КЕЛАЖАККА МУНОСИБ АВЛОД ТАРБИЯЛАШ – УСТОЗ ВА МУРАББИЙЛАР ЗИММАСИДАГИ ШАРАФЛИ ВАЗИФА

Янгиланаётган Ўзбекистон равнақи ёш авлодга берилаётган таълим ва тарбия билан узвий боғлиқ бўлгани учун юртимизда таълим-тарбия тизимини ривожлантириш давлат сиёсати даражасига кўтарилган. Сўнгги йилларда ёшларнинг жаҳон андозаларига мос шароитларда замонавий билим ва касб-ҳунарларни эгаллашлари, жисмоний ва маънавий жиҳатдан етук инсонлар бўлиб вояга етишларини таъминлаш, уларнинг қобилият ва истеъдоди, интеллектуал салоҳиятини рўёбга чиқариш, қалбида она юртга садоқат ва фидойилик туйғуларини камол топтириш борасида улкан ишлар амалга оширилди.

Туман Мактабгача ва мактаб таълими бўлими тизимида 85та умумий ўрта таълим мактаблари, 1та “Баркамол авлод” болалар мактаби мавжуд. Шунингдек, 134та мактабгача таълим ташкилотлари фаолият юритаётган бўлиб, шундан 52 таси давлат, 78таси оилавий, 4таси давлат-хусусий шериклик асосидаги ташкилотлар ҳисобланади.

Мактаблар қуввати 32635 ўринли, ўқувчи сони эса 38813 нафарга етган. Тумандаги 3-7 ёш болалар сони 17019 нафар, шундан МТТларга қамраб олинган болалар сони 12250 нафарни, қамров 72 фоизни ташкил қилади.

Ўтган ўқув йилида 2750 нафар ўқувчи 11-синфни битирган бўлса, улардан 1440 нафари турли ОТМларга талабаликка қабул қилинди. Мактаблар ўртасида 40-сонли ва 56-сонли мактабларда бу борадаги кўрсаткич 100 фоизгача етказилиб, нафақат туманда, балки республикада юқори натижаларни қайд қилишди.

Ёш авлодга таълим-тарбия бериш йўлида туманимиз мактабларида 4061 нафар тажрибали устозлар фидокорона меҳнат қилиб

келишмоқда.

Уларнинг 293 нафари олий тоифали, 759 нафари 1-тоифа, 1178 нафари 2-тоифа, 1720 нафари мутахассис, 111 нафари ўрта маълумотли ўқитувчилардир. Ҳозирги кунда 284 нафар ўқитувчилар Халқаро ва Миллий сертификатларга эга. 

Янги ўқув йилига қадар Жумуровул маҳалласидаги 45-сонли мактаб 3,5 млрд. сўм маблағга мукаммал таъмирланди. “Ташаббусли бюджет” лойиҳасида ғолиб бўлган 1-, 31-сонли мактабларда умумий жорий таъмирлаш, 44-, 86-сонли мактабларда иситиш тизимини таъмирлаш ва пластик ромли деразалар ўрнатиш ишлари бошланди. Шунингдек, Республика бюджетидан қўшимча ажратиладиган маблағлар ҳисобидан 6та мактабда 17,2 млрд. сўмлик қурилиш-таъмирлаш ишлари олиб борилди.

Ундан ташқари, ўтган йили маҳаллий бюджет маблағлари ҳисобидан 4 та мактаб зарур жиҳозлар билан таъминланди. Корея Республикасининг Эксимбанк грантлари ҳисобидан 6 та мактабга 96 дона, республика бюджети ҳисобидан 17 та мактабга 176 дона замонавий компьютер жамланмалари етказиб берилди.

Таъкидлаш жоизки, давлатимиз томонидан таълим соҳасига қаратилаётган алоҳида эътибор самараси туманимиз мактаблари ўқитувчи ва ўқувчилари ютуқларида ўз ифодасини топмоқда. Таълим вазири жамғармаси ҳисобидан тўланадиган устама учун ўтказилган танловда иштирок этган 7 нафар педагогларимиз ҳар ойда 5 млн. сўм миқдорида устама олиш ҳуқуқига эга бўлишди. 35-сонли мактаб ўқувчиси Б.Самандарова Зулфия номидаги Давлат мукофоти билан тақдирланди. Спортнинг қўл жанги тури бўйича Ўзбекистон чемпионатида 15-сонли мактаб ўқувчиси А.Сотиболдиева ва 83-сонли мактаб ўқувчиси Лобар Жумабоевалар 1-ўринни қўлга киритдилар. “IT БИЛИМДОН” танловининг Қорақалпоғистон босқичида 12-сонли мактаб ўқувчиси Ш.Пўлатбоев фахрли 1-ўрин соҳиби бўлди. Ўтган ўқув йилидаги Фанлар олимпиадасининг Қорақалпоғистон Республикаси босқичида 59-сонли мактаб ўқувчиси С.Умаров кимё фанидан 3-ўринни эгаллади. 32-сонли ва 33-сонли мактаблар “Замонавий мактаб” лойиҳасининг III даражали сертификати билан тақдирланди.

Келгусидаги режаларимиз ҳақида тўхталадиган бўлсак, 2023 йил якунига қадар тизимга тадбиркорларни жалб қилган ҳолда 10та оилавий НМТТ ташкил қилиш орқали жами 250 нафар болалар МТТларга қамраб олиниб, қамров кўрсаткичини 12 487 нафарга, яъни  73,4 фоизга етказиш кўзда тутилган. Шунингдек, 2023-2024 йиллар давомида 29та мактабдаги маънан эскирган компьютер синфларни замонавий компьютер техникалари билан таъминлаш режалаштирилган. Таълим сифатини ошириш мақсадида мактабларда фаолият юритаётган олий тоифали 295 нафар  ва I малака тоифали 789 нафар ўқитувчилар сонини мос равишда 15 фоиз ва 20 фоизга етказиш чоралари ҳам кўрилади.

Ёш авлодни комил инсон этиб тарбиялаш йўлида меҳнат қилаётган ўқитувчи ва мураббийлар ҳар қанча эҳтиромга лойиқ бўлган улуғ инсонлардир. Фурсатдан фойдаланиб, келажакка муносиб, комил инсонларни вояга етказишдек масъулиятли ва шарафли вазифани зиммасига олиб, фидокорона меҳнат қилиб келаётган ҳамкасбларимни, устоз ва мураббийларни қутлуғ байрам билан муборакбод этаман. Касбингизда улкан ютуқлар, муваффақиятлар, хонадонингизга доимий хотиржамлик ва сиҳат-саломатлик тилаб қоламан.

Саида Садикова,

туман Мактабгача ва мактаб таълими бўлими мудири.