Жисмоний меҳнат фойдалими Ёки ақлий меҳнат?

Доно халқимизда «Ақлини ишлатмаган кишининг оёғига зўр тушар» деган мақол бор. Яъни ақлни ишлатмасдан туриб, фақат жисмоний ҳаракат қилиш натижасида тана, баъзи ҳолларда қалб ҳам азият чекиши мумкин.

Хўш, у ҳолда қандай йўл тутиш керак? Мақоламиз давомида ушбу саволларга жавоб оласиз.

Стив Жобс шундай деган эди: «пулим тугаб қолганда бошқаларга ўхшаб иш излашга шошиб югуриб кетмадим. Унинг ўрнига ўтириб ўйладим.»  Ҳа, кўп ишлаш ҳар доим ҳам яхши натижа олиб келавермайди. Ақлни ишлатишнинг афзалликлари кўпроқ. Чунки кўп ишлайдиган киши эмас, ақлини ишлатиб фаолият олиб борадиган киши муваффақиятга осонроқ эришади. Фикр юритмасдан ҳафталаб, ойлаб тинимсиз ҳаракат қилган, аслида мақсадга эришиш учун қайси йўлдан бориш қулайлиги ҳақида ўйлаб кўрмасдан кучини дуч келган йўналишга сарфлаётган киши фақат ўзигагина эмас, балки атрофидагиларга ҳам жабр қилиши шубҳасиз. Аслида, ҳаракатга тушишдан олдин яхши режа тузиб олиш, ҳаракатлар натижасини олдиндан кўра билиш эса кони фойда.

– Ақл ишлатиб, ҳаракат қилган киши:

масалани ҳал қилишнинг осонроқ йўлини излаб топади;

– кўп куч, вақт ва пулни тежаб қолади. Ресурсларни мақсадли сарфлайди. Ишни тез ва осонлик билан тугатади;

– ишидан безиб қолмайди, йўқотишлар кам бўлади ва иш давомида салбий таъсир сезмайди;

– ўрганади, бир марта ишни ақлли тугатган кишида кейинги ишларни ҳам худди шундай якунлаш одати шаклланади;

– эришган натижаси нисбатан яхшироқ бўлади. Нафақат кўп натижага, балки яхшироқ, сифатлироқ натижага эга бўлади;

– бўш вақти кўпроқ бўлади, янги ғояларга фурсат топиши осонлашади;

– бахтли яшайди. Ҳаётидан, ишидан, натижаларидан кўнгли тўлади, келажакка нисбатан ишончи ортади.

Шундай экан, ушбу тавсияларга амал қилган ҳолда фаолиятингизга яна бир бора разм солинг, азиз муштарий. Ўзингиздаги мавжуд камчиликларни тан олишдан, уларни тўғрилашдан асло ийманманг. Ақлни чанг босишига йўл қўйманг! Уни доимо фойдали билимлар билан «тозалаб» туринг.

Интернет материаллари асосида тайёрланди.