69-СОНЛИ МАКТАБДА БОШЛАНҒИЧ СИНФ ЎҚУВЧИЛАРИНИНГ “ХАЙР, БИРИНЧИ УСТОЗИМ!” ТАДБИРИ ЎТКАЗИЛДИ
25 май куни барча умумтаълим мактабларида бошланғич синф ўқувчиларининг мактабга келган илк кунидан кутиб олган ва қўлларига қалам тутишни ўргатган, алифбени танитган биринчи устозлари билан хайрлашишга бағишланган тадбирлар ўтказилди. Ўқувчилар ўзларига 4 йил мобайнида таълим ва тарбия берган биринчи устозга самимий миннатдорчилик билдириб, катта эҳтиром кўрсатишмоқда.
Аёқчи маҳалласидаги 69-сонли мактабнинг 4-“А” синф ўқувчилари ҳам бўлиб ўтган “Хайр, биринчи устозим!” тадбирида таълим берган биринчи устози синф раҳбари Жумагул Болтаевадан олган билимларини намойиш этишди. Тадбирда мактаб директорининг маънавий-маърифий ишлар бўйича ўринбосари Жўрабек Тажимуродов, ижодий-маданий ишлар бўйича тарғиботчиси Санамжон Матякубова, Аёқчи маҳалла фуқаролар йиғини раиси Аллаёр Қаландаров, хотин-қизлар фаоли Нигора Полвоновалар ҳам қатнашишди.
Тадбирда сўзга чиққанлар дастлаб ўқувчиларини бошланғич таълимни пухта эгаллаганликлари ва юқори синфга ўтишаётгани билан табриклашди. Шунингдек, ушбу билим масканида яратилган шароитлар, ўқувчиларга таълим бераётган билимли ва салоҳиятли ўқитувчилар, ташкил этилган турли тўгараклар, ҳар хил танловларда иқтидорини юзага чиқараётган ва ютуқларга эришаётган ёшлар ҳақида сўз юритилди.
Таъкидланганидек, ушбу мактабда педагоглар жамоаси ўзаро ҳамжиҳатликда, аҳилликда ёш авлодга таълим-тарбия бериб келишмоқда. Ўтган даврлар мобайнида мактабда таълим сифатини ошириш бўйича самарали ишлар амалга оширилди. Натижада Фанлар олимпиадасида мактаб ўқувчилари турли фанлардан туман ва Қорақалпоғистон Республикаси босқичларида фаол қатнашиб, совринли ўринларни қўлга киритиб келмоқдалар. Ўтказилаёган турли спорт мусобақаларида ҳам мактаб ўқувчилари фаол қатнашиб, эпчиллик ҳамда уддабуронлик қобилиятларини намоён қилиб, республика миқёсидаги совринли ўринларни қўлга киритишмоқда. Мактабдаги ўқувчилар тарбияси, уларга берилаётган билим ва кўникмалар доимий эътиборда бўлгани сабабли 69-мактаб туманимиздаги намунали мактаблар сафидан жой олган.
Тадбир байрамона безатилган саҳнада ўқувчилар томонидан тайёрланган мусиқий дастур билан давом эттирилди. Ўқувчилар Ватан ва тинчлик ҳақидаги, устозларга бағишланган шеърларни айтишди. Жозибали миллий рақслар, хушнаво қўшиқлар куйлаб, тадбирга янада файз киритишди. Ўқувчилар ижросидаги саҳна кўринишидаги эртак ҳам томошабинларга жуда манзур бўлди. Улар эртак қаҳрамонлари образини моҳирона ижро этишга ҳаракат қилдилар ва олқишларга сазовор бўлдилар.
Тадбирда бошланғич синфда аъло баҳоларга ўқиган ўқувчиларга мактаб маъмурияти томонидан фахрий ёрлиқлар ҳам топширилди. Ушбу маросимда сўзга чиққан бошланғич синф ўқитувчиси, болаларнинг биринчи устози Жумагул Болтаева 4-синфни муваффақиятли тугатган ўқувчиларига энг эзгу тилакларни тилаб, келгусида мактабни аъло баҳоларга тугатишларини, жамият келажагагига муносиб, комил инсонлар бўлиб вояга етишларини, ўзлари севган касби, ҳунарининг моҳир эгалари бўлиб етишишларини тилади. Тадбирга ташриф буюрган ота-оналар ҳам фарзандларига 4 йил мобайнида таълим-тарбия берган биринчи устозга, ўқитувчиларга катта миннатдорчилик билдирдилар.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
