АМУДАРЁДА СТОЛ ТЕННИС БЎЙИЧА ҚОРАҚАЛПОҒИСТОН ЧЕМПИОНАТИ ЎТКАЗИЛДИ

Амударё туманида спортнинг стол теннис тури бўйича Қорақалпоғистон Республикаси чемпионати бўлиб ўтди.

2-4 август кунлари давомида тумандаги Ихтисослаштирилган мактабнинг ёзги спорт майдончасида 15 ёшгача бўлган ўсмирлар ўртасида ўтказилган ушбу чемпионат мусобақаларида Республикамизнинг барча туманларидан келган спортчи-ёшлар иштирок этишди.

Чемпионатнинг дастлабки кунида бўлиб ўтган очилиш маросимида спортчи-ёшлар билан бирга Амударё тумани Спорт мактаби директори Чоршам Тажимуродов, спорт мураббийлари, туманлардаги Спорт мактабларининг стол теннис бўйича тренерлари ҳам қатнашишди. Очилиш маросимига бағишланган мазкур тадбирда Спорт мактаб директори Чоршам Тажимуродов сўзга чиқди ва чемпионат мусобақасини очиб берди.

У ўз сўзида мазкур чемпионатдан кўзланган асосий мақсад, иқтидорли ёш теннисчиларни саралаш, уларни халқаро мусобақаларга тайёрлаш эканлигини айтиб, мамлакатимизда ёшлар ўртасида Олимпия спорт турларини янада оммалаштириш, жумладан, стол тенниси бўйича маҳоратли спортчилар камол топишлари учун бир қатор имкониятлар яратилаётгани ҳақида тўхталиб ўтди. Чемпионат мусобақаларида иштирок этиш учун келган ёш теннисчилар орасидан келгусида Осиё ва Олимпия ўйинларида мамлакатимиз шарафини муносиб ҳимоя қиладиган моҳир спортчилар етишиб чиқишига умид билдириб, барчасига омад тилади.

Тантанали очилиш маросимидан сўнг, иштирокчилар қизғин баҳсларга киришишди. Ушбу мусобақаларда 15 та тумандан ташриф буюрган 75 нафар ўғил болалар ва 56 нафар қиз болалар иштирок этишди. Теннисчилар яккалик, жуфтлик ва жамоавий тарздаги баҳсларда ўзаро рақобатлашдилар. Ўйин давомида ёш спортчилар чаққонлик, абжирликларини кўрсатиб, тренерлардан ўрганган стол теннис сирларини моҳирона қўллаб, ғолиб бўлишга ҳаракат қилдилар. Ёш спортчиларнинг бу интилишлари бесамар кетмади ва чемпионат ғолиблигини қўлга киритишга эришишди.

Яккалик баҳсларида ўғил болалар ўртасида 1-,2-,3-ўринларни Олимпия ва Паралимпия спорт турлари маркази жамоаси қўлга киритди. Жуфтлик баҳсларида эса Олимпия ва Паралимпия спорт турлари маркази 1-ўрин соҳиби бўлди. Шунингдек, 2-ўрин Чимбой тумани, 3-ўрин Амударё тумани ёш спортчиларига насиб қилди. Жамоалар ўртасидаги баҳсларда 1-ўринни Қонликўл тумани, 2-ўринни Чимбой тумани, 3-ўринни Амударё тумани ва Элликқалъа тумани теннисчилари қўлга киритишди.

Қизлар ўртасидаги яккалик баҳсларида 1-,2-,3-ўринларни Олимпия ва Паралимпия спорт турлари маркази теннисчилари, жуфтлик баҳсларида 1-ўринни нукуслик теннисчилар, 2- ва 3-ўринларни амударёлик теннисчилар, 3-ўринни Тахиатошлик теннисчилар эгаллашди. Жамоавий баҳсларда эса 1-ўринни Қонликўл тумани, 2-ўринни Тахта кўпир тумани, 3-ўринни Тахиатош тумани, 3-ўринни Нукус тумани спортчи ёшлари қўлга киритишга муваффақ бўлишди.

Чемпионат якунида барча йўналишлар бўйича ўтган баҳсларда ғолиб бўлган спортчиларга ташкилотчилар томонидан диплом, медаль ва эсдалик совғалари, чемпионат кубоги тантанали тарзда топширилди. Мусобақаларда 1-ўрин ғолиби бўлган ёш теннисчиларга спорт жамланмасидан иборат сумкалар совға қилинди.

Бугунги кунда жисмоний тарбия ва спорт билан шуғулланиш учун юртимизда қулай имкониятлар яратилмоқда. Ушбу имкониятлардан унумли фойдаланаётган ёшларимиз эса ўзлари учун севимли бўлган спорт турлари билан шуғулланиб, юксак марралар сари олға бормоқда.

О.Худойберганова.