ЎТА ХАВФЛИ ВА ЮҚУМЛИ ЗООНОЗ КАСАЛЛИКЛАРДАН ОГОҲ БЎЛИНГ!

Кунларнинг иссиқ даври аҳоли учун юқумли касалликлардан сақланиш

борасида масъулиятли мавсум ҳисобланади.

Баҳор, ёз ойларида ўта хавфли Қрим-конго геморрагик иситма, қутуриш, куйдирги, бруцеллёз касалликлари кўпроқ учрайди.

Қрим-конго геморрагик иситма (ўтмишда қора ҳалак, қора ўлим деб ҳам номланган) касаллиги ҳайвонларда учрайди ва каналар чақиши ёки канани териш ва эзиб ўлдириш, қўй-эчкилар жунини қирқиш вақтида одамларга юқади. Беморлар ўз вақтида шифохонага мурожаат қилмаса, аҳволи оғирлашиб, айрим ҳолатларда ўлим билан тугаши мумкин.

Қрим-конго геморрагик иситма касаллигини юқтириб олмаслик учун аҳоли қўлларига резина қўлқоп кийиб, вақти-вақти билан хонадонида боқилаётган чорва молларида каналар бор-йўқлигини текшириб туришлари шарт. Агар каналар борлиги аниқланса, дарҳол ветеринария шифокорини чақириб, улар томонидан уй ҳайвонларини ҳамда молхона ва қўйхоналарни каналарга қарши махсус дезинфекция воситалари ёрдамида ишлов беришни ташкил этиш зарур.

Уй ҳайвонларидаги каналарни териш, ушлаш ва уларни эзиб ўлдириш умуман мумкин эмас. Кана чаққанда ёки қўй жунини қирқиш вақтида канадан қон сачраганда зудлик билан шифохонага мурожаат қилиш лозим.

Қутуриш касаллиги ҳам ҳайвонлар ва одамларда учрайдиган, асаб тизимининг оғир шикастланиши билан кечадиган ҳамда ўлим билан якун топадиган ўта хавфли юқумли касалликдир.

Одамлар учун касаллик манбаи қутурган уй ҳайвонлари ҳисобланади. Одамларга қутуриш касаллиги кўп ҳолатларда итлардан, шу касалликка чалинган ҳайвонларнинг тишлаши, тирнаши, тишларининг қадалиши, шунингдек, жароҳатланган тери ва шиллиқ қаватларига сўлаги тушиши пайтида юқади. Шунинг учун ҳайвон тишлаган одам дарҳол шифокорга мурожаат қилиб, қутуриш касаллигига қарши даво муолажаларини олиши зарур. Шундай йўл тутган одам ўз ҳаёти хавфсизлигини таъминлаган бўлади.

Ўзингиз, яқинларингиз ва қўни-қўшниларингизни юқоридаги ўта хавфли юқумли касалликлардан ҳимоя қилишда бефарқ бўлманг!

Д.Бобожонов,

туман СЭО ва ЖСБ эпидемиолог-шифокори.