ГРАНТ ЛОЙИҲАСИ ДОИРАСИДА “КИТОБЛАР КАРВОНИ” ТАДБИРИ ЎТКАЗИЛДИ

“Менинг оилам” газетаси таҳририятининг “Беш муҳим ташаббус – ёшларга қанот!” номли грант лойиҳаси доирасида “Китоблар карвони” тадбири ўтказилди.

27 июль куни Амударё туманидаги “Баркамол авлод” болалар мактабида бўлиб ўтган тадбирда “Тараққиёт кўзгуси” газетаси, “Амударё” телеканали таҳририятлари ходимлари, мактаб директори Хонимжон Ражабова, тўгараклар раҳбарлари ва ўқувчи-ёшлар иштирок этишди. Тадбир давомида иштирокчиларга грант лойиҳаси доирасида таҳририят ходимлари томонидан амалга оширилаётган ишлар хусусида маълумот берилди.

Лойиҳа координаторлари мазкур грант лойиҳаси доирасида ногиронлиги бўлган ёшларни “Беш муҳим ташаббус” доирасидаги тадбирларга фаол жалб қилиш мақсадида турли танловлар, давра суҳбатлари, учрашувлар ташкил этилаётгани, уларда туман ёшлари фаол қатнашишаётгани, ижодкор ёшларнинг ижод намуналари туман газетасида ёритилиб борилаётгани хусусида сўзлаб ўтишди.

Шунингдек, тадбирда иштирок этган “Тараққиёт кўзгуси” газетаси мухбири, журналист Ойгул Ражабова ёшларни китобхонликка жалб этиш, ижодкор ёшларни қўллаб-қувватлаш, уларнинг ижод намуналарини ёритиш борасида олиб борилаётган ишлар, таҳририят қошидаги “Жайхун илҳомлари” нодавлат нотижорат ташкилоти кутубхонасида 5 минг донага яқин китоблар фондига эга бўлган кутубхона, шунингдек, таҳририят томонидан турли лойиҳалар доирасида ташкил этилаётган маънавий-маърифий тадбирлар хусусида маълумотлар бериб ўтди.

Тадбирда лойиҳа координаторлари ўқувчи-ёшларни кўргазмага қўйилган “Жайхун илҳомлари” нодавлат нотижорат ташкилоти қошидаги кутубхонага тегишли бўлган 100 тадан зиёд китоблар билан таништирдилар. Ёшлар шу жойнинг ўзида кутубхонага аъзоликка қабул қилиниб, ўзларига ёққан китобларни танлаб олдилар.

Ёш китобхонлар “Китоблар карвони” кўргазмаси орқали тақдим этилган асарларни қизиқиш билан варақлаб, албатта “Жайхун илҳомлари” ННТ кутубхонасига аъзо бўлиш истагини билдирдилар.

Ногиронлиги бўлган китобхон ёшларнинг ўзлари ёқтирган асарларни мутолаа қилишларига шароит яратиш мақсадида ҳудуддаги мактабларнинг ижодий-маданий масалалар бўйича тарғиботчилари алоҳида рўйхат тузиш орқали бундай тоифадаги китобхон ёшларни қўллаб-қувватлаш ва албатта улар хоҳлаган бадиий адабиётларни беминнат етказиб беришни йўлга қўйишларини билдирдилар.

Тадбир давомида китобхон ёшлар ўзлари севиб ўқиган бадиий асарлар қаҳрамонлари ҳаётидан олган таассуротлари ҳақида тўлқинланиб сўзладилар. Шеърлар айтишиб, ўзларини қизиқтирган саволларни бердилар. Китобхон ёшлар билан “Тараққиёт кўзгуси” газетаси таҳририяти ижодкорлари самимий мулоқотда бўлдилар ва уларнинг барча саволларига жавоблар бердилар.

Китоб – зиё нурини тарқатувчи, тўғри йўл кўрсатувчи чироқ. Китобхон ана шу мўъжизалар оламига кирган сари заковатли, ҳар қандай вазиятда фикрини эркин ифода этаоладиган шахс сифатида камол топади. Ёшлар учун ташкил этилган “Китоблар карвони” тадбири айнан ана шундай заковатли инсонларни камол топтиришга қаратилгани билан муҳим аҳамият касб этди.

О.Худойберганова.