“ҚАЛДИРҒОЧ” БОЛАЛАР ЁЗГИ ОРОМГОҲИНИНГ ОЧИЛИШИГА БАҒИШЛАНГАН ТАДБИР БЎЛДИ

Мактабларда ўқув йили поёнига етиб, болажонлар ёзги таътилга чиқишди. Бундай дамларда уларни сўлим оромгоҳлар ўз бағрига чорлайди. Оромгоҳларда болалар кўнгилли дам олиб, янги дўстлар орттириб, турли спорт, ижодий тўгаракларда иқтидорларини юксалтирадилар. Қатъий режа асосида олиб бориладиган чиниқиш машқлари, турли танловлар ва маданий дам олиш тадбирлари ўқувчилар қалбида ўчмас таассуротлар қолдиради.

Дўрман овули Амударё туманининг энг ҳавоси мусаффо, файзли гўшаларидан бири саналади. Овулда фаолият кўрсатаётган, атрофини кўп йиллик муҳташам чинорлар, арчалар ўраб турган 84-сонли мактаб биносида ҳар йили ташкил қилинадиган "Қалдирғоч" болалар ёзги дам олиш оромгоҳи болаларнинг энг севимли масканига айланган.

Жорий йилнинг 2 июнь кунидан иш фаолиятини бошлаган мазкур оромгоҳда бу йилги ёз мавсумида 5 та босқичда, ҳар босқичда 100 нафардан жами 500 нафар болаларни қабул қилиш режалаштирилган. Оромгоҳ жорий йилги илк фаолиятини бошлаган биринчи босқичда Манғит шаҳри ва шаҳар атрофидаги 1-, 16-, 30-, 31-, 36-, 38-, 40-, 55-, 56-, 57-, 82- ва 87-сонли мактабларнинг 7 ёшдан 14 ёшгача бўлган жами 100 нафар ўқувчилари қамраб олинди.

Шу муносабат билан 2 июнь куни мактаб олдида тантанали тадбир ўтказилди. Унда туман ҳокими ўринбосарлари Маҳмуд Шерметов, Гўзал Собурова, Мактабгача ва мактаб таълими бўлими мудири Саида Содиқова, мактаблар директорлари, Миллий гвардия, Ички ишлар бўлими ходимлари, дам олувчи болаларнинг ота-оналари иштирок этдилар.

Тадбирда туман ҳокими ўринбосарлари Маҳмуд Шерметов, Гўзал Собуровалар болажонларни оромгоҳнинг очилиши билан қизғин қутлаб, бу яратилаётган шароит юртимизда болажонларнинг баркамол бўлиб вояга етишларига қилинаётган давлатимизнинг ғамхўрлигининг бир ифодаси эканлигини таъкидладилар. Сўзга чиққанлар саф бўлиб, қувончдан кўзлари ёниб турган болаларнинг кўнгилли дам олишларини тиладилар.

“Қалдирғоч” болалар оромгоҳи директори Зафар Абдуллаев йиғилганларни оромгоҳда болаларнинг яхши дам олишлари, қулай шароитларда овқатланишлари учун яратилган шароитлар билан таништирди.

Оромгоҳда болаларнинг бўш вақтлари мазмунли ўтиши учун “Беш ташаббус” доирасида тўгараклар фаолияти йўлга қўйилган бўлиб, уларга малакали ўқитувчи-мураббийлар ҳам тайинланганини барча ҳавас билан эътироф этди.

Оромгоҳнинг очилиш маросими ҳудуд санъаткорларининг концерт дастури билан давом этди. Дилрабо куй-қўшиқлар, рақслар болаларнинг оромгоҳга илк қадам қўйган кунининг таассуротларга бой, эсда қоларли бўлишини таъминлади. Уларнинг оромгоҳ бағрида ўтадиган ҳар бир куни дўстлари сафи кенгайиб, чиниқиб, илм олишга иштиёқи ошишига хизмат қилади, албатта. Чунки ёзги таътил даврида иш бошлайдиган бунингдек масканлар дам олиш оромгоҳлари саналса ҳам, аслида у ерда ўтказиладиган машғулотлар, тадбирлар бола дунёқарашини бойитиб, ижодий қобилиятини юксалтиради, болажонларнинг ҳар томонлама камол топишига хизмат қилади. Зеро, болалар ва ўсмирларнинг ёзги дам олиш оромгоҳлари фаолияти таълим тизимининг бир қисмидир.

Ойгул РАЖАБОВА.