ИЛМИЙ-АМАЛИЙ ЎҚУВ СЕМИНАРИДА ҚОРАҚАЛПОҚ ТИЛИ ВА АДАБИЁТИ ҲАМДА ГЕОГРАФИЯ ФАНЛАРИ ЎҚИТУВЧИЛАРИ МАҲОРАТИГА БАҲО БЕРИЛДИ

Мамлакатимизда умумтаълим фанларини ўқитишни замон талаблари даражасида ривожлантириш, фан ўқитувчиларининг таълим-тарбия соҳасида эришаётган ютуқларини рағбатлантириш мақсадида соҳа вазирлиги томонидан ташкиллаштирилаётган илмий-амалий ва ўқув семинарлари муҳим аҳамият касб этмоқда. Ўтказилаётган бу каби тадбирлар орқали умумтаълим фанлари ўқитувчиларининг билим ва малакалари ошишига ижобий таъсир ўтказиб, иқтидорли ўқитувчилар томонидан таклиф этилаётган дарс ишланмалари, услубий қўлланмалар соҳага муваффақиятли татбиқ этилмоқда.

Жорий йилнинг 31 октябрь санасида Амударё туманидаги 1-сонли умумтаълим мактабида бўлиб ўтган “Оғзаки нутқ кўникмаларини мувофиқлаштириш усуллари: билиш, қўлланиш, фикрлаш” мавзусидаги Республика илмий-амалий ўқув семинарида ҳам иштирокчилар қорақалпоқ тилида дарс ўтиш, ўқувчиларда ушбу фанга нисбатан билим ва кўникмаларни ривожлантириш орқали уларнинг қорақалпоқ тили бойлигини юксалтириш борасидаги илғор методик тажрибалар билан яқиндан танишдилар.

Қорақалпоғистон Республикаси Мактабгача ва мактаб таълими Вазирлиги ҳамда вазирликнинг Амударё туман бўлими ҳамкорлигида ташкиллаштирилган мазкур илмий-амалий ўқув семинаридаги асосий мавзу – “Оғзаки нутқ кўникмаларини мувофиқлаштириш усуллари: билиш кўлланиш ва фикрлаш” мавзусида Республика таълим Маркази услубчиси Зулфия Исмоилова маъруза қилди. У ўз маърузасида ўқувчининг оғзаки нутқини замонавий инновацион педтехнологияларни қўллаш, хусусан қорақалпоқ тилида суҳбатлашиш, қизиқарли диалоглар, қорақалпоқ халқ мақол ва маталлари орқали ривожлантириш, ўқувчининг фикрлаш қобилиятини синовдан ўтказиш усулидан фойдаланиш воситасида бадиий тил билан қорақалпоқ оғзаки тил (шева)нинг ўзига хос хусусиятларини бир-бирига мувофиқлаштирган ҳолда машғулотлар олиб бориш тўғрисида батафсил тушунчалар берди.

Шундан сўнг, илмий-амалий ўқув семинари иштирокчиси, Амударё туман Мактабгача ва мактаб таълими бўлими тасарруфидаги 1-сонли мактабнинг олий тоифали қорақалпоқ тили ва адабиёт фани ўқитувчиси Аптабида Абдумуратова 8-А синф ўқувчиларига “Устозлик қилган зориқмас” мавзусида самимий суҳбат тарзидаги очиқ дарс ўтказди. Очиқ дарс жараёнида Ўзбекистон Қаҳрамони, Ўзбекистон ва Қорақалпоғистон халқ шоири Ибройим Юсуповнинг “Ўртоқ муаллим” поэмаси асосида ўқувчилар билан дилдан суҳбатлашди ва халқ шоирининг ўз асарида сўз қўллаш санъати, унинг инсон маънавиятини юксалтиришдаги катта аҳамияти юзасидан ўқувчиларнинг ўзаро фикр алмашишлари учун шароит яратди.

Илмий-амалий ўқув семинари давомида 40-сонли умумтаълим мактабининг қорақалпоқ тили ва адабиёт фани ўқитувчиси Замира Худойберганова 5-синфда қорақалпоқ тилидан “Бўғин ва бўғин кўчириш” мавзусида очиқ дарс ўтказди. У ўз дарсида қорақалпоқ тили дарсларида бўғин кўчириш борасида ўқувчилар томонидан йўл қўйиладиган имло хатоларга барҳам бериш юзасидан қимматли фикрлар билдирди.

Семинар иштирокчилари ўтказилган ҳар иккала очиқ дарсни ҳам юқори баҳоладилар. Шу билан бирга мазкур очиқ дарслар орқали қорақалпоқ тили ва адабиёт фанини ўқитиш бўйича катта тажрибага эга Аптабида Абдумуратова ҳамда 40-сонли мактабнинг қорақалпоқ тили ва адабиёт фани ўқитувчиси Замира Худойбергановалар томонидан очиқ дарс жараёнида илгари сурилган инновацион ғоялар муҳим аҳамиятга эга эканлигини таъкидладилар.

Илмий-амалий ўқув семинари иштирокчилари ўтилган очиқ дарслар юзасидан ўзларини қизиқтирган саволлар билан мурожаат қилдилар. Барча саволларга масъуллар ва тажрибали ўқитувчилар томонидан жавоблар тақдим этилди.

Семинар якунида Аптабида Абдумуратова ва Замира Худойберганова Қорақалпоғистон Республикаси Мактабгача ва мактаб таълими Вазирлигининг фахрий ёрлиқлари билан тақдирландилар.

Шу куни Амударё туманидаги 40-сонли умумтаълим мактабида ҳам “География дарсларида янги услублардан ҳамда хариталар (атлас ва контур)дан фойдаланиб дарс ўтиш усули ва амалий масалалар билан ишлашиш” мавзусида Республика илмий-амалий семинари ўқув семинари ўтказилиб унда Қорақалпоғистон таълим Маркази услубчиси Рита Қалилаева, мазкур Марказнинг услубий хизмат кўрсатиш бўлими услубчиси Жамолатдин Ўтепбергеновлар ўтказилаётган илмий-амалий ўқув семинарининг аҳамияти ва ундан кутилаётган натижалар юзасидан батафсил маълумот ва тушунчалар бердилар.

Семинар давомида мактабнинг география фани ўқитувчиси Зокир Раҳимов ҳамда 47-сонли мактабнинг география фани ўқитувчиси Гулбану Алмамбетовалар томонидан намунали очиқ дарслар ўтказилди.

Илмий-амалий ўқув семинари якунида ўтказилган ҳар иккала очиқ дарс иштирокчилар томонидан таҳлил этилиб, ўқитувчиларнинг билим ва маҳоратларига дарс ўтишдаги ўзига хос услубларига юқори баҳо берилди. Амударё туман мактабгача ва мактаб таълими бўлимининг мактаблар фаолиятини мувофиқлаштириш бўлими услубчиси Райҳон Якубова бўлиб ўтган илмий-амалий ўқув семинари таълим сифатини оширишга ижобий таъсир қилувчи омил бўлганини алоҳида таъкидлади.

Робия ЙЎЛДОШЕВА.