этади.

Шунингдек, ўқувчиларни тасвирий санъатга ошно қилиб, унинг сир-асрорларини пухта ўргатиш тасвирий санъат ва чизмачилик фани ўқитувчилари зиммасига ҳам катта масъулият юклайди.

Амударё тумани Мактабгача ва мактаб таълими бўлимига қарашли 83-сонли мактабда 12-15 ёшли ўқувчилар ўртасида мана шундай кўргазма ташкил этилди.

Кўргазманинг ташкил этилишда шу мактабнинг тасвирий санъат ва чизмачилик фани ўқитувчиси Нафиса Аминбаеванинг хизматлари катта бўлди. У ўз ўқувчилари билан дарс машғулотларидан бўш пайтларида алоҳида шуғулланиб, уларга ўзининг бор билимларини беришга ҳаракат қилиб келмоқда.

Кўргазмада 12-15 ёш оралиғидаги ўқувчилар тасвирий санъатнинг пейзаж, натюрморт, мозаика, каби жанрларида яратган асарларини иштирокчилар эътиборига ҳавола қилишди.

Ўқитувчи Нафиса Аминбоева ўқувчиларнинг бўш вақтини мазмунли ташкил этиш, истеъдодларини ривожлантириш мақсадида дарсдан ташқари тўгараклар ташкил этиб, улар билан мунтазам шуғулланиб келади. Айни пайтда тўгаракка юқори синф ўқувчиларининг 15 нафари, бошланғич синф ўқувчиларининг 20 нафардан ортиғи аъзо бўлиб, дарсдан бўш пайтларида ўқитувчиларидан тасвирий санъатнинг сир-асрорларини ўрганиб келишмоқда.

Ташкил этилган кўргазма ҳам тўгаракка аъзо бўлган 10 нафар ўқувчининг ижод маҳсуллари орасидан саралаб олинди. Кўргазмага ташриф буюрган ота-оналар, мактаб ўқитувчилари, ўқувчиларнинг дўстлари маданий ҳордиқ олишди.

Шу ўринда айтиш керакки, дарсдан ташқари ташкил этиладиган бу каби кўргазмалар ўқувчиларнинг дунёқарашини кенгайтиришда, фақатгина дарс машғулотлари билан машғул бўлиб зерикиб қолмасликларида, дўст ортиришларида, қобилиятларини ривожлантиришда ҳамда меҳнатлари муносиб этироф этилишида муҳим ўрин тутади.

Бу галги тасвирий санъат кўргазмаси ҳам ўқувчиларнинг маданий ҳордиқ олишида ва тасвирий санъат ҳақидаги билимларининг янада мустаҳкамланишига ҳисса қўшгани билан аҳамиятли бўлди.

Туман ҳокимлигининг Ахборот хизмати.