“УСТОЗ – ТАЪЛИМ БУНЁДКОРИ” ШИОРИ ОСТИДА ЎҚИТУВЧИЛАР ҚУРУЛТОЙИ БЎЛИБ ЎТДИ

Тумандаги таълим тизими ходимлари иштирокида “Устоз – таълим бунёдкори” шиори остида таълим соҳасидаги ислоҳотларни биргаликда амалга ошириш, ўқитувчиларни ягона кучга айлантириш, мавжуд муаммоларни муҳокама қилиш ва уларнинг ечимини топишга бағишланган Ўқитувчилар қурултойи бўлиб ўтди.

7 ноябрь куни 76-сонли умумтаълим мактабида бўлиб ўтган ушбу тадбирда Қорақалпоғистон Республикаси Мактабгача ва мактаб таълими вазирлигининг методик хизмат кўрсатиш бўлими методисти Ўткир Матмурадов ҳамда тумандаги Мактаб ва мактабгача таълим бўлими масъуллари, умумтаълим мактаблари ўқитувчилари қатнашдилар.

Қурултой тўрт йўналиш бўйича – бошланғич таълим, аниқ, табиий, она тили ва адабиёт фанлари йўналишларида семинар-тренинг, давра суҳбатлари тарзида ўтказилди. Семинар-тренинглар давомида тренер-ўқитувчилар ўқув машғулотларини ташкил қилиб, ўқитувчиларга методик тушунчалар бердилар. Шу билан бирга ўқиутвчиларнинг дарсда замонавий технологиялар ва услублардан самарали фойдаланиш бўйича фикр-мулоҳазаларини тинглаб, мавжуд муаммоларни муҳокама қилдилар.

Таъкидлаш жоизки, Мактабгача ва мактаб таълими вазирлиги томонидан таълим ислоҳотларини биргаликда амалга ошириш, ўқитувчиларни ягона кучга айлантириш, мавжуд муаммоларни муҳокама қилиш ва уларнинг ечими бўйича аниқ таклифлар ишлаб чиқиш мақсадида кузги таътил даврида ўқитувчилар иштирокида ўқув семинарлар ва учрашувлар ташкил этилиши белгиланган эди. Шунга кўра юртимизнинг барча ҳудудларида Ўқитувчилар қурултойи ташкил этилиб, бошланғич таълим, аниқ ва табиий, она тили ва адабиёт фанларидан тренинглар, очиқ мулоқотлар бўлиб ўтди, ҳар бир йўналиш бўйича 341 нафардан жами 1 364 нафар тренер-ўқитувчилар қатнашишди.

Республика бўйича бўлиб ўтган семинар-тренинглар ҳамда очиқ мулоқотларда ушбу тренер-ўқитувчилар томонидан фан ўқитувчиларига ўз фанларидан янги методларни қўллаш бўйича тушунчалар берилди. Семинар-тренинглар давомида педагоглар ўқувчиларни фанларга қизиқтириш йўллари, лойиҳага асосланган таълимнинг моҳияти, ўқиш саводхонлиги ва фанлар доирасида 4К моделини қўллаш, ХХI асрда сифатли ўқитишнинг асосий тамойиллари юзасидан муҳим маълумотларга эга бўлдилар. Шунингдек, давра суҳбатлари ўтказилиб, мавжуд муаммолар ва уларни ечими бўйича фикр-мулоҳазалар ўртага ташланди.

 Амударё туманида бўлиб ўтган Ўқитувчилар қурултойида ҳам умумтаълим мактабларининг бошланғич таълим, аниқ фанлар, табиий фанлар, она тили ва адабиёти йўналиши методбирлашма раҳбарлари ва фан ўқитувчилари керакли маълумотларга эга бўлдилар.

Қорақалпоғистон Республикаси Мактабгача ва мактаб таълими вазирлигининг методик хизмат кўрсатиш бўлими методисти Ўткир Матмурадов ҳамда тумандаги Мактаб ва мактабгача таълим бўлимининг бошланғич таълим, аниқ фанлар, табиий фанлар, она тили ва адабиёти йўналиши методистлари кўргазмали тарзда ўқув машғулотларини ўтказишди. Машғулотлардан сўнг, очиқ мулоқот ўтказилиб, мавжуд муаммолар муҳокама қилинди ва уларнинг ечими бўйича аниқ таклифлар ишлаб чиқилди.

Қурултойга ташриф буюрган тумнадаги умумтаълим мактабларининг мазкур йўналишлар бўйича методбирлашма раҳбарлари ва фан ўқитувчилари керакли маълумотларга эга бўлдилар. Бу каби тренинглар ўқитувчилар малакасини оширишда муҳим аҳамият касб этади.

О.Худойберганова.