ЧОЙКЎЛ ОВУЛИДА ГРАНТ ЛОЙИҲАСИ ДОИРАСИДА “ОГОҲЛИК – ДАВР ТАЛАБИ” МАВЗУСИДА ДАВРА СУҲБАТИ ЎТКАЗИЛДИ
Айни пайтда бутун дунё миқёсида глобал муаммога айланган диний экстремизм ва терроризмга қарши курашиш, ёшларимизни ёт ғоялардан асраш, уларнинг мафкуравий билимларини ошириш ҳар қачонгидан ҳам долзарб тус олган. Бу борада Амударё туманида фаолият юритаётган amunews.uz веб-сайти таҳририяти ходимлари ҳам Олий Мажлис ҳузуридаги жамоат фонди томонидан молиялаштирилган “Соғлом муҳит – соғлом ҳаёт” номли грант лойиҳаси доирасида тарғибот-ташвиқот тадбирларини ўтказиб келмоқда.
28 ноябрь куни грант лойиҳасининг иш режасига кўра “Огоҳлик – давр талаби” мавзусидаги навбатдаги тадбир Чойкўл овулида бўлиб ўтди. Тадбирда таҳририят ходимлари, фуқаролар йиғини раиси Бегзод Айтеков, хотин-қизлар фаоли Сайлихон Муродбоева, Ички ишлар бўлими профилактика инспектори Азимжон Матюсупов, овул имоми Жангабой Ўрозбоев ҳамда кўчабошчилар, ҳудуддаги мактаблар амалиётчи-психологлари иштирок этишди.
Давра суҳбати тарзида ўтказилган ушбу тадбирни Чойкўл овул фуқаролар йиғини раиси Бегзод Айтеков очиб берди ва лойиҳа ижрочиларини таништириб ўтди. Таҳририят ходимлари amunews.uz веб-сайтининг “Соғлом муҳит – соғлом ҳаёт” грант лойиҳасининг мақсадига кўра ижтимоий тармоқларда мақолалар эълон қилинаётгани, фаол ва интилувчан ёшларни тенгдошларига ўрнак қилиб кўрсатилаётгани, маҳаллаларда, оилаларда ижтимоий-маънавий муҳит барқарорлигига салбий таъсир кўрсатувчи ҳолатларнинг, аҳоли, айниқса ёшлар орасида ўз жонига қасд қилиш, гиёҳвандлик, эрта турмуш қуриш каби иллатларнинг олдини олиш борасида тушунтириш, тарғибот ишлари олиб борилаётганини баён этишди.
Давра суҳбати давомида овул ҳудудида ёшларнинг турли диний-экстремистик ва террорчилик оқимлар таъсирига тушиб қолишнинг олдини олиш бўйича ҳамкорликда амалга оширилаётган ишлар хусусида сўз юритилди.
Овул имоми Жангабой Ўрозбоев миллий манфаатларга зид бўлган диний мазмундаги маҳсулотларни республика ҳудудига олиб кириш ва тарқатишга уриниш ҳолатлари юртимизда ҳам кузатилаётгани, бу каби экстремистик руҳдаги маҳсулотларнинг интернет ва бошқа йўллар орқали тарқатилиши аҳоли томонидан диннинг нотўғри талқин этилишига, кам маълумотга эга ўқувчиларнинг маънавий онги бузилишига замин яратаётганини куюнчаклик билан сўзлади. Шунингдек, бузғунчи кимсалар яқин ўтмишда диний-экстремизм ва ақидапарастликни тарқатиш, аҳоли орасида ёйишда турли адабиёт ва нашрлардан фойдаланган бўлса, замонавий технология воситалари ривожланган ҳозирги даврда интернет тармоғини ёт ғоялар тарқатишнинг қулай манбаига айлантиришаётганини таъкидлади.
Туман Ички ишлар бўлимининг Чойкўл овулидаги профилактика инспектори Азимжон Матюсупов ҳам ёшлар ўртасидаги жиноий ҳуқуқбузарликлар ва диний экстремизмнинг салбий таъсири тўғрисида атрофлича маълумотлар бериб ўтди. Ушбу тарғибот йиғилишида юртимизнинг айрим ҳудудларида содир бўлаётган турли ҳуқуқбузарликлар ҳақида далилларга таянган мисолларни келтириш билан бирга, диний экстремизм ва фундаментализм ғояларини тарғиб қилаётган, ислом динини ниқоб қилиб олган жиноятчиларнинг ноқонуний ҳаракатлари тўғрисида ҳам ўз фикр-мулоҳазаларини билдириб ўтди.
Тадбирда иштирок этган фуқаролар йиғини хотин-қизлар фаоли Сайлихон Муродбоева, 59-сонли мактабнинг амалиётчи-психологи Муаззам Матёқубова, ва 22-сонли мактабнинг амалиётчи-психологи Фазилат Шукурлаевалар ҳам ёт ғояларга қарши маънавий иммунитетни ҳосил қилиш, интернет ва ОАВ орқали кенг тушунтириш, соф диний таълимотларни ёшларга етказиш, уларни халқпарварлик, ватанпарварлик, миллий ва диний қадриятларга садоқат руҳида тарбиялаш муҳим аҳамиятга эга эканлигини эътироф этишди. Шунингдек, бу борада самарали натижаларга эришиш, ёшларни юрт келажагига муносиб қилиб тарбиялашда ҳамжиҳатликда иш олиб бориш муҳим аҳамият касб этишини таъкидлашди. Шу билан бирга “Соғлом муҳит – соғлом ҳаёт” грант лойиҳаси доирасида ўтказилган ушбу “Огоҳлик – давр талаби” мавзусидаги тадбирнинг ниҳоятда аҳамиятлилиги, бу каби тадбирларни ёшлар ўртасида ҳам мунтазам равишда ўтказиб боришни йўлга қўйиш кераклиги алоҳида айтиб ўтилди.
Юртимизда ҳукм сураётган тинчлик, фаровонлик ва миллатлараро ўзаро тотувликнинг қадрига етиш ҳар биримизнинг бурчимиздир. Диний-экстремизм ва терроризмга қарши курашишда ҳар бир инсон масъулиятни ҳис этиши, Ватанимизнинг келажаги учун жавобгар эканини ва, албатта, ёт таъсирлардан огоҳ бўлишни унутмаслиги керак.
Озода Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
