Устозлар миллий форуми доирасида "Мактабгача таълим сифати: Ҳозирги ҳолат ва келажакдаги вазифалар" номли анжуман ўтказилди

Амударё тумани Мактабгача ва мактаб таълими бўлимида 2023-2024-ўқув йили бошланиши олдидан II Устозлар миллий форуми ўтказилди.

Устозлар миллий форумининг иккинчи куни “Мактабгача таълим сифати: Ҳозирги ҳолат ва келажакдаги вазифалар” мавзусига бағишланди. Анжуманда туман Мактабгача ва мактаб таълими бўлими масъуллари, ҳудуддаги давлат мактабгача таълим ташкилотлари раҳбарлари, тарбиячи-педагоглар ва ОАВ ходимлари иштирок этишди.

Анжуман кун тартибидаги асосий масала юзасидан бўлимнинг Давлат ва нодавлат мактабгача таълим ташкилотлари фаолиятини ҳамда ўқитишнинг муқобил шаклларини ташкил этиш бўйича шўъба мудири Солия Бобожонова маъруза қилди.

Болаларни бошланғич таълимга мажбурий, бепул бир йиллик тайёрлаш тизими орқали мактабгача таълим муассасаларига жалб этиш, тизимини янада такомиллаштириш, соғлом, фаол, баркамол, ижтимоий мослаштирилган болаларни тарбиялаш, келгусида муваффақиятли ўқув фаолияти учун шарт-шароитларни шакллантириш ва уларни бошланғич таълимга сифатли тайёрлаш ва 6 ёшли болаларни мактабгача таълим билан тўлиқ қамраб олишнинг асосий мақсадлари ҳисобланади.

Хусусан, “Илм йўли” вариатив дастури “Илк қадам” мактабгача таълим муассасасининг давлат ўқув дастури сифатида Ўзбекистон Республикаси илк ва мактабгача ёшдаги болаларга қўйиладиган давлат талаблари асосида ишлаб чиқилган. Болаларни бошланғич таълимга мажбурий. бепул бир йиллик тайёрлов гуруҳида таълимий - тарбиявий жараён “Илм йўли” муқобил дастури асосида сифатли педагогик тамойилларга таянган ҳолда ташкил этилади. Анжуманда шу ва шу каби мактабгача таълим-тарбия услублари, янги педтехнологик жараёнларни соҳага самарали татбиқ этиш юзасидан батафсил маълумотлар берилди.

Шундан сўнг, анжуман кун тартибига қўйилган педагог кадрлар таркибининг сифати ва уларни касбий ривожлантиришга доир масалалар юзасидан туман Мактабгача ва мактаб таълими бўлими, Давлат ва нодавлат мактабгача таълим ташкилотлари фаолиятини ҳамда ўқитишнинг муқобил шаклларини ташкил этиш шўъба методисти Ҳ.Бобожонова маърузаси тингланди.

Шунингдек, соғлом ва тўғри овқатланиш тартиби, мазкур тартибнинг мактабгача таълим ташкилотларида мунтазам равишда амал қилинишини таъминлаш каби масалалар бўйича бўлимнинг Мактабгача таълим ташкилотларида соғлом овқатлантиришни ташкил этиш бўйича методисти Сауле Патуллаева сўзга чиқиб, давлат мактабгача таълим ташкилотларида тарбияланувчиларни соғлом овқатлантиришни ташкил этиш ишларини янада такомиллаштириш, белгиланган санитария қоидалари ва гигиена нормаларига мувофиқ ҳолда овқатлантиришни ташкил этиш орқали болаларнинг соғлом ва баркамол ўсишини таъминлаш ва шу асосда таълим-тарбия сифатини ошириш юзасидан ўзининг тавсия ва таклифларини билдирди.

Дарвоқе, жорий йилнинг 1 июнидан бошлаб Тошкент шаҳридаги, 2023 йил 1 сентябрдан эса республиканинг барча ҳудудларидаги давлат мактабгача таълим ташкилотларида ягона мавсумий таомнома асосида тарбияланувчиларни овқатлантиришни ташкил этиш белгиланган бўлиб, “Ягона мавсумий таомнома”, “Ақлвой-Ошпаз, боғчалар учун таомлар рецепти” тўпламидан фойдаланган ҳолда тузилган ва бу таомномалар рўйхатига киритилган маҳсулотлар болаларнинг гармонал ривожланишида муҳим аҳамиятга эга.

Анжуманда жорий йил давомида таълим-тарбия борасида амалга оширилиши лозим бўлган вазифалар ҳам таҳлил қилиниб, муҳим топшириқлар белгилаб олинди.