ГРАНТ ЛОЙИҲАСИ ДОИРАСИДА ТАДБИР ЎТКАЗИЛДИ

Ёш авлодни ҳар томонлама етук, маънавиятли инсонлар қилиб вояга етказишда, уларни ёт ғоялардан ҳимоя қилишда, миллий урф-одатларимиз, қадриятларимизга ҳурмат руҳида тарбиялашда юртимиз файзи бўлган нуроний кексаларимизнинг ўрни улкан. Шу боисдан ҳам иймон-эътиқодли нуроний кексаларнинг фазилатларидан ибрат олиш, уларнинг ҳаётий тажрибасини ўрганишга эътибор кучаймоқда. Маҳалла, овул, шаҳарча фуқаролар йиғинлари масъуллари ўзларига қарашли ҳудудларда тинчлик-осойишталик таъминланишида, ёш авлоднинг одоб-икромли, маънавиятли бўлиб улғайишига эришишда кекса авлод вакилларини жалб этиб, уларнинг давра суҳбатлари, учрашувларини ўтказишмоқда. Тарбияси оғир, хулқ-атворида салбий иллатлар кузатилаётган, оғир турмуш шароитига тушиб қолган ёшлар “Бир нуроний – ўн ёшга масъул” тамойили асосида нуронийларга бириктирилиб, муаммолари бартараф этилишига эришилмоқда.

Манғит шаҳрининг Чордара маҳалласида аҳоли гавжум жойлашган. Маҳалла шаҳар марказига туташ. Таркибида 7та тўғри, 3та тор, 3та берк, 2та шоҳкўчалар мавжуд. Жами 659та хонадондаги 798 оилада ўзбек, қорақалпоқ, қозоқ, қирғиз, рус, туркман миллатига мансуб аҳоли ҳамжиҳатликда истиқомат қилишади. Ҳудудда 3та мактабгача таълим ташкилотлари, 1та мактаб, туман Болалар-ўсмирлар спорт мактаби базаси, 2та кутубхона, 22та савдо дўконлари, 1та тўйхона,10та умумий овқатланиш шоҳобчалари, 4та новвойхона, 6та автомобилларга хизмат кўрсатиш шоҳобчалари мавжуд. Оилаларда тарбияланаётган 180 нафар болажонлар мактабгача таълим ташкилотларига қамраб олинган, 350 нафари мактаб ўқувчилари, 45 нафар ўқувчи спорт тўгаракларига жалб қилинган, 3та спорт майдончалари ёшлар хизматида.

Ҳудудда ёшларнинг бўш вақтларини мазмунли ўтказишлари учун алоҳида эътибор қаратилмоқда. Нуронийлар ёш оилаларда ўзаро қўшничилик муносабатлари барқарор бўлишига интилишади, оила муқаддаслиги борасида тушунтириш-тарғибот ишларини мунтазам олиб борилаётганлари натижасида тинчлик-осойишталик таъминланаётир.

Жорий йилнинг 9 октябрида маҳалла фуқаролар йиғини маъмурий биносида бўлиб ўтган йиғилишда бу ҳақда батафсил сўз борди. Amunews.uz таҳририяти томонидан амалга оширилаётган “Соғлом муҳит - соғлом ҳаёт” номли грант лойиҳаси доирасида ўтказилган тадбирда маҳалла фуқаролар йиғини масъуллари, нуроний онахонлар, ёш оилалар вакиллари ва ёшлар иштирок этдилар. Тадбирни “Тараққиёт кўзгуси” газетаси махсус мухбири Ойгул Ражабова очди ва кун тартибидаги мавзу юзасидан маъруза қилди.

Маҳалла хотин-қизлар фаоли Саида Юсупова “Кексалар - хонадонларимиз файзи ва фариштаси” деган халқимизнинг доно нақлига амал қилган ҳолда маҳалла ёшларини ҳар томонлама етук, маънавиятли инсонлар қилиб вояга етказиш борасида амалга оширилаётган саъй-ҳаракатлар, бунда ҳудуд нуронийларнинг ҳиссаси хусусида батафсил гапирди. Мавзу юзасидан маҳалла фуқаролар йиғини раиси Турсунбой Серикбоев, кўчабошчи аёллардан Ўғилжон ҳожи она Ўрозова, Ҳайитгул Ражабовалар ҳам ўз фикр-мулоҳазаларини билдирдилар. Тадбир арафасида маҳалла ҳаётида бир хайрли иш амалга оширилибди: ажрим ёқасига бориб қолган икки оила кўчабошчи аёллар, нуроний онахонлар аралашуви билан яраштирилибди, ушбу оилалардаги 4 нафар норасидаларнинг ё ота, ё она тарбиясидан, меҳридан мосуво бўлиб яшашининг олди олинибди.

– Биз чор-атрофимизга бефарқ бўлмасак, ёшлар тарбиясини назорат қилиб, уларга тўғри йўл кўрсатиб борсак, маҳалламиз доимо ҳозиргидек яшил тоифа бўлади, биз кексаларнинг юзимиз ёруғ бўлади, – дея таъкидлади Ўғилжон Ўрозова.

Тадбир иштирокчилари бу борадаги ишларни изчил давом эттириш юзасидан маслаҳатлашиб олдилар.

Севара ИСМОИЛОВА.