Байрам олдидан озиқ-овқат ва қишлоқ хўжалиги маҳсулотлари ярмаркаси ташкил этилди

Мамлакатимизда ҳар йили энг улуғ, энг азиз байрамимиз – истиқлолга эришилган кун ва Янги йил арафасида аҳолига қулайлик яратиш ва маҳсулотлар таннархининг барқарорлигини сақлаш учун озиқ-овқат, қишлоқ хўжалиги маҳсулотлари ярмаркалари ўтказилади. Юртимизнинг барча шаҳар, туманлари марказларида ҳамда аҳоли зич яшайдиган ҳудудларда арзонлаштирилган савдо ярмаркалари ташкил этилиши юртдошларимизга улкан қулайлик яратмоқда.

Бутун мамлакатимизда бўлгани каби туманимизнинг “Манғит деҳқон бозори” масъулияти чекланган жамияти қошидаги “Манғит-бозор эркин харид” МЧЖ томонидан ҳам арзонлаштирилган озиқ-овқат ва қишлоқ хўжалиги маҳсулотлари ярмаркаси фаолияти йўлга қўйилгани мустақиллик байрами арафасида туманимиз аҳолиси қувончига қувонч қўшди. Муҳим саналар, байрамлар муносабати билан бировни йўқлаш, яқин қариндошлар, биродарларни меҳмонга чақириб сийлаш, дилдан суҳбат қуриб, қувончини баҳам кўриш халқимизга хос азалий қадриятлардандир. Аслида ҳам қачонки уйимизга меҳмон келса, кўнглимиз қувончдан яйраб, уларни энг мазали мевалар билан сийлагимиз келади, дастурхонга ширин таомлар тортиш орқали меҳмонга ҳурмат-эҳтиромимизни ифода этамиз.

Шундай қутлуғ кунларда ички истъмол бозорини тўлдириш, нархларни барқарорлаштириш мақсадида озиқ-овқат ва қишлоқ хўжалиги маҳсулотлари ярмаркалари фаолияти йўлга қўйилганлиги нур устига аъло нур бўлаяпти.

Манғит Деҳқон бозори олдида ташкил этилган ярмаркада маҳсулотлар сероб уларни пластик карталар орқали ҳам харид қилиш имконияти ҳам яратилган. Шу йилнинг 15 августидан 15 сентябригача давом этадиган ярмаркада туманимиз аҳолиси ҳар куни соат 8:00дан 20:00гача оиласи эҳтиёжи учун асосий озиқ-овқат ва қишлоқ хўжалиги маҳсулотларини харид қилишлари мумкин, Савдо ярмаркасини ҳудудий таъминот корхоналари, тумандаги деҳқон, фермер хўжаликлари сифатли ва хавфсиз маҳсулотлар билан таъминлаб туришибди. Савдо нуқталарида сотувчилар учун ҳам зарур шароитлар яратилганлигини ҳам эътироф этиш жоиз.

Ярмаркада ҳар куни 18та савдо ўрнида қорамол гўшти, қаймоқ, ун, пахта ва кунгабоқар ёғлари, тухум, картошка, пиёз, сабзи, қовун, тарвуз, бақлажон каби маҳсулотлар узлуксиз сотилмоқда.

Эътиборли жиҳати ярмаркадаги ун ва пахта, кунгабоқар ёғи ва товуқ гўштидан ташқари барча маҳсулотлар туманимиз меҳнаткашлари меҳнатларидан яратилган маҳсулотлардир. Товуқ гўшти ҳозирча Хоразмдан, “Урганч, Умид юлдузлари” хусусий корхонасидан келтирилаяпти. Яқин кунларда туманимизнинг паррандачилик соҳасида фаолият юритаётган тадбиркорлари етиштираётган парҳез гўштлари савдога чиқарилади.

Ёз охирлаб бораяпти. Ўтаётган ҳар бир кун бизни мамлакатимиз мустақилликка эришган қутлуғ сана – 1 сентябрга яқинлаштираяпти. Бутун юртимиз бўйлаб истиқлол шукуҳи кезиб юрган бугунгидай қувончли кунларда арзонлаштирилган озиқ-овқат ва қишлоқ хўжалиги маҳсулотлари ярмаркаси шу азиз Ватанда инсон қадри улуғ эканлигидан далолат бермоқда.

Ойгул РАЖАБОВА.