56-СОНЛИ МАКТАБДА “ХАЙР, БИРИНЧИ УСТОЗИМ!” ТАДБИРИ ЎТКАЗИЛДИ

Болаларнинг жажжи қалбларига илк бор катта орзулар, юксак мақсадлар, интилишлар олиб кирадиган муқаддас даргоҳ бу – мактаб ҳисобланади. Мана шу даргоҳга қадам  қўйган ҳар бир бола биринчи устози – меҳрибон ўқитувчиси ёрдамида ҳаёт зинапояларидан кўтарила бошлайди.

Биринчи ўқитувчи болаларда ўқиш, ёзиш, ҳисоблаш, малака ва кўникмаларини ҳосил қилиш, табиат ва жамият ҳақида илк билимлар бериш, хулқ-одобга ўргатиш каби вазифаларни амалга ошириш чоғида уларга ўз фарзандлари каби боғланиб қолади.

Тўрт йиллик даврни ўз ичига олган бошланғич таълим жараёни бир зумда ўтиб кетгандек бўлади, хаёлимизда. Аммо шу қисқагина давр мобайнида болага берилган билим унда ҳаётий тушунчаларни шакллантирган бўлади.

Бошланғич таълим босқичи ниҳоясига етганидан кейин, албатта биринчи устознинг қадрдон ўқувчилари билан хайрлашишига тўғри келади.

Ҳозирги кунда мамлакатимизнинг барча умумтаълим мактабларида устоз ва шогирдларнинг хайрлашув онларини байрам шаклида ўтказиш анъанага айланиб бораяпти.

Ўқув йили якунида барча мактабларда ўтказилаётган “Хайр, биринчи устозим!” деб номланган маънавий-маърифий  тадбирларда азиз муаллимлар – устозларга катта ҳурмат-эҳтиром кўрсатилмоқда.

Яқинда туманимиздаги 56-сонли мактабда  ўтказилган “Хайр, биринчи устозим!” деб номланган бадиий кеча унда иштирок этган 4-синф битирувчиларининг ҳам, ўқитувчи – устозларнинг ҳам, ота-оналарнинг ҳам қалбларида узоқ сақланадиган унутилмас тадбирга айланди, десак муболаға  бўлмайди. Чунки бу тадбирда устозларнинг ўз шогирдларига бўлган меҳр-муҳаббати, шогирдларнинг ўз устозларига бўлган чексиз ҳурмат-у эҳтиромлари тадбир иштирокчиларининг қалбларига аъло кайфият олиб кирди.

Кечани мактаб директорининг маънавий-маърифий ишлар бўйича ўринбосари Сайёра Юнусова кириш сўз билан очиб, 4-синф битирувчиларига келгуси ўқишларида муваффақиятлар тилади ва бу синф ўқитувчилари Роҳатой Раҳимова ва Муборак Аҳмедоваларга болаларга таълим-тарбия беришдаги намунали ишлари учун мактаб маъмуриятининг миннатдорчилигини билдирди.

Шундан кейин 4-А синф ўқитувчиси Роҳатой Раҳимова ва 4-Б синф ўқитувчиси Муборак Аҳмедовалар сўзга чиқишиб, шогирдларининг мактабни аъло баҳоларга тугатиб, олий таълим муассасаларига ўқишга киришларига, яхши касбларни эгаллаб, Ватанимизга содиқ фарзандлар бўлиб етишишларига ўз тилакларини билдирдилар.

Тадбирда иштирок этган ота-оналар ўз фарзандларига таълим-тарбия бераётган ўқитувчилардан чексиз миннатдор эканликларини айтишиб, уларнинг келгусидаги ишларига муваффақиятлар, ўзларига эса соғлик-саломатлик тиладилар.

Кечада 4-А ва 4-Б синфлар ўқувчилари она Ватан, мактаб ва устозларига бағишланган шеър ва қўшиқлар айтишиб, рақсга тушдилар.

Тадбир якунида 4 синф ўқувчиларидан бир гуруҳига аъло ўқигани ва яхши хулқи учун мактаб маъмуриятининг “Фахрий ёрлиқ”лари топширилди. 

Алламберган ЖУМАНИЁЗОВ, 56-сонли мактабнинг ижодий-маданий масалалар бўйича тарғиботчиси.