Дардларга даво излаб

Шуҳрат болаликдан шифокор бўлишни орзу қиларди. Энг зўр мутахассис бўлишни, ота-онаси шаънига энг яхши сўзлар айтилишини истарди. Бу орзу-истаклар уни қунт билан илм олишга ундади. Бор билимини ва маҳоратини ишга солиб, 2-сонли Тошкент давлат тиббиёт институти (ҳозирги Тиббиёт академияси) талабаси бўлди. Олий таълим даргоҳида ҳам қунт билан ўқиди. 1997 йилда мутахассислик дипломини олиб, Қорақалпоғистон Республикаси Марказий шифохонасининг урология бўлимида интернатура ўтади.

Шундан сўнг, 1998 йилда ўзи туғилиб ўсган Амударё тумани Тиббиёт бирлашмаси кўп тармоқли Марказий поликлиникасига уролог-шифокор бўлиб ишга келди. Мана қарийб 25 йилдирки, шу даргоҳда эл дардига дармон бўлиб келмоқда.

Эгнига оқ халат кийиб, қасамёд қилганидан буён турли ёшдаги беморларни даволаб келмоқда. Унинг ҳузурига турли урологик касалликлар билан касалланган беморлар келишади. Улар орасида йиллаб фарзанд кўрмаганлар ҳам бор. Шуҳрат Аллоҳнинг инояти билан бундай беморларнинг ҳам шифо топишига ёрдам кўрсатиб келмоқда. Унинг кўмагида юзлаб оилалар фарзандли бўлиб, хонадонлари қувончга тўлди.

Шуҳрат мунтазам изланишда. Ўз устида ишлаб, соҳадаги янгиликларни фаолиятига татбиқ қилади. Шу мақсадда бир неча бор Тошкент врачлар малакасини ошириш институтида малака оширди.

Қўли енгил шифокор биринчи марта Ендир ота Идрисовда жарроҳлик амалиётини ўтказганди. Ҳозир бобо 90 ёшдан ошди.

– Тиббиётнинг ривожланиши натижасида фаолиятимизга янги-янги даволаш услубларини жорий қилаяпмиз, – дейди Шуҳрат. – Ҳар йили 200га яқин жарроҳлик амалиётларини ўтказаман. Бир пайтлари республика марказида бажарилган амалиётларни энди туманимизда ҳам ўтказиб, беморларнинг ортиқча овора ва чиқимдор бўлишининг олдини олаяпмиз. Уларнинг дарддан фориғ бўлиб, оёққа туриб кетишларига кўмаклашамиз.

Ширинсухан, билимдон, иқтидорли, қўли енгил бу шифокорни излаб, ҳатто Россия, Қозоғистондан келганлар бор. У жуда камтар, барчага бирдек муомала қилади, қўлидан келган ёрдамини аямайди. Ҳамкасблари, шогирдлари ҳам кўп масалаларда Шуҳрат билан маслаҳатлашишади.

Шифокор  Шуҳрат Жуманиёзов ҳар куни ўнлаб инсонларни қабул қилиб, ширин муомаласи билан уларнинг дарддан фориғ бўлишига кўмаклашади. Ўзи орзу қилганидек, ҳар куни “Отангга раҳмат”, “Қўлингиз дард кўрмасин”, “Умрингиздан барака топинг” каби дуолар олади. Биз ҳам эл суйган шифокорга касбингиздан камол топинг, деб қоламиз.

Норбой ТЎРАБОЕВ.