ЎҚУВ МАРКАЗИДА ХОТИН-ҚИЗЛАР ТИКУВЧИЛИК ВА КАСАНАЧИЛИКНИ ЎРГАНИШМОҚДА
Бугунги кунда юртимизда хотин-қизларни қўллаб-қувватлаш, уларни касб-ҳунарга йўналтириш, тадбиркорликка кенг жалб этишга алоҳида эътибор қаратилмоқда. Айниқса, манзилли дафтарларга киритилган, ишсиз аёл-қизларнинг бандлигини таъминлаш, тадбиркорлик фаолиятини йўлга қўйишга кўмаклашиш борасида қатор амалий ишлар бажарилмоқда.
Амударё туманида ҳам ишсиз, кам таъминланган, эҳтиёжманд хотин-қизларга касб-ҳунар ўргатиш ва уларни тадбиркорликка йўналтириш орқали бандлигини таъминлаш мақсадида Навоий номли маҳалла ҳудудидаги собиқ Бандликка кўмаклашиш маркази биносидан хона ажратилиб, ўқув маркази ташкил этилди ва зарурий жиҳозлари билан таъминланди.
Мазкур ўқув марказида бандлиги таъминланмаган хотин-қизлар учун қисқа муддатли бепул ўқув курслари ташкил этилган. Тикувчилик ҳамда касаначилик йўналишида хотин-қизларга ҳунар ўргатиш йўлга қўйилган. Марказда ҳунар ўрганиш учун ташриф буюрган хотин-қизларга “Tamara TEXTILE” тикувчилик корхонаси раҳбари, тадбиркор Тамара Юсупова тикиш-бичиш ишларини, тадбиркор Раъно Муродова эса декоратив буюмлар, гуллар ясашни ўргатмоқда.
Айни пайтда марказда ҳунар ўрганаётган аёл-қизларга етарли шароитлар яратилган хоналарда машғулотлар ўтказилмоқда. Уларга аёллар ва эркаклар, болалар кийимларини бичиш, мавсумий кийимларни тикиш, мато танлаш, чокни мустаҳкамлаб тикиш кабилар бўйича йўл-йўриқлар берилиб, тушунчалари мустаҳкамланади. Безак ясашга қизиқувчи аёл-қизларга ҳам гулқоғоз танлаш, ранглардан, бўёқлардан фойдаланиш, гулбаргчалар тайёрлаш кабилар ўргатилади. Ўқув курси якунида тингловчиларга масус сертификатлар берилади ва келгусида ўз тадбиркорлик фаолиятини йўлга қўйишларида амалий ёрдам кўрсатилади.
Таъкидлаш жоизки, ушбу ўқув маркази Ўзбекистон Республикаси Президентининг 2022 йил 21 сентябрдаги “Хотин-қизлар бандлигини ошириш ва саломатлигини мустаҳкамлашга оид қўшимча чора-тадбирлар тўғрисида” Қарори ижросини таъминлаш мақсадида ташкил этилди. Президент Қарорига кўра ташкил этилган ушбу марказга туман Оила ва хотин-қизлар бўлими томонидан ишсиз, айниқса, қишлоқ жойларда бола тарбияси билан уйда ўтириб қолган эҳтиёжманд аёллар, «Аёллар дафтари»га киритилган хотин-қизларни жалб этишга алоҳида эътибор қаратилмоқда. Шунингдек, бундай аёлларнинг бандлигини таъминлаш мақсадида овул ва маҳаллаларда тикувчилик, қандолатчилик, пазандачилик каби йўналишларда тадбиркорлик фаолиятини йўлга қўйишларига яқиндан кўмаклашилмоқда.
Ушбу марказ фаолиятининг асосий мақсади ишсиз ва банд бўлмаган аҳолини ҳудудий ҳамда минтақавий меҳнат бозорида талаб юқори бўлган замонавий касбларга ўқитишдан иборат. Ўтган давр мобайнида ўқув марказида 83 нафар хотин-қизлар тикувчилик йўналишида касб-ҳунар ўрганиб, сертификатларга эга бўлишди. Ҳозирги пайтда шундан 10 нафари ўз уйида тикувчилик цехини ташкил этди. Шунингдек, кўплаб аёл-қизлар декоратив буюмлар ва турли гуллар, саватлар, чироқлар ясашни ўрганишди ва элимизнинг тўй-базмларида хонадонларини безаклар билан безаб, хизмат кўрсатишни йўлга қўйишди.
Келгусида ушбу ўқув марказида бошқа йўналишлар бўйича ҳам ўқув курсларини ташкил этиш режалаштирилган бўлиб, уларга чекка ҳудудлардаги аёл-қизларни кўпроқ жалб этиш мақсад қилинган. Бу каби амалий ишлар туманда аёл-қизларнинг ҳунар ўрганишларида, ўз-ўзини иш билан банд қилиши, шу ҳунарлари орқали доимий даромадга эга бўлишларида муҳим аҳамият касб этади.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
